REGİONLAR


Qarabağ bölgəsində Novruz şənlikləri keçirilir

Ağdam, 18 mart, Tahir Ağaməmmədov, AZƏRTAC

Xalqımızın qədim ənənələrini özündə yaşadan Novruz bayramı Qarabağ bölgəsində böyük sevinc hissi ilə qeyd olunur, müxtəlif el şənlikləri keçirilir.

AZƏRTAC xəbər verir ki, ağdamlılar Novruzun gəlişini Quzanlı qəsəbəsinin mərkəzi meydanında qeyd ediblər. Ümumrayon şənliyində Dədə Qorqud və Bahar qız ağdamlıları Novruz bayramı münasibətilə təbrik edib. Rayon gəncləri tonqalın ətrafında dövrə vurub yallı gediblər. Kosanın və Keçəlin məzhəkələri, idmançıların çıxışları marağa səbəb olub. İştirakçılar xalqımızın əsrlər boyu qoruyub saxladığı milli-mənəvi dəyərləri ifadə edən səhnələrə, milli mətbəximizin, xalq yaradıcılığının gözəl nümunələrinə tamaşa ediblər. Müxtəlif milli oyunlar, Tarix-Diyarşünaslıq Muzeyinin eksponatları, qədim məişət əşyaları, kitab və rəsm sərgiləri nümayiş etdirilib.

Bayram şənliyində çıxış edən rayon icra hakimiyyətinin başçısı Raqub Məmmədov ağdamlıları baharın gəlişi münasibətilə təbrik edib, onlara cansağlığı, xoşbəxtlik və əmin-amanlıq arzulayıb.

Bayramsayağı bəzədilmiş meydanda bədii özfəaliyyət kollektivlərinin və Ağdam Dövlət Dram Teatrının təqdim etdiyi rəngarəng ədəbi-bədii musiqili proqramlar tamaşaçılara xoş ovqat bəxş edib.

X X X

Xocavəndli məcburi köçkünlər 25 ildir ki, baharın gəlişini doğma yurdlarından kənarda - müvəqqəti məskunlaşdıqları Beyləqan rayonu ərazisindəki qəsəbələrdə qarşılayırlar. Xocavəndlilər köçkünlük həyatına, çətinliklərə baxmayaraq, xalqımızın Novruz bayramı ilə bağlı qədim ənənələrini yaşadır, yeni nəslə ötürürlər.

Xocavənd qəsəbəsində bayramsayağı bəzədilmiş Bayraq Meydanında xonça və səmənilər düzülüb, Novruz atributları, misgərlik əşyaları, milli xörəklər, şirniyyatlar nümayiş etdirilib. Xocavəndli qız-gəlinlər xalça toxuyur, cəhrə əyirir, yun darayır, Kosa və Keçəlin şən zarafatları əsl bayram ovqatı yaradırdı. Xalq rəqslərini məharətlə ifa edən milli geyimli oğlan və qızların çıxışları, muğam və aşıq mahnıları bayram ab-havasına xüsusi rəng qatırdı.

Bayraq Meydanında Novruz tonqalı yandırılıb, incəsənət ustalarının ifa etdikləri rəngarəng musiqi nömrələri məcburi köçkünlərə əsl bayram əhval-ruhiyyəsi yaşadıb.

X X X

Elimizin ən gözəl bayramı olan Novruz qədim Nüşabə yurdu olan Bərdədə özünəməxsus şəkildə qeyd edilir.

Bərdə şəhərinin bayramsayağı bəzədilmiş mərkəzi meydanında alaçıqlar qurulub, xonçalar və səmənilər düzülüb, rayonun ümumtəhsil və musiqi məktəblərinin kollektivlərinin hazırladıqları sərgilər, Novruz adətləri, xalq tətbiqi sənəti nümunələri, milli xörəklər, şirniyyatlar nümayiş etdirilib. Tonqallar qalanıb, gənc idmançıların və kəndirbazın çıxışları maraqla qarşılanıb. Gənclər dirə-döymə oynayıb, uşaqlar yumurta döyüşdürüblər.

Minlərlə sakinin iştirak etdiyi tədbirdə rayon icra hakimiyyətinin başçısı Vidadi İsayev çıxış edərək, bərdəliləri bayram münasibətilə təbrik edib, onlara cansağlığı, xoşbəxtlik və bol ruzi, bərəkət arzulayıb.

Tədbirdə rayonun ictimai-siyasi və mədəni həyatında fəallıq göstərən şəxslərə fəxri fərman və hədiyyələr təqdim olunub.

Kosa və Keçəlin zarafatları, rayonun bədii özfəaliyyət kollektivlərinin ifasında rəngarəng konsert proqramı tədbir iştirakçılarına yüksək əhval-ruhiyyə bəxş edib.

X X X

Ağcabədi şəhərinin mərkəzi stadionunda təşkil olunan Novruz şənliyində minlərlə sakin iştirak edib.

Rayon icra hakimiyyətinin başçısı Şahin Məmmədov ağcabədililəri bayram münasibətilə təbrik edib, onlara cansağlığı, ruzi-bərəkət və firavanlıq arzulayıb.

Bayram tədbirində rəsm, əl işləri sərgisi keçirilib. Təqdim olunan şən və rəngarəng konsert proqramı tamaşaçılarda xoş ovqat yaradıb. Bayram şənliyində tonqallar alovlanıb, milli adət-ənənələrimiz, folklorumuz nümayiş etdirilib.

Bayramın əsas personajlarından olan Kosa və Keçəlin məzhəkələri, Dədə Qorqudun və Bahar qızın çıxışları yaddaqalan olub. Meydana milli paltar geymiş atlılar daxil olub, məharətlərini nümayiş etdiriblər. Gənc idmançıların çıxışları, uşaqların ifasında milli və dünya xalqlarının rəqsləri maraqla qarşılanıb.

Tədbirdə milli atçılıq oyun növü olan “Çövkən” yarışı keçirilib, qalib komandaya kubok və hədiyyələr verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.