Astara, 18 oktyabr, Bağır Əliyev, AZƏRTAC

Oktyabrın 18-də ölkəmizin cənub bölgəsində Dövlət Müstəqilliyi Günü təntənəli şəkildə qeyd olunub.

AZƏRTAC xəbər verir ki, Astara şəhərindəki Heydər Əliyev Mərkəzində Dövlət Müstəqilliyi Gününə həsr olunmuş “Tarixin dərinliklərindən süzülüb gəlmiş Azərbaycan” mövzusunda tədbirin iştirakçıları Mərkəzin foyesində rəsm sərgisi ilə tanış olub, sənədli filmə baxıblar.

Toplantıda çıxış edən Astara Rayon İcra Hakimiyyəti başçısının müavini, ictimai-siyasi və humanitar məsələlər şöbəsinin müdiri Yasəmən Rəsulova rayon sakinlərini Dövlət Müstəqilliyi Günü münasibətilə təbrik edərək bildirib ki, Azərbaycan xalqı özünün tarixi nailiyyəti olan dövlət müstəqilliyinin bərpasının 26-cı ildönümünü təntənə ilə bayram edir. 1991-ci il oktyabrın 18-də müstəqillik haqqında Konstitusiya Aktının qəbul edildiyini vurğulayan Y.Rəsulova 1918-ci ildə olduğu kimi, 1991-1993-cü illərdə də müstəqilliyimizin ciddi təhlükələrə məruz qaldığını diqqətə çatdırıb.

Qeyd olunub ki, çıxılmaz vəziyyətdə olan Azərbaycan xalqı nicat yolunu sınanmış lider Heydər Əliyevin yenidən siyasi hakimiyyətə qayıdışında gördü. Xalq özünün xilaskarına üz tutaraq, onu təkidlə yenidən siyasi rəhbərliyə qayıtmağa çağırdı.

Doğma xalqına qəlbən bağlı olan Ulu Öndər ömrünün qalan hissəsini də xalqına bağışladı. Ümummilli Lider 1993-cü ilin 15 iyunundan başlayaraq milli dövlətçiliyimizi tarixi düşmənlərin qəsdindən qorumaq və onu rəvan inkişaf yoluna çıxarmaq üçün nəsillərə örnək olan tarixi fəaliyyətə başladı.

Bildirildi ki, ulu öndər Heydər Əliyevin siyasi kursunu layiqincə davam etdirən Prezident İlham Əliyevin müdrik daxili və xarici siyasəti nəticəsində ölkəmiz tərəqqi yolundadır. Müstəqil Azərbaycan Respublikasının beynəlxalq nüfuzu ildən-ilə artır. Regionlarının sosial-iqtisadi inkişafına dair Dövlət proqramları bu işdə mühüm rol oynayır. Bunu Lənkəran rayonunun timsalında da görmək mümkündür.

Tədbirdə rayon icra hakimiyyətinin məsul işçisi Elşad Axundovun mövzu ilə bağlı məruzəsi dinlənilib.

Yeni Azərbaycan Partiyası Astara rayon təşkilatının sədri Firudin Əhmədov, Astara Pedaqoji Kollecinin direktoru Ağababa İbrahimov, Heydər Əliyev Mərkəzinin direktoru Kübra Səmədova, Astara Mərkəzləşdirilmiş Kitabxana Sisteminin direktoru Tural Eyvazov, rayon təhsil şöbəsinin metodiki mərkəzin direktoru Emin Fətəliyev Azərbaycanın dövlət müstəqilliyinin xalqımıza bəxş etdiyi töhfələrdən, 26 illik müstəqillik dövründə ölkəmizin daxili və xarici siyasətində qazanılmış uğurlardan söz açıblar.

X   X   X

Lənkəran şəhərindəki Heydər Əliyev Mərkəzində Azərbaycan Respublikasının dövlət müstəqilliyinin bərpasının iyirmi altıncı ildönümünə həsr olunmuş “Müstəqilliyimiz dönməz, əbədi və sarsılmazdır” mövzusunda tədbir keçirilib.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin zəngin və mənalı ömür yolunu əks etdirən eksponatlar və fotoşəkillərlə tanış olublar.

Əlamətdar gün münasibətilə tədbir iştirakçılarını təbrik edən Mərkəzin direktoru Reyhanə Sadıxova bildirib ki, ümummilli lider Heydər Əliyev müstəqil Azərbaycan dövlətçiliyinin siyasi, iqtisadi əsaslarını yaratmış, xalqın müstəqil və güclü dövlətə sahib olmaq arzusunu reallığa çevirmiş fenomen şəxsiyyət kimi tariximizdə əbədiyaşarlıq qazanıb. Bu siyasət Prezident İlham Əliyevin rəhbərliyi ilə uğurla davam etdirilir.

Lənkəran şəhər 5 nömrəli məktəbin direktor müavini Cəfər Fətullayev və Rvo kənd orta məktəbinin müəllimi Samirə Quliyeva çıxışlarında Azərbaycanın dövlət müstəqilliyinin bərpasından, ölkəmizin bugünkü inkişafından qürur hissi keçirdiklərini, müstəqil respublikamızın sabahının daha firavan olacağına əminliklərini bildiriblər.

Tədbirdə Lənkəran Şəhər Mədəniyyət Mərkəzinin bədii-qiraət dərnəyinin üzvləri Dövlət Müstəqilliyi Gününə həsr olunmuş şeirlər ifa ediblər.

X   X   X

Masallı şəhərindəki Heydər Əliyev Mərkəzində keçirilən toplantıda çıxış edən rayon icra hakimiyyəti başçısının müavini, ictimai-siyasi və humanitar şöbəsinin müdiri Aybəniz Qafarova rayon sakinlərini əlamətdar gün - Dövlət Müstəqilliyi Günü münasibətilə təbrik edib.

Xalqın illər boyu özündə yaşatdığı istiqlal ideyasını gerçəkləşdirən tarixi şəraitdən, müstəqillik uğrunda aparılan mübarizədən və bu müstəqilliyin qorunub möhkəmlənməsində ümummilli lider Heydər Əliyevin tarixi rolundan danışan A.Qafarova bildirib ki, XX əsrin sonlarında qlobal miqyasda cərəyan edən proseslər Azərbaycan üçün də yeni üfüqlər açdı, xalqımız ən yeni tarixində bir daha müstəqil və azad yaşamaq hüququ qazandı. 1991-ci il oktyabrın 18-də müstəqillik haqqında Konstitusiya Aktını qəbul edən parlament, hələ sovetlər birliyinin beynəlxalq hüququn subyekti kimi tanındığı bir vaxtda Azərbaycan Respublikasının rəsmi olaraq suveren və müstəqil dövlət olduğunu və Azərbaycan xalqının öz taleyini artıq özünün müəyyənləşdirdiyini bəyan etdi.

Qeyd olunub ki, Prezident İlham Əliyevin rəhbərliyi ilə həyata keçirilən uğurlu daxili və xarici siyasət sayəsində respublikamızın regional və qlobal miqyasda nüfuzu əhəmiyyətli dərəcədə artıb, beynəlxalq aləmdə etibarlı tərəfdaş imici qazanıb və Azərbaycan mötəbər beynəlxalq tədbirlərin, nüfuzlu idman yarışlarının keçirildiyi məkana çevrilib.

Diqqətə çatdırılıb ki, Azərbaycanın yüksək inkişafını Masallı rayonun timsalında da görmək olar. Heydər Əliyev siyasi xəttinin layiqli davamçısı Prezident İlham Əliyevin sentyabrın 3-də Masallıya növbəti səfəri zamanı əhali ilə görüşü, bir sıra obyektlərin açılışında iştirak etməsi rayon sakinləri tərəfindən böyük razılıqla qarşılanıb.

Çıxış edənlər müstəqillik yolunda Azərbaycan xalqının çoxillik mübarizə tarixindən və onun qorunmasında ümummilli lider Heydər Əliyevin müstəsna rolundan danışıblar.

X   X   X

Dövlət Müstəqilliyi Günü Cəlilabadda da qeyd olunub.

Rayon icra hakimiyyətinin başçısı Əziz Əzizov çıxışında müstəqilliyin qorunub saxlanılmasında əvəzsiz rolu olan ulu öndər Heydər Əliyevin xidmətlərini diqqətə çatdırıb. O, Ümummilli Liderin siyasi kursunun bu gün də uğurla davam etdirildiyini, Prezident İlham Əliyevin regionların sosial-iqtisadi inkişafına yüksək diqqət və qayğısı nəticəsində respublikanın hər bir guşəsində olduğu kimi, Cəlilabadda da böyük tikinti-quruculuq işlərinin həyata keçirildiyini diqqətə çatdırıb.

Toplantıda çıxış edənlər ötən əsrin 90-cı illərində dövlət müstəqilliyinin bərpa edilməsini mühüm tarixi hadisə kimi qiymətləndirib, ümummilli lider Heydər Əliyevin müstəqilliyimizin möhkəmləndirilməsində və ölkəmizin dünyaya tanıdılmasında əvəzsiz xidmətlərindən söz açıblar.

X   X   X

Lerikdə Dövlət Müstəqilliyi Gününə həsr olunmuş tədbirdə çıxış edən rayon icra hakimiyyəti başçısının birinci müavini, YAP Lerik rayon təşkilatının sədri Cəlil Baxşıyev 1990-cı illərdə ölkədə yaranmış xaos və anarxiyadan bəhs edib, xalqın təkidli tələbi ilə hakimiyyətə qayıdan Heydər Əliyevin dövlət müstəqilliyinin möhkəmləndirilməsində xidmətlərindən söz açıb.

C.Baxşıyev Ulu Öndərin demokratik, hüquqi və dünyəvi dövlət quruculuğu yolunda atdığı addımların, milli dövlətçilik ənənələrinə, beynəlxalq standartlara əsaslanan köklü hüquq islahatlarının, insan hüquq və azadlıqlarının təminatı sahəsində əldə olunan uğurların bugünkü güclü Azərbaycanın gələcək inkişafını təmin etdiyini bildirib.

Toplantıda YAP Lerik Rayon Təşkilatının Gənclər Birliyinin sədri Nüsrət Kərimovun Dövlət Müstəqilliyi Günü ilə bağlı məruzəsi dinlənilib.

YAP Lerik Rayon Təşkilatının Gənclər Birliyinin sədr müavini Cahani Nüsrətzadə, şəhər 3 nömrəli tam orta məktəbin müəllimi Şəms Cabbarova, rayon Gənclər və İdman İdarəsinin rəisi Natiq İsaqov çıxışlarında qeyd ediblər ki, keçid dövrünü başa vuran respublikamız bu gün özünün uzunmüddətli inkişaf strategiyasının istiqamətlərini müəyyən edən bir ölkədir. Azərbaycan dünya miqyasında iqtisadi artım sürətinə görə ön sıralarda gedərək islahatçı ölkə kimi tanınır.