DÜNYA
“Xiaomi” şirkəti “Redmi 5A” smartfonunu təqdim edib
Bakı, 17 oktyabr, AZƏRTAC
Çinin “Xiaomi” elektronika istehsalçısı yeni “Redmi 5A” smartfonunu təqdim edib. Qurğu teksturası metalı xatırladan plastik korpusa malikdir.
AZƏRTAC “dailycomm.ru” saytına istinadən xəbər verir ki, aparat 1,4 QHs takt tezlikli dördnüvəli “Qualcomm Snapdragon 425” prosessoru, 500 MHs tezlikli “Adreno 308” qrafik sürətləndiricisi, 2 giqabaytlıq əməli və 16 giqabaytlıq daxili yaddaşla təchiz edilib. Cihaz, həmçinin 1280x720 piksel təsvir ölçülü 5 düymlük ekrana malikdir.
128 giqabayt tutumunda çıxarılıb taxılan “microSD” daşıyıcıları üçün konnektor nəzərdə tutulub. 13 meqapiksellik təsvir ölçüsünə malik əsas kamera “Full HD” formatında video yazmaq imkanına malikdir. Selfi və videozənglər üçün 5 meqapiksellik ön kamera nəzərdə tutulub.
Bundan başqa, aparat SİM-kartlar üçün iki slot, “LTE” dəstəyi, infraqırmızı datçik, 3000 milliamper/saat tutumunda batareyaya malikdir və “Android 7.1” mobil əməliyyat sisteminin idarəetməsi altında işləyir.
Qurğunun ölçüləri 140,4 x 70,1 x 8,35 millimetr, çəkisi 137 qram təşkil edir.
“Xiaomi Redmi 5A” modelinin qiyməti təxminən 90 dollardır.