Bakı, 16 may, Salihə Əliyeva, AZƏRTAC

“Azerbaijan Fashion Week” (AFW) 16-cı yaz-yay mövsümü çərçivəsində Azərbaycan Respublikası Mədəniyyət Nazirliyi yanında Mədəni və Yaradıcı Sənayelərin İnkişaf Mərkəzinin dəstəyi ilə “Up-Cycle Jeans” müsabiqəsi keçirilib.

Müsabiqə təşkilatçılarının AZƏRTAC-a bildirdiyinə görə, əsas məqsədi ekoloji təmiz modanın inkişafına dəstək olmaqdan ibarət olan tədbir Qala Dövlət Tarix-Etnoqrafiya Qoruğunun nəzdindəki “Tullantılardan sənətə” muzeyində baş tutub.

Müsabiqənin şərtlərinə əsasən, 16 gənc dizayner “Up-Cycle Jeans” finalına vəsiqə qazanaraq təkrar emal olunmuş cins şalvar, plastik, metal və digər materiallardan hazırlanmış məhsulları münsiflər heyətinə təqdim edib. Hər bir iştirakçı tərəfindən kişi və qadın geyim modelləri təqdim edilib. İşlərin qiymətləndirilməsində moda sənayesinin mütəxəssisləri - modelyer-dizayner Zemfira Cəfər, “New Couture (Paris) B2B sərgi salonunun təsisçiləri Devid Pirnia və Nadejda Kojevnikova, “New Generation-Open way.Kazakhstan” müsabiqəsinin təsisçisi Aleksey Çjen, Mədəni və Yaradıcı Sənayelərin İnkişaf Mərkəzinin nümayəndəsi Ceyla Məmmədova, qazax dizayneri Leonid Jerebtsov, “Tajikistan Fashion Week”in təsisçisi Toxar İbrahimov, “Debet Safety factory“ MMC-nin baş konstruktoru, “Fashion Academy”nin təsisçisi Mənzər Zəkizadə, qazaxıstanlı moda prodüseri, KFW və AFW-nin təsisçisi, həmçinin “Fashion Coworking” yaradıcılıq məkanının yaradıcısı Sayat Dosıbayev iştirak edib.

1-ci yerin sahibi Sara Abdullayeva müsabiqənin nəticələrinə əsasən, AFW-nin dəstəyi ilə ilk kapsul kolleksiyasını buraxmaq və “Azerbaijan Fashion Week”in 17-ci mövsümü çərçivəsində geniş auditoriyaya təqdim etmək imkanı əldə edib.

Bundan başqa, 2-ci və 3-cü yerin sahiblərinə də qiymətli hədiyyələr təqdim olunub. 2-ci yeri tutan Ülviyyə Əliyeva mükafat olaraq tikiş maşını əldə edib, 3-cü yerin sahibi Aysu Abdullayevaya isə peşəkar buxar ütüsü təqdim olunub.

Müsabiqənin nəticələrinə əsasən, Qran-Prinin qalibi Ramazan Həbibov seçilib. O, “Debet Safety Factory” MMC yüngül sənaye müəssisəsinin dəstəyi ilə ilk cins kolleksiyasını buraxacaq, həmçinin italyan mütəxəssislərinin ən yaxşı ənənələri ilə tanış olmaq üçün Milanın moda akademiyalarından birinə yollanacaq. Bundan əlavə, iki iştirakçı - Qaziza Özdoğan (Türkiyə) və Ramazan Həbibov “New Generation-Open way.Kazakhstan” müsabiqəsində iştirak etmək üçün Qazaxıstana dəvət olunublar.

Müsabiqənin bütün iştirakçıları moda kurslarında onlayn iştirak üçün sertifikatlar, həmçinin modelyer-dizayner Zemfira Cəfər və “Fashion Academy”nin yaradıcısı Mənzər Zakizadə ilə əməkdaşlıq imkanı əldə ediblər.

Moda sənayesi, dünyanın istixana qazı tullantıları, zəhərli kimyəvi maddələrin istifadəsi və çox miqdarda tullantıların atılmasına görə məsuliyyət daşıyan ən çirkləndirici istehsal sahələrindən biridir. Buna görə davamlı, ekoloji cəhətdən təmiz moda sənayesinin təşviqi istiqamətində bir sıra tədbirlərin görülməsi məqsədəuyğun hesab olunur.

“Up-Cycle Jeans” müsabiqəsinin keçirilməsi bir daha təsdiq edir ki, Azərbaycan cəmiyyəti beynəlxalq birliyin etibarlı və məsuliyyətli üzvü kimi iqlim dəyişikliyinin təsirləri ilə mübarizə aparır və ətraf mühitin qorunması üçün təşəbbüs göstərir. “AFW” qeyri-kommersiya təşkilatı ölkənin ekoloji strategiyası və “Yaşıl Sülh naminə həmrəylik İli” çərçivəsində bir sıra əhəmiyyətli layihələr həyata keçirməyə davam edir.

Xatırladaq ki, 16-cı mövsüm çərçivəsində yerli və xarici dizaynerlərin kolleksiyalarının parlaq nümayişləri keçiriləcək. Mayın 16-da “The Ritz-Carlton” otelində, mayın 17-də isə "Yanardağ" Dövlət Tarix-Mədəniyyət və Təbiət Qoruğunda müxtəlif ölkələrin milli dəb motivləri dizaynerlərin müasir interpretasiyasında nümayiş etdiriləcək.