Avqustun 23-də Milli Olimpiya Komitəsinin birinci vitse-prezidenti, gənclər, idman və turizm naziri Əbülfəs Qarayev Avropa Cüdo Federasiyasının prezidenti Marius Vizerin başçılıq etdiyi nümayəndə heyəti ilə görüşmüşdür.

Nazir qonaqları salamlayaraq bildirdi ki, yeniyetmə cüdoçuların Bakıda başlanmış Avropa çempionatının təşkilatçıları Milli Olimpiya Komitəsi, Gənclər, İdman və Turizm Nazirliyi və Azərbaycan Cüdo Federasiyasıdır. İdmanın bu növü ölkəmizdə çox geniş yayılmışdır, Azərbaycan cüdoçuları arasında Olimpiya oyunlarının, dünya və Avropa çempionatlarının, müxtəlif beynəlxalq turnirlərin qalibləri var. Avropa Cüdo Federasiyası yeniyetmələr arasında növbəti çempionatın keçiriləcəyi yer haqqında qərar qəbul edərkən məhz bu amili əsas götürmüşdür. Ə.Qarayev idman avadanlığı verildiyinə görə Avropa Federasiyasının rəhbərliyinə və şəxsən Marius Vizerə təşəkkür etdi və ümidvar olduğunu söylədi ki, indiki çempionatın yaxşı təşkili gələcəkdə yaşlı cüdoçuların Avropa çempionatının da Azərbaycan paytaxtında keçirilməsi üçün əsas ola bilər.

Nazir Azərbaycan Prezidenti Heydər Əliyevin uğurlu daxili və xarici siyasəti sayəsində ölkəmizdə ictimai-siyasi sabitliyin bərqərar olması, iqtisadiyyatın inkişafındakı nailiyyətlər, İlham Əliyevin 1997-ci ildə Milli Olimpiya Komitəsinin prezidenti seçilməsindən sonra respublikada bədən tərbiyəsi və idman hərəkatının geniş vüsət alması barədə də qonaqlara məlumat verdi.

Avropa Cüdo Federasiyasının prezidenti Marius Vizer idmanın inkişafında, yeni idman qurğularının tikilməsində Azərbaycanın yüksək nailiyyətlərini vurğulayaraq dedi ki, bütün bunlar ölkədəki əlverişli iqtisadi vəziyyətlə bilavasitə bağlıdır. O, Azərbaycan Milli Olimpiya Komitəsinin prezidenti İlham Əliyevin Baş nazir təyin olunması münasibətilə təbriklərini, habelə xatirə hədiyyəsini ona yetirməyi nazirdən xahiş etdi.

Cənab Vizer bildirdi ki, onun başçılıq etdiyi Federasiya yaşlılar arasında Avropa çempionatının Bakıda keçirilməsi barədə Azərbaycan tərəfinin təklifinə baxacaqdır. O xatırlatdı ki, bu yarışlar artıq 2005-ci ildən açıq çempionat statusu alacaqdır.