REGİONLAR


Gənclər Günü Qarabağ bölgəsində müxtəlif tədbirlərlə qeyd edilib

Tərtər, 2 fevral, AZƏRTAC 

Respublikamızın hər yerində olduğu kimi, Qarabağ bölgəsində də 2 Fevral - Gənclər Günü müxtəlif tədbirlərlə qeyd edilib.

AZƏRTAC xəbər verir ki, Tərtər rayonunda keçirilən tədbirin iştirakçıları əvvəlcə müstəqil Azərbaycanın memarı və qurucusu, ulu öndər Heydər Əliyevin şəhərin mərkəzi meydanındakı abidəsini ziyarət edərək, önünə gül dəstələri qoyub, məktəblilərin əl işlərindən ibarət sərgi ilə tanış olublar.

Mədəniyyət Mərkəzində keçirilən tədbirdə rayon icra hakimiyyətinin başçısı Müstəqim Məmmədov, Gənclər və İdman İdarəsinin rəisi Emin Pənahov və başqaları çıxış edərək gəncləri bayram münasibətilə təbrik edib, gənclərin ölkənin ictimai-siyasi həyatındakı rolundan, mədəniyyət, təhsil, idman və digər sahələrdə əldə etdikləri uğurlardan danışıblar.

Çıxışlarda Tərtər şəhərində Gənclər Mərkəzinin, Uşaq-Gənclər Şahmat Məktəbinin, süni örtüklü idman meydançalarının tikilib istifadəyə verilməsi, əhalinin asudə vaxtının səmərəli təşkili üçün parklar və istirahət guşələrinin yaradılması gənclərə olan qayğının bariz nümunəsi kimi qiymətləndirilib.

Sonra rayonun ictimai-siyasi həyatında fəal iştirak edən gənclərə fəxri fərman və qiymətli hədiyyələr verilib.

Tədbir konsert proqramı ilə davam etdirilib.

X X X

Xocavənd rayonunun gəncləri bayram tədbirini müvəqqəti məskunlaşdıqları Beyləqan rayonu ərazisindəki Xocavənd qəsəbəsində qeyd ediblər.

Tədbirdə rayonun ictimai həyatında, mədəni-kütləvi tədbirlərdə fəal iştirak edən, idmanda, müsabiqə və intellektual oyunlarda uğur qazanan gənclər, həmçinin gənc müəllimlər və ictimaiyyət nümayəndələri iştirak ediblər.

Xocavənd Rayon İcra Hakimiyyəti başçısının müavini Əfsanə Quliyeva, Gənclər və İdman İdarəsinin rəisi Aslan Quliyev və başqaları gəncləri əlamətdar gün münasibətilə təbrik edib, onlara Vətənə layiqli vətəndaş olmağı arzulayıblar.

Çıxışlarda ölkəmizdə gənclərə göstərilən diqqət və qayğıdan, ulu öndər Heydər Əliyev tərəfindən əsası qoyulan və bu gün Prezident İlham Əliyevin uğurla davam etdirdiyi dövlət gənclər siyasətindən, gənclərin hərtərəfli inkişafı üçün yaradılan şəraitdən bəhs edilib.

Tədbirdə bir qrup fəal gəncə fəxri fərman və hədiyyələr verilib.

X X X

2 Fevral – Gənclər Günü laçınlı məcburi köçkünlərin məskunlaşdığı Ağcabədi rayonu ərazisindəki Taxtakörpü qəsəbəsində də qeyd olunub.

Laçınlı gənclər əvvəlcə ümummilli lider Heydər Əliyevin qəsəbədəki büstünü ziyarət edib, önünə gül dəstələri düzüblər.

Rayon Gənclər və İdman İdarəsinin rəisi Natiq Mustafayev çıxış edərək, ölkəmizdə həyata keçirilən gənclər siyasətindən, bu sahədə əldə olunan nailiyyətlərdən söhbət açıb. Bildirilib ki, ümummilli lider Heydər Əliyevin ikinci dəfə siyasi hakimiyyətə qayıdışından sonra Azərbaycanda bütün sahələrdə olduğu kimi, gənclərlə iş sahəsində də əsaslı dönüş yarandı, dövlət gənclər siyasəti həyata keçirilməyə başlandı. Bu gün həmin siyasət Prezident İlham Əliyevin rəhbərliyi ilə keyfiyyətcə yeni mərhələdə davam etdirilir.

Laçınlı gənclər dövlət gənclər siyasətinin icrası istiqamətində görülən işlərdən məmnun qaldıqlarını bildirərək, gənc nəslə göstərilən diqqət və qayğıya görə dövlətimizin başçısına minnətdarlıqlarını ifadə ediblər.

Tədbirdə həqiqi hərbi xidmətdən yenicə qayıtmış, həmçinin rayonun ictimai-mədəni həyatında fəallıq göstərən və idman sahəsində yüksək nailiyyətlər qazanmış bir qrup gəncə fəxri fərman və qiymətli hədiyyələr verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.