İDMAN
Yunanıstan çempionu olan azərbaycanlı futbolçu: Daha böyük klublarda oynamaq istəyirəm – MÜSAHİBƏ
Bakı, 13 may, AZƏRTAC
Yunanıstanın PAOK komandasının heyətində ölkə çempionu olan qadın futbolçulardan ibarət Azərbaycan millisinin müdafiəçisi Ayşən Əhmədova AZƏRTAC-ın suallarını cavablandırıb. Həmin müsahibəni təqdim edirik.
- PAOK-dakı ilk mövsümünüzdə Yunanıstan çempionu oldunuz. Təəssüratlarınızı bilmək maraqlıdır...
- PAOK çox böyük klubdur. Bu komandanın bir parçası olduğuma görə xoşbəxtəm. Ailə kimi olmağımız bizə çempionluğu qazandırdı. Ən böyük fərq isə məğlub olmadan qızıl medallara sahib çıxmaq idi. Mövsümün bitməsinə 2 tur qalmış bunu bacardığımıza görə sevincliyik.
- Mövsümün startından əvvəl bu cür nəticəni gözləyirdiniz?
- Komandamız ötən il də çempion olub. Bu mövsüm də məqsəd qızıl medallara sahib çıxmaq və növbəti il Çempionlar Liqasında oynamaq idi. Kollektivdə olan özünəinam sayəsində bunu bacardıq.
- Bu, sizin ölkə xaricində ikinci çempionluğunuzdur...
- Bəli, ötən il Türkiyənin "Fomget" komandasının heyətində bu sevinci yaşamışdım. Ardıcıl iki il Avropada çempion olmaq əla hissdir.
- Çempionluq yolunda əsas rəqibləriniz hansı komandalar idi?
- “Panatinaikos"la matçlar gərgin və çətin keçdi. Onlar əsas rəqiblərimizdən biri idi. Düşünürəm ki, meydanda qələbəni ən çox istəyən tərəf biz idik.
- Yunanıstan Kubokunda mübarizəni davam etdirirsiniz. Yəqin ki, burada da qalib gəlməyi hədəfləyirsiniz...
- Ölkə kubokunda yarımfinala vəsiqə qazanmışıq. Bu mərhələdəki rəqib “O.F.N. Yonias” komandasıdır. Mövsümü "qızıl dubl"la bitirmək istəyirik.
- PAOK-la müqavilə bağladığınız zaman demişdiniz ki, bu komanda Avropanın daha güclü klublarına getmək üçün tramplin rolunu oynayacaq. Artıq mövsüm də başa çatmaq üzrədir. Gələcək karyeranız barədə qərar vermisiniz?
- Əlbəttə, mən buradan daha böyük klublara getmək istəyirəm. Yunanıstan çempionatının səviyyəsi də yüksəkdir. Mövsümün sonunda menecerimlə birlikdə qərar verəcəyik.
- PAOK sizə növbəti mövsüm üçün yeni müqavilə təklif edib?
- Bəli, yeni müqavilə təklifi olub. Lakin hazırda burada qalıb-qalmayacağım barədə qərar verməmişəm.
- Gələcəkdə hansı tanınmış komandada oynamaq istəyərdiniz?
- Gələcəkdə "Qarabağ"ın qadın komandasının yaranmasını və həmin formanı geyinərək uğurlar qazanmağımı istəyirəm. Ümid edirəm ki, bu arzum reallaşacaq. Ağdam klubunu təmsil etmək qürurverici olar.