Bakı, 18 may, AZƏRTAC

Bakıdakı Rus evində “Mədəniyyət və incəsənət söhbətləri” layihəsi çərçivəsində Qriqori Qaqarinin əsərlərinin reproduksiyası sərgisi keçirilib və bu rəssama həsr olunmuş mühazirə oxunub.

Tədbir rəssamın anadan olmasının ildönümünə həsr edilib və onun Qafqazın təsviri sənətinə və mədəni irsinə verdiyi böyük töhfələri nümayiş etdirib. Mühazirəçi qismində tədqiqatçı Rüstəm Hüseynov çıxış edib.

AZƏRTAC xəbər verir ki, Rüstəm Hüseynov mühazirəsində Qriqori Qaqarinin çəkdiyi rəsmlər, onun tərcümeyi-halından ən maraqlı hadisələr və bəzi əsərlərinin taleyindən ətraflı danışıb. Mühazirədə milli geyim eskizləri və knyaz Qaqarinin iştirakçısı olduğu memarlıq abidələrinin itirilmiş interyerlərinə və tarixi hadisələrə həsr olunmuş rəsmlərə diqqət yetirilib.

Qriqori Qaqarin diplomat, zabit və istedadlı rəssam olub. O, on ildən çox Şimali və Cənubi Qafqazda, xüsusən də bir neçə il Azərbaycanda yaşayıb. Rəssam XIX əsrin ortalarının memarlığının, təbiətinin və həyat tərzinin eskizlərini çəkib. Onun təsvir olunan personajların xarakterini, statusunu, milli geyimlərini, məişət təfərrüatlarını dəqiq çatdıran “Dağlıların növləri” silsiləsi xüsusilə maraqlıdır.

Qriqori Qaqarinin əsərləri bədii dəyəri ilə yanaşı, bu gün tarixçilər, bərpaçılar və antropoloqlar üçün çox mühüm tarixi mənbədir. Onun milli geyim eskizləri tarixi geyim tədqiqatçıları və yenidən tərtibatla məşğul olan mütəxəssislər üçün xüsusi əhəmiyyət kəsb edir.

Qaqarinin yaratdığı Azərbaycanın müxtəlif bölgələrinin milli geyimlərinin eskizləri tamaşaçıların böyük marağına səbəb olub. Tədbirin qonaqları, həmçinin mühazirəçiyə əlavə suallar vermək imkanı əldə ediblər.

Tədbir başa çatdıqdan sonra AZƏRTAC-ın müxbiri Rüstəm Hüseynovla söhbət edib.

Tədqiqatçının sözlərinə görə, Qriqori Qaqarin müasirlərinin bir çoxundan fərqli olaraq, öz yaradıcılığını təkcə görkəmli şəxsiyyətlərin portretləri və ya mənzərələri ilə məhdudlaşdırmayıb. “Onun əsərləri həm kişi, həm də qadın geyimlərinin ən xırda detallarına diqqət yetirməklə, istər milli geyimlər, istərsə də bölgələrə görə rəngləri ilə diqqəti çəkir. Fotoqrafik detallara əlavə olaraq, onlar kostyumların rənglərini çatdırır və tablolarda parçanın strukturu görünür. Bu, onun yaradıcılığını o dövrün məişət və mədəniyyəti haqqında unikal məlumat mənbəyinə çevirir”, - deyə tədqiqatçı vurğulayıb.

Rüstəm Hüseynov rəssamın əsərlərinin əhəmiyyətini qeyd edib: “Qaqarinin özü də dövrünə görə çox güclü rəssamdır və çəkdiyi rəsmlərin tarixi əhəmiyyəti böyükdür. Bu, ilk növbədə, etnoqrafiya və etnologiya kimi sahələr üçün vacibdir. Onun əsərləri tarixçilər üçün əvəzsiz materialdır”.