Xüsusi dadı, tamı və ətri olan Ordubad limonunun biri 5-15 manata satılır
Ordubad, 9 yanvar, AZƏRTAC
“Azərbaycanın incisi” adlandırılan muxtar respublikanın Ordubad rayonu özünün dadlı meyvələri ilə də şöhrət qazanıb. Həmin meyvələr arasında xüsusi fərqlənən Ordubad limonu insanları dadı, tamı və xoş ətri ilə cəlb edir. Onu fərqləndirən əsas cəhətlərdən biri də tərkibinin efir yağları, vitaminlərlə, minerallarla zəngin olmasıdır. El arasında deyirlər ki, buna səbəb Naxçıvan torpağının faydalı elementlərlə zənginliyi, suyun və havanın saflığı, təmizliyidir. Ona görə də Ordubad limonunun bir ədədi 5, bəzən isə hətta 15 manata satılır. Qədim zamanlardan əhali arasında belə bir fikir də var ki, limonu onu becərəndən başqası dərsə ağac küsür, bar vermir.
Müalicəvi əhəmiyyətə malik limon Ordubadda dibçəklərdə və istixanalarda yetişdirilir. Çünki Naxçıvanın iqlimi bu meyvənin açıq hava şəraitində yetişdirilməsinə tam imkan vermir. Buna baxmayaraq, rayon sakinləri yüksək məhsuldarlığa nail ola bilirlər. Nəticədə limonçuluq ən gəlirli sahələrdən birinə çevrilib.
Limonçuluqla məşğul olan ordubadlılar qeyd edirlər ki, yaxşı becərildikdə torpağa əkilən bir ağacdan il ərzində 220-250 ədəd limon götürmək mümkündür. Bu şərtlə ki, gərək aqrotexniki tədbirləri vaxtında həyata keçirəsən. Yəni, yaxşı məhsul götürmək üçün ağacı vaxtı-vaxtında budamaq lazımdır. Limon ağacında əsasən aşağı budaqlarda meyvə olur. Ona görə də yuxarı budaqları vaxtında budamaq məhsuldarlığı artırır. Bundan başqa, istixanada temperaturu düzgün tənzimləmək də çox əhəmiyyətlidir. Xüsusilə də axşam saatlarında buna ciddi diqqət yetirilməlidir. Bu vaxtlar temperatur 15-18 dərəcə olmalıdır.
Ordubad limonunun vaxtlı-vaxtında suvarılması da məhsuldarlıqda öz rolunu oynayır. Belə ki, yay aylarından fərqli olaraq, qış aylarında bu bitki çox su istəmir. Həftədə bir dəfə suvarmaq kifayətdir. Əgər düzgün qulluq edilərsə, ağacdan il boyu meyvə götürmək olar. Limon ağacı, əsasən, ilin bütün fəsillərində çiçəkləyir. Bir ağacda həm göy limon, həm də yetişmiş limon görmək mümkündür.
Qeyd edək ki, bu gün “2012-2015-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Proqramı”nın uğurla icrası və “2016-2020-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Proqramı”ndan irəli gələn vəzifələrin yerinə yetirilməsi istiqamətində görülən işlər bu sahədə uğurların əldə edilməsinə şərait yaradır. Buna görə də bu gün Ordubad şəhərində, Aza, Vənənd, Aşağı Əndəmic kəndlərində və digər yaşayış məntəqələrində bu sahə ilə məşğul olanların sayı ötən illərdə daha da artıb. Təbii ki, bu, məhsul istehsalının artımına müsbət təsirini göstərib. İstehsal olunan məhsul paytaxt Bakı şəhərində də özünə xeyli alıcı toplayıb.
AZƏRTAC-ın Naxçıvan Muxtar Respublikasındakı bürosu
Bölmənin digər xəbərləri
