Mingəçevir, 28 may, Şahnəzər Bəşirov, AZƏRTAC

Azərbaycan Xalq Cümhuriyyətinin yaradılması xalqımızın həyatına böyük tarixi hadisə kimi daxil olub. İlk dəfə qadınlara seçki hüququ verilib, milli ordu, milli pul, milli bank yaradılıb, beynəlxalq ictimaiyyət tərəfindən Azərbaycanın müstəqilliyi rəsmən tanınıb.

AZƏRTAC xəbər verir ki, bu fikirlər Mingəçevir Turizm Kollecində Azərbaycan Xalq Cümhuriyyətinin yaranmasının 99-cu ildönümü münasibətilə keçirilən ”Azərbaycan Xalq Cümhuriyyəti Şərqdə yaranan ilk demokratik respublikadır” mövzusunda elmi-nəzəri konfransda səsləndirilib.

Tədbirdə Mingəçevir Turizm Kollecinin direktoru, professor Əyyub Əyyubov çıxış edərək XX əsrin tarixə təkcə elm və texnika əsri kimi deyil, həm də milli dirçəliş, imperiyaların dağılması, milli dövlətlərin yaranması əsri kimi düşdüyünü qeyd edib. Bildirib ki, 1918-ci il mayın 28-də yaradılan Azərbaycan Xalq Cümhuriyyəti qısa fəaliyyəti dövründə böyük nailiyyətlər əldə edib. Təəssüflər olsun ki, demokratik respublika cəmi iki il yaşadı. Tarix göstərir ki, müstəqilliyi qoruyub saxlamaq onu əldə etməkdən daha çətindir. Diqqətə çatdırılıb ki, XX əsrin 90-cı illərinin əvvəllərində - müstəqilliyimizin bərpasının ilk illərində ölkəmiz faktiki olaraq müstəqil dövlət kimi fəaliyyət göstərə bilməyib. Xalqın təkidli tələbi ilə ulu öndər Heydər Əliyevin respublika rəhbərliyinə gəlməsi nəticəsində Azərbaycan bu bəlalardan qurtulub və 1993-cü ildən başlayaraq öz inkişaf dövrünə qədəm qoyub.

Konfransda “Azərbaycan Xalq Cümhuriyyətinin elan edilməsi və İstiqlal Bəyannaməsinin qəbulu”, “1917-1918-ci illərdə AXC-nin xarici siyasəti və erməni təcavüzünə qarşı mübarizəsi”, “AXC-nin süqut etmə səbəbləri”, “28 May Respublika Günü Azərbaycanın milli bayramıdır”, “28 May şərəf tariximizdir”, ”Müstəqil Azərbaycan Respublikası AXC-nin varisidir” mövzularında məruzələr dinlənilib. Çıxış edənlər 1918-ci il mayın 28-də qazanılan müstəqilliyin tarixi əhəmiyyətindən danışıblar. Vurğulanıb ki, XX əsrin sonunda yenidən müstəqilliyinə qovuşan Azərbaycan öz suverenliyini qoruyub saxlamağı bacarıb. Ümummilli lider Heydər Əliyev Azərbaycan dövlətçiliyinin qorunması üçün qətiyyətli tədbirlər görüb, ölkədə davamlı ictimai-siyasi sabitliyi bərqərar edib. Ulu Öndərin şah əsəri olan müasir müstəqil Azərbaycan dövləti sürətli inkişaf yoluna qədəm qoyub.

Sonra kollecin yaradıcı tələbələri tərəfindən hazırlanan ədəbi-bədii kompozisiya nümayiş olunub.

Respublika Günü münasibətilə kollecdə keçirilən inşa yazı və rəsm müsabiqələrinin qaliblərinə diplomlar təqdim edilib.