REGİONLAR
Dövlət müstəqilliyinin 26-cı ildönümü Qarabağ bölgəsində təntənə ilə qeyd edilib
Ağdam, 18 oktyabr, Tahir Ağaməmmədov, AZƏRTAC
Azərbaycanın dövlət müstəqilliyinin 26-cı ildönümü respublikamızın hər yerində olduğu kimi, Qarabağ bölgəsində də təntənəli şəkildə qeyd edilib.
AZƏRTAC xəbər verir ki, Ağdam rayon ictimaiyyəti ulu öndər Heydər Əliyevin Quzanlı qəsəbəsindəki abidəsi önünə tər gül-çiçək dəstələri düzüb, dahi rəhbərin xatirəsinə hörmət və ehtiramlarını bildiriblər.
Ağdam Dövlət Dram Teatrında keçirilən tədbir Azərbaycanın Dövlət Himninin səsləndirilməsi ilə başlayıb. Respublikamızın müstəqilliyi və ərazi bütövlüyü uğrunda həlak olanların xatirəsi bir dəqiqəlik sükutla yad edilib.
Tədbirdə çıxış edənlər 26 il əvvəl dövlət müstəqilliyinin bərpasından, Azərbaycanın həmin dövrdə qarşılaşdığı çətinliklərdən, respublikamızın çətin, lakin şərəfli müstəqillik yolundan danışıblar. Çıxışlarda müstəqilliyin ilk illərində ölkədə hökm sürən özbaşınalıq, xaos və anarxiya, Ermənistanın respublikamıza qarşı apardığı qəsbkarlıq müharibəsi, torpaqlarımızın 20 faizinin işğal edilməsi, 1 milyondan artıq soydaşımızın yurd-yuvalarından didərgin düşməsi bir daha xatırlanıb. Bildirilib ki, xalqımızın və dövlətimizin belə bir çətin vaxtında – 1993-cü ildə ümummilli lider Heydər Əliyevin hakimiyyətə qayıdışı ilə Azərbaycanın müstəqilliyi qorunub saxlanılıb və möhkəmləndirilib, dövlət quruculuğu və ölkəmizin beynəlxalq aləmə inteqrasiyası sahəsində mühüm işlər görülüb.
Tədbir konsert proqramı ilə davam edib.
X X X
Dövlət müstəqilliyinin 26-cı ildönümü Bərdədə silsilə tədbirlərlə qeyd olunub. Rayonun ümumtəhsil, uşaq musiqi və incəsənət məktəblərində, muzey, mərkəz və kitabxanalarda müxtəlif tədbirlər keçirilib, Heydər Əliyev adına park bulvarda konsert proqramı təşkil olunub.
AZƏRTAC xəbər verir ki, Heydər Əliyev Mərkəzində keçirilən tədbirin iştirakçıları əvvəlcə Ulu Öndərin abidəsi önünə tər gül dəstələri düzərək, xatirəsinə ehtiramlarını bildiriblər.
Rayon icra hakimiyyəti başçısının müavini, Yeni Azərbaycan Partiyası rayon təşkilatının sədri Fəqət Şadlinskaya çıxış edərək, iştirakçıları 18 Oktyabr - Dövlət Müstəqilliyi Günü münasibətilə təbrik edib, Azərbaycanın keçdiyi müstəqillik yolundan, ötən 26 il ərzində dövlət müstəqilliyinin qorunması və möhkəmləndirilməsi üçün atılan addımlardan danışıb.
Digər çıxış edənlər müstəqilliyinin ilk illərində Azərbaycanın üzləşdiyi çətinliklər, bu çətinliklərin aradan qaldırılması, ölkəmizin inkişafı istiqamətində görülən işlərdən bəhs ediblər.
Sonda şəhər 2 nömrəli uşaq musiqi məktəbinin şagirdlərinin ifasında “Müstəqilliyimiz əbədidir, sarsılmazdır, dönməzdir” adlı bədii kompozisiya nümayiş etdirilib.
X X X
18 oktyabr – Dövlət Müstəqilliyi Günü Ağcabədi rayonu ərazisində laçınlı məcburi köçkünlər üçün salınmış Taxtakörpü qəsəbəsində də qeyd edilib.
AZƏRTAC xəbər verir ki, Yeni Azərbaycan Partiyası Laçın rayon təşkilatında keçirilən tədbirdə əvvəlcə Azərbaycanın Dövlət Himni səsləndirilib.
YAP rayon təşkilatının sədri İlqar İlyasov çıxış edərək, 1990-cı illərin əvvəllərindəki ictimai-siyasi vəziyyətdən, dövlət müstəqilliyinin bərpa edilməsindən danışıb. Müstəqilliyi qoruyub saxlamağın onu qazanmaqdan qat-qat çətin olduğunu vurğulayan natiq bildirib ki, 1991-1993-cü illərdə ölkədə daxili böhran, vətəndaş itaətsizliyi, xaos hökm sürür, separatizm meyilləri yaranır, Ermənistan silahlı birləşmələri tərəfindən Qarabağda yaşayış məntəqələrimiz bir-birinin ardınca işğal edilirdi. Yalnız 1993-cü ildə ulu öndər Heydər Əliyevin hakimiyyətə qayıdışından sonra həyata keçirilən məqsədyönlü tədbirlər nəticəsində ölkəmizdə vətəndaş müharibəsinin qarşısı alınıb, siyasi sabitlik təmin olunub, iqtisadiyyat ağır böhran vəziyyətindən çıxarılaraq inkişaf yoluna qədəm qoyub, nizami ordu quruculuğunda, eləcə də respublika həyatının bütün sahələrində tərəqqi təmin edilib.
Tədbirdə “Müstəqilliyimiz xalqımızın ən böyük nailiyyətidir” adlı məruzə dinlənilib. Məruzə və çıxışlarda diqqətə çatdırılıb ki, ulu öndər Heydər Əliyevin Azərbaycanın inkişafına, qüdrətlənməsinə yönəlmiş müdrik siyasəti bu gün Prezident İlham Əliyev tərəfindən uğurla davam etdirilir, respublikamızın dövlət müstəqilliyi daha da möhkəmlənir.