Avqustun 24-də Bakı İdman-Konsert Kompleksində yeniyetmələr arasında cüdo üzrə Avropa çempionatı başa çatmışdır. Çempionatda qitənin 30 ölkəsindən – Avstriya, Azərbaycan, Almaniya, Belçika, Bosniya və Herseqovina, Belarus, Xorvatiya, Serbiya və Çernoqoriya, Çexiya, İspaniya, Estoniya, Finlandiya, Fransa, Yunanıstan, Böyük Britaniya, Gürcüstan, Macarıstan, İsrail, İtaliya, Latviya, Moldova, Hollandiya, Polşa, Portuqaliya, Rumıniya, Rusiya, Sloveniya, Slovakiya, Türkiyə və Ukraynadan 386 idmançı iştirak etmişdir.

Avqustun 23-də, yarışların birinci günü 50 kq çəki dərəcəsində oğlanlar arasında qızıl medalı Vaja Qvildiani (Gürcüstan), gümüş medalı Nicat Şıxəlizadə (Azərbaycan), bürünc mükafatı Tomaaz Kovalski (Polşa) və Gevorgiyan Gevornenko (Ukrayna) qazandılar. 55 kq çəkidə Elman Nəsibov (Azərbaycan), qalib gəldi, ikinci yeri Dan Fasie (Rumıniya), üçüncü yeri David Asumbani (Gürcüstan) və Sergiy Drevot (Ukrayna) tutdular. 60 kq çəkidə fəxri kürsünün ən yüksək pilləsinə Elşən Kərimov (Azərbaycan) qalxdı, gümüş mükafata Qurbanhacı Musayev (Rusiya), bürünc medala İştvan Ju (Macarıstan) və Aleksey Stauşi (Bolqarıstan) layiq görüldülər. 66 kq çəkidə Tariel Zintiridis (Yunanıstan) fərqləndi, ikinci yerə Seymur Rzayev (Azərbaycan), üçüncü yerə Julen Bouquillon (Fransa) və Loseb Kumlaudze (Gürcüstan) çıxdılar.

Qızlar arasında 40 kq çəkidə Anna Vasileviç (Ukrayna) çempion oldu, gümüş medalı Sonya Bode (Almaniya), bürünc medalı Mikaela Ginter (Böyük Britaniya) və Jelena Milutinoviç (Serbiya və Çernoqoriya) qazandılar. 44 kq çəki dərəcəsində birinci yerə Burçu Gökəz (Türkiyə), ikinci yerə Rebekka Kinq (Almaniya), üçüncü yerə Lilla Totq (Macarıstan) və Andrea Katuna (Rumıniya) çıxdılar. 48 kq çəkidə Anna Mazunina (Rusiya) fərqləndi, gümüş medala Oksana Rebenok (Ukrayna), bürünc medala Kitta Bravik (Hollandiya) və Sandrine Kastaldo (Fransa) layiq görüldülər. 52 kq çəkidə birinci yeri Jasmin Van Spankeren (Hollandiya), ikinci yeri Elodiye Puget (Fransa), üçüncü yeri Culiya Bezko (Estoniya) və Covana Rogik (Serbiya və Çernoqoriya) tutdular.

Avqustun 24-də, yarışların ikinci günü qızlar arasında aşağıdakı cüdoçular fərqləndilər: 57 kq çəkidə I yer – Ramilə Usubova (Azərbaycan), II yer – Maksine Friçer (Fransa), III yer – Laura Dana Mustetea (Rumıniya) və Joana Çesario (Portuqaliya). 63 kq çəkidə I yer – Eszer Stam (Hollandiya), II yer – Laura Aerts (Belçika), III yer – Natalya Malikova (Ukrayna) və Andrea Volf (Almaniya). 70 kq çəkidə I yer - Anett Mejaros (Macarıstan), II yer – Tatyana Savenko (Ukrayna), III yer – Loeja Qrauvels (Belçika) və Cennifer Kupers (Hollandiya). 70 kq-dan yuxarı çəkidə I yer – Abbiye Kunninqham (Böyük Britaniya), II yer – Canina Voldxauzen (Almaniya), III yer – Aleksandra Matasara (Rumıniya) və Nina Kuşarskaya (Polşa).

Oğlanlar arasında yerlər aşağıdakı qaydada bölüşdürüldü: 73 kq çəkidə I yer – Levan Peradze (Gürcüstan), II yer – Teymur Əlixanov (Azərbaycan), III yer – Aleksandru Salinçean (Rumıniya) və Gergelu Jeman (Macarıstan). 81 kq çəkidə I yer – Milan Randl (Slovakiya), II yer – Tamerlan Urtayev (Rusiya), III yer - Anar Əliyev (Azərbaycan) və Giorgi Demetraşvili (Gürcüstan). 90 kq çəkidə I yer – Gerve Fişot (Fransa), II yer – Murad İdaçev (Rusiya), III yer – Dominik Gerzer (Almaniya) və Vladimirs Osnaks (Latviya). 90 kq-dan yuxarı çəkidə I yer – Kurille Maret (Fransa), II yer – Aleks Quiniaşvili (Gürcüstan), III yer – Mehman Novruzov (Azərbaycan) və Ruslan Kozayev (Rusiya).

Çempionatın yekunlarına əsasən, Azərbaycan yığma komandası səkkiz medal – üç qızıl, üç gümüş və iki bürünc mükafat qazanaraq, ümumi hesabda birinci yeri tutmuşdur. İkinci yerə çıxan fransızlar Azərbaycandan Vətənə altı medalla – iki qızıl, iki gümüş və iki bürünc medalla döndülər. Üçüncü yerə altı medal – iki qızıl, bir gümüş və üç bürünc mükafat əldə edən Gürcüstan komandası çıxdı.

Mükafatlandırma mərasimindən sonra Azərbaycan Cüdo Federasiyasının prezidenti Füzuli Ələkbərov çempionatın bayrağını Hollandiya Cüdo Federasiyasının rəhbərinə təqdim etdi. Yeniyetmələrin növbəti Avropa çempionatı bu ölkədə keçiriləcəkdir.