Bakı, 10 mart, AZƏRTAC

Azərbaycan Dövlət Gənc Tamaşaçılar Teatrında Azərbaycan Milli Teatrının 144 illiyi münasibətilə tədbir keçirilib.

AZƏRTAC xəbər verir ki, əvvəlcə iştirakçılar sənət ocağının foyesində teatrın quruluşçu rəssamı Elşən Sərxanoğlunun teatr tamaşalarına çəkdiyi eskizlərdən ibarət “Pərdənin o üzü” adlı fərdi yaradıcılıq sərgisinə baxıblar.

Tədbirdə teatrın direktoru, Əməkdar Artist Mübariz Həmidov 1873-cü il martın 10-da Bakı realnı məktəbinin teatr həvəskarları truppası tərəfindən təməli qoyulan Azərbaycan Milli Teatrının yaranma tarixi haqqında ətraflı məlumat verib.

Bildirilib ki, Azərbaycan teatrı keşməkeşli ömür sürərək zamanın mühakiməsindən üzüağ çıxıb. Məhz bunun nəticəsidir ki, bu gün Azərbaycan teatrı dünyanın aparıcı beynəlxalq festivallarında uğurla təmsil olunur.

Milli Teatr günü münasibətilə silsilə tədbirlərin keçirildiyini söyləyən Mübariz Həmidov ölkəmizdə sənət adamlarına, teatr xadimlərinə göstərilən diqqət və qayğıdan söz açıb.

Bildirib ki, Prezident İlham Əliyev martın 9-da teatr xadimlərinə fəxri adların verilməsi haqqında Sərəncam imzalayıb. Sərəncama əsasən, Azərbaycan teatrının inkişafındakı xidmətlərinə görə 12 nəfər “Əməkdar Artist”, 2 nəfər isə “Əməkdar Mədəniyyət İşçisi” fəxri adına layiq görülüb. Bütün bunlar sənət adamlarına, aktyorlara böyük stimul verir.

Daha sonra Əməkdar İncəsənət Xadimi, sənətşünaslıq üzrə fəlsəfə doktoru Ziyadxan Əliyev, dramaturq Əli Əmirli və teatrın baş rejissoru, Əməkdar İncəsənət Xadimi Bəhram Osmanov çıxış edərək əlamətdar gün münasibətilə bütün teatrsevərləri təbrik ediblər.

Milli Teatr günü ilə bağlı fikirlərini bölüşən natiqlər teatrın rəssamsız təsəvvür etməyin mümkünsüzlüyünü söyləyiblər. Vurğulanıb ki, tamaşaların sevilməsində rəssamların da üzərinə böyük məsuliyyət düşür. Bu mənada Elşən Sərxanoğlunun gördüyü işlər təqdirəlayiqdir.

Vurğulanıb ki, milli olduğu qədər də müasir rəssam olan E.Sərxanoğlunun öz dəstxətti var. Onun tərtibatları hər zaman tamaşaçıların zövqünü oxşayır.

Sonra rəssam sərginin təşkilatçılarına və iştirakçılarına minnətdarlığını bildirib.

Çıxışlardan sonra Mirzə Fətəli Axundzadənin “Sərgüzəşti-vəziri-xani Lənkəran” komediyası əsasında hazırlanmış eyniadlı tamaşa nümayiş etdirilib. Quruluşçu rejissoru Xalq Artisti Cənnət Səlimova olan səhnə əsərinin musiqi tərtibatı Xalq Artisti Cavanşir Cəfərova, rəqslərin quruluşu Zakir və Leyla Ağayevlərə məxsusdur.

Tamaşada rolları Əməkdar artistlər Lətifə Əliyeva, Gülər Nəbiyeva, Nofəl Vəliyev, Şövqi Hüseynov, aktyorlar Şəbnəm Hüseynova, Zülfiyyə Alhüseynova, Aydın Dəmirov və başqaları ifa ediblər.

Tamaşanı 215 nömrəli tam orta məktəbin və F.Köçərli adına Respublika uşaq kitabxanasının oxucuları olan bir neçə orta təhsil müəssisəsinin şagird və müəllim heyəti izləyib.

Tamaşadan sonra məktəblilər aktyorlara suallar ünvanlayıblar.

Qeyd edək ki, 10 mart - Milli Teatr Günü ilə əlaqədar teatrın quruluşçu rejissoru, Xalq Artisti, Prezident təqaüdçüsü Vaqif Əsədov “Teatr sənəti sahəsində uzunmüddətli və səmərəli fəaliyyətinə görə” Mədəniyyət və Turizm Nazirliyinin Fəxri fərmanı, teatrın gənc və istedadlı aktyoru Elnur Hüseynov isə “Fəxri Mədəniyyət İşçisi” döş nişanı ilə təltif ediliblər.

Bundan başqa, Dövlət Gənc Tamaşaçılar Teatrının istedadlı aktyorları, Xalq artistləri Yasin Qarayev, Ağaxan Salmanlı və aktrisa Sona Babayeva “Uzun illər milli teatrın inkişafında əvəzsiz xidmətlərinə, kollektivin ictimai həyatında fəal iştiraklarına və yubileyləri münasibətilə” Azərbaycan Mədəniyyət İşçiləri Həmkarlar İttifaqı Respublika Komitəsinin Fəxri fərmanı ilə təltif olunublar.

Teatrın istedadlı aktrisası Dilarə Fərəcullayevaya isə Azərbaycan Teatr Xadimləri İttifaqının Fəxri diplomu verilib.