ELM VƏ TƏHSİL
BAKIDA NATO-NUN MÜASİR ŞƏBƏKƏLƏR ÜZRƏ SEMİNARI ÖZ İŞİNƏ BAŞLAMIŞDIR
NATO-nun Elmi Proqramı, Mərkəzi və Qərbi Avropa Şəbəkələri Assosiasiyası, Azərbaycan Milli Elmlər Akademiyası, Azərbaycan Elm və Təhsil Şəbəkələri Assosiasiyası, BMT-nin İnkişaf Proqramı və Açıq Cəmiyyət İnstitutu tərəfindən təşkil edilmiş seminar sentyabrın 30-dək Zuğulbadakı “Gənclik” Beynəlxalq Turizm Mərkəzində keçiriləcəkdir.
Tədbirin rəsmi açılışı Azərbaycan Milli Elmlər Akademiyasın əsas binasında olmuşdur. Akademiyanın prezidenti Mahmud Kərimov, NATO-nun proqram direktoru Valter Kaffenberger, Açıq Cəmiyyət İnstitutunun nümayəndəsi Samir Əliverdibəyov, Mərkəzi və Şərqi Avropa Şəbəkələri Assosiasiyasının direktoru Jan Qruntorad, BMT İnkişaf Proqramının nümayəndəsi Sultan Hacıyev, beynəlxalq təşkilat komitəsi adından Jacek Qajevski seminar iştirakçılarını salamlamışlar.
Prezidentin İcra Aparatının humanitar siyasət şöbəsinin müdiri Fatma Abdullazadə bildirmişdir ki, NATO-nun müasir şəbəkələr üzrə seminarları bütün dünya üçün əhəmiyyətlidir. Çünki virtual məkan artıq vahid beynəlxalq məkana çevrilməkdədir. Bu ilin dekabr ayında informasiya-kommunikasiya texnologiyasına dair Cenevrədə keçiriləcək zirvə toplantısı ərəfəsində işə başlayan seminar Azərbaycan üçün çox əhəmiyyətli bir hadisədir. O demişdir ki, respublikamızın intellektual potensialı qloballaşma şəraitində bizdə də müasir informasiya şəbəkəsinin inkişafına imkan verir.
Açılış mərasimində Milli Məclis sədrinin müavini Ziyafət Əsgərov, NATO üzvü olan ölkələrin Azərbaycandakı səfirləri iştirak etmişlər.
...İyirmi səkkiz ölkədən 70-dən artıq nümayəndənin iştirak etdiyi seminarda regional əməkdaşlıq, dövlət elm və təhsil şəbəkəsinin fəaliyyəti, Azərbaycanda informasiya-kommunikasiya texnologiyalarının inkişafı və s. ilə bağlı 40-dək məruzə dinləniləcəkdir.