Ağdam, 18 oktyabr, Tahir Ağaməmmədov, AZƏRTAC

Bu ilin doqquz ayında Ağdam rayonu üzrə ümumi məhsul istehsalının həcmi 99,4 milyon manat olub. Bu, ötən ilin eyni dövrü ilə müqayisədə 887 min manat və ya 0,9 faiz çoxdur. Hesabat dövründə 9,2 milyon manatlıq sənaye, 75,4 milyon manatlıq kənd təsərrüfatı məhsulları istehsal edilib, 3,6 milyon manatlıq tikinti-quraşdırma işləri aparılıb.

AZƏRTAC xəbər verir ki, bu faktlar Ağdam rayonunun Quzanlı qəsəbəsində 2017-ci ilin doqquz ayının sosial-iqtisadi inkişafının yekunlarına həsr olunmuş yığıncaqda səsləndirilib.

Yığıncaqda ilin doqquz ayının yekunları təhlil edilib, qarşıda duran vəzifələrdən danışılıb. Bildirilib ki, əvvəlki illərdə olduğu kimi, cari ildə də rayonda tikinti-quruculuq işləri davam etdirilib. Bu dövrdə Quzanlı qəsəbəsində xalçaçılıq müəssisəsinin tikintisi başa çatdırılıb. Hazırda Quzanlı qəsəbəsində muğam mərkəzinin və 360 şagird yerlik tam orta məktəbin, Bənövşələr kəndində tam orta məktəbin tikintisi davam etdirilir. Uzunluğu 25,3 kilometr olan Quzanlı-İmamqulubəyli-Orta Qərvənd-Xındırıstan avtomobil yolu yenidən qurulur. Prezident İlham Əliyevin “Ağdam rayonunun sosial-iqtisadi inkişafının sürətləndirilməsinə dair əlavə tədbirlər haqqında” Sərəncamına əsasən, 20 məcburi köçkün ailəsi üçün inşa edilən fərdi yaşayış evlərində son tamamlama işləri aparılır.

Aqrar sahədə görülən işlərdən danışılarkən diqqətə çatdırılıb ki, 2017-ci ildə 9970 hektar taxıl sahəsindən 36 min 196 ton məhsul tədarük olunub. 3724 hektarda tərəvəz, 348 hektarda kartof, 1067 hektarda yonca, 1002 hektarda şəkər çuğunduru, 3005 hektarda pambıq becərilib. Rayonun kümçüləri 300 qutu ipəkqurdu bəsləyib, 13 min 205 kiloqram barama istehsal ediblər. Rayonda heyvandarlığın, xüsusilə cins mal-qaranın inkişaf etdirilməsi məqsədilə 1670 baş heyvan süni yolla mayalandırılıb, 596 baş sağlam bala alınıb.

Yığıncaqda əhalinin təbii qaz, elektrik enerjisi, rabitə və digər xidmətlərlə təminatının yaxşılaşdırılması, təhsil, mədəniyyət, səhiyyə və sair sahələrdə görülən işlərdən də ətraflı bəhs edilib, mövcud problemlərlə toxunulub, onların həlli yollarından və qarşıda duran vəzifələrdən danışılıb.