Bakı, 17 oktyabr, P.İmanova, AZƏRTAC

Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) bu qurumun və AMEA-nın akademik A.Qarayev adına Fiziologiya İnstitutunun birgə təşkilatçılığı ilə görkəmli fizioloq-alim və elm təşkilatçısı, Əməkdar Elm Xadimi, akademik Hüseyn Həsənovun xatirəsinə həsr edilən “Akademik Hüseyn Həsənov” kitabının təqdimatı olub.

AZƏRTAC xəbər verir ki, tədbirdə, həmçinin “A.Qarayev adına Fiziologiya İnstitutunun və Azərbaycan Fizioloqlar Cəmiyyətinin elmi əsərlərinin külliyyatı” təqdim edilib.

Tədbirdə MEK-in direktoru Leyla İmanova elm aləmində xidmətləri ilə seçilən, Azərbaycan zəkasını dünya səviyyəsinə çıxaran alimlərin daim hörmətlə anıldıqlarını və adı fəxrlə çəkilən akademik Hüseyn Həsənovun da ehtiramla yad olunduğunu, işıqlı bir insan kimi hafizələrdə yaşadığını bildirib. Belə insanların elmi nəticələrini Azərbaycanın zəngin irsi adlandıran MEK-in direktoru kitabxananın həyata keçirdiyi Milli Rəqəmsal Yaddaş (MRY) layihəsi çərçivəsində alimin dəyərli əsərlərinin elektronlaşdırılmasından və zəngin irsinin gələcəyə ötürülməsi üçün yaradılan vahid etibarlı bazadan söhbət açıb. L.İmanova akademik H.Həsənovun xatirəsinə həsr edilən “AMEA Fiziologiya İnstitutunun əsərlərinin külliyyatı” nəşrinin çap və elektron formatda kitabxanaya təqdim olunmasını bu qəbildən olan işlərin davamı adlandırıb.

Fiziologiya İnstitutunun direktoru, professor Ulduz Haşımova “Akademik Hüseyn Həsənov” kitabı və görkəmli alimin elmi fəaliyyəti barədə məlumat verib. “A.Qarayev adına Fiziologiya İnstitutunun və Azərbaycan Fizioloqlar Cəmiyyətinin elmi əsərlərinin külliyyatı”nın da görkəmli akademikin xatirəsinə həsr olunduğu diqqətə çatdırılıb.

Bildirilib ki, akademik H.Həsənov fiziologiya sahəsində respublika üçün yüksək ixtisaslı kadrların hazırlanması işinə böyük töhfələr verib. Kitabda Azərbaycanda fiziologiya elminin inkişafında xüsusi xidmətləri olan, elmin bu sahəsi üzrə ölkəmizi dünya konqreslərində layiqincə təmsil etmiş akademik Hüseyn Həsənovun həyat yolundan, elmi fəaliyyətindən ətraflı söz açılır.

Sonra AMEA-nın müxbir üzvü Rafiq Qasımov görkəmli alimin həyatı və zəngin elmi fəaliyyəti barədə məruzə ilə çıxış edib. H.Həsənovun yüksək insani keyfiyyətlərindən söz açan R.Qasımov onu səmimi insan, gözəl ailə başçısı, istedadlı alim və bacarıqlı elm təşkilatçısı kimi xarakterizə edib. Vurğulanıb ki, mərkəzi sinir sisteminin fiziologiyasının öyrənilməsində, fiziologiyanın tədqiqi üçün laboratoriyaların açılmasında böyük əmək sərf etmiş alimin əsərləri bir sıra xarici ölkələrdə çap olunaraq dünya elmi ictimaiyyətinin diqqətinə çatdırılıb, H.Həsənovun səyi nəticəsində SSRİ fizioloqlarının qurultayı Azərbaycanda keçirilib.

R.Qasımov uşaqlıq və tələbəlik dostu, görkəmli akademik H.Həsənovla bağlı xatirələrini bölüşüb.

Akademik Məmməd Salmanov və digər çıxış edənlər tanınmış alim və ictimai xadim, akademik H.Həsənovun elmə, təhsilə verdiyi töhfələrdən, Azərbaycan fiziologiya elminin inkişafında əvəzsiz xidmətlərindən söz açıblar. Qeyd edilib ki, H.Həsənov Azərbaycan fiziologiya elminin inkişafında böyük xidmətləri olan, çətin və şərəfli ömür yolu keçmiş alim, bacarıqlı elm təşkilatçısı idi. Ölkəmizdə fiziologiya sahəsində nailiyyətlərin qazanılmasında əvəzsiz rol oynayan, qısa ömründə çox işlər görən görkəmli akademikin yetirmələri hazırda onun işini müvəffəqiyyətlə davam etdirirlər.

Tədbirdə “Akademik Hüseyn Həsənov” kitabı barədə videoçarx göstərilib. Qeyd olunub ki, akademikin həyat yoldaşı Arifə Həsənovanın istəyi ilə hazırlanan kitab alimin xatirəsinə həsr olunub. Jurnalist Şəlalə Məhyəddinqızının qələmə aldığı kitabda alimi yaxından tanıyan iş yoldaşlarının, yaxın dostları olmuş fizioloq həmkarlarının, aspirantlarının xatirələri toplanıb. Nəşrdə, həmçinin alimin beynəlxalq konfranslarda iştirakı, mükafatları, arxivində olan sənədlər və fotolar əksini tapıb. Kitabda yer almış fotolarda fiziologiyanın inkişafından soraq verən tarixi sənədlər oxuculara təqdim olunur.