Müstəqillik və suverenlik yolu ilə irəliləyən Azərbaycan Respublikası dünyanın müxtəlif ölkələri ilə birbaşa əlaqələri, bütün sahələrdə əməkdaşlığı genişləndirməyə çalışır. Fəal diplomatik əlaqələr və işgüzar əməkdaşlıq ölkəmizin iqtisadi inkişafına təkan verir, müharibənin sülh yolu ilə başa çatdırılması imkanlarını artırır, Azərbaycanın dünya miqyasında mövqelərini gücləndirir. Bu işdə dövlətin məqsədyönlü xarici siyasəti də mühüm rol oynayır.

İyulun 9-da Azərbaycan Respublikasının Prezidenti Heydər Əliyev Səudiyyə Ərəbistanının məliki Fəhd ibn Əbdül Əziz əl-Səudun dəvəti ilə bu ölkəyə rəsmi səfərə yola düşmüşdür. Səfər zamanı iki ölkə arasında münasibətləri möhkəmləndirmək məqsədilə bir sıra sənədlərin imzalanması nəzərdə tutulmuşdur.

Azərbaycan Prezidenti yola düşmək ərəfəsində səfərin məqsədləri barədə müxbirin sualına cavab vermişdir.

Binə hava limanında Azərbaycan Prezidenti Heydər Əliyevi Respublika Ali Sovetinin sədri Rəsul Quliyev, Baş nazir Surət Hüseynov və digər rəsmi şəxslər yola salmışlar.

Səfərdə Azərbaycan Prezidentini Respublika Baş nazirinin birinci müavini Fuad Quliyev, dövlət müşavirləri Vəfa Quluzadə, Qabil Hüseynli və Vahid Axundov, Baş nazirin müavini Elçin Əfəndiyev, nazirlər, Qafqaz Müsəlmanları İdarəsinin sədri şeyxülislam hacı Allahşükür Paşazadə və başqa rəsmi şəxslər müşayiət edirlər.

Elə həmin gün Azərbaycan Respublikasının Prezidenti Heydər Əliyev Səudiyyə Ərəbistanına gəldi. Ciddə hava limanında Azərbaycan dövlətinin başçısını Səudiyyə Ərəbistanı məlikinin qardaşı, ölkənin müdafiə və mülki aviasiya naziri şahzadə Sultan ibn Əbdül Əziz, Məkkə əmiri şahzadə Mütaib ibn Əbdül Əziz, xarici işlər naziri şahzadə Səud əl-Feysəl, məlikin xüsusi müşavirləri və digər rəsmi şəxslər qarşıladılar.

Azərbaycan Prezidentinin Səudiyyə Ərəbistanına səfər proqramı Məkkədəki müqəddəs Kəbənin ziyarəti ilə başlandı. Heydər Əliyev və onu müşayiət edən şəxslər müqəddəs Kəbəni İslam dininin tələblərinə uyğun şəkildə ziyarət etdilər. Azərbaycan dövlətinin başçısı Kəbənin önündə dayanaraq dedi ki, yəqin Allah-təala bu müqəddəs ziyarətgahda bizim haqq səsimizi eşidərək dualarımızı, ziyarətimizi qəbul edəcək, Azərbaycan torpağında tezliklə sülh, əmin-amanlıq yaranacaq, ölkəmiz özünün ərazi bütövlüyünü təmin edərək müstəqillik yolu ilə irəliləyəcəkdir.

İyulun 10-da Azərbaycan Prezidenti Heydər Əliyev Ciddədə onun üçün ayrılmış iqamətgahda İslam Konfransı Təşkilatının (İKT) baş katibinin əvəzini qəbul etdi (baş katib hazırda səfərdədir). Heydər Əliyev bildirdi ki, keçmiş SSRİ-nin müsəlman respublikalarından İKT-yə ilk dəfə Azərbaycan daxil olmuşdur və ölkəmiz bu təşkilatla əlaqələri genişləndirmək niyyətindədir. O dedi ki, eyni zamanda, Azərbaycanın indiki vəziyyətində biz İKT-dən kömək də umuruq.

İslam Konfransı Təşkilatı baş katibinin əvəzi İKT-nin fəaliyyəti barədə Azərbaycan Prezidentinə ətraflı məlumat verərək bildirdi ki, təşkilatın əsas məramı müsəlman ölkələri arasında həmrəyliyə nail olmaq və əməkdaşlığı genişləndirməkdir. İKT Azərbaycanın iqtisadi vəziyyəti ilə yaxından tanışdır və onun daxili, xarici siyasəti ilə də maraqlanır.

Tərəflər belə bir yekdil fikrə gəldilər ki, İslam Konfransı Təşkilatı ilə Azərbaycan Respublikası arasında əlaqələri inkişaf etdirmək üçün geniş imkanlar vardır.

Sonra Heydər Əliyev və səfərdə onu müşayiət edən şəxslər Ciddədəki Sənaye-Ticarət Palatasına getdilər. Palatanın prezidenti Şeyx İsmayıl Əbu Davud Azərbaycan Prezidentinə Sənaye-Ticarət Palatasının fəaliyyəti barədə ətraflı məlumat verərək qeyd etdi ki, 30 mindən çox üzvü olan palata dünyanın bir çox ölkələri ilə sıx, işgüzar əlaqələr saxlayır. Azərbaycanla əlaqələr yaratmaq barədə də danışıqlar aparılır.

Heydər Əliyev bildirdi ki, Azərbaycan təxminən iki il bundan əvvəl öz müstəqilliyini bərpa etmiş gənc dövlətdir. Biz iqtisadiyyatda bazar münasibətlərinə keçid yolu tutmuşuq. Səudiyyə Ərəbistanı ilə Azərbaycan arasında əlaqələri inkişaf etdirməkdən ötrü ilk addımlar atılır.

Ölkəmizin daxilində sabitlik mövcuddur. Ermənistanın hərbi təcavüzünə gəldikdə isə, Azərbaycan özünün ərazi bütövlüyünü tezliklə təmin edəcəkdir.

Heydər Əliyev Azərbaycana xarici investisiyaların cəlb edilməsi məsələsinə toxunaraq bildirdi ki, Prezident bu investisiyaların qorunmasının təminatçısıdır. O, inkişaf etmiş ölkələrin neft şirkətləri ilə gedən danışıqlar barədə məlumat verərək dedi ki, xarici investorlar ölkəmizə inanırlar. Ərəb biznesmenləri də bu məsələdə arxayın ola bilərlər.

Heydər Əliyevin “VII əsrdə torpağınızda İslam dininin bəsət etməsi ilə bizi xoşbəxt etdiniz, yəqin ki, indiki çətin vəziyyətimizdə də bizi tək qoymazsınız” sözlərini görüş iştirakçıları alqışlarla qarşıladılar. Sənaye-Ticarət Palatasındakı görüş qarşılıqlı surətdə faydalı əməkdaşlığın zəruriliyinə hər iki tərəfdə möhkəm inam yaratdı.

İyulun 10-da günortadan sonra Azərbaycan Prezidenti öz iqamətgahında İslam Birliyi Cəmiyyətinin baş katibi Əhməd Məhəmməd Əlini qəbul etdi. Ölkəmizdəki vəziyyət barədə söhbət açan Heydər Əliyev respublikamıza maddi kömək göstərilməsi lüzumu ilə yanaşı, Azərbaycan həqiqətlərini dünya miqyasında təbliğ etməyin zəruriliyindən də danışdı.

Həmin gün Azərbaycan dövlətinin başçısı Beynəlxalq İslam “Nicat” Təşkilatının baş katibi Fərid Yasin əl-Quraşini də qəbul etdi. Dünyanın 90 ölkəsində fəaliyyət göstərən bu təşkilat Azərbaycan qaçqınlarına böyük kömək edir. 13 min qaçqın ailəsini himayəyə götürmüşdür, bu yaxınlarda iki təyyarə ilə Azərbaycana humanitar yardım göndərmişdir. Təşkilat Azərbaycanın iqtisadi inkişafı məsələləri ilə də maraqlanır. Baş katib Prezident Heydər Əliyevin fəaliyyəti ilə yaxından tanış olduğunu bildirdi.

Görüşdə qeyd olundu ki, “Nicat” təşkilatı Azərbaycanda yeni iş yerləri açılması və Bakıda xəstəxana tikintisi ilə bağlı tezliklə işə başlayacaqdır.

Sonra Azərbaycan Prezidenti İslam İnkişaf Bankının prezidenti Osama Cəfər Faqulini qəbul etdi. Görüşdə bankın Azərbaycana maliyyə yardımı göstərməsi, ölkəmizin vəziyyəti ilə bağlı bir sıra başqa məsələlər barədə söhbət getdi. Belə bir razılıq əldə olundu ki, konkret təkliflər tezliklə ekspertlərin müzakirəsinə verilsin.

İyulun 10-da axşam Səudiyyə Ərəbistanının məliki Fəhd ibn Əbdül Əziz əl-Səud Azərbaycan Prezidenti Heydər Əliyevin şərəfinə böyük ziyafət verdi. Sonra yüksək səviyyədə Azərbaycan-Səudiyyə Ərəbistanı danışıqları başlandı.

Azərbaycan Prezidentinin Səudiyyə Ərəbistanına rəsmi səfəri davam edir.

Aslan Aslanov

AZƏRTAC-ın xüsusi müxbiri