Bakı, 19 oktyabr, AZƏRTAC

Rəqəmsal Ticarət Qovşağı Böyük İpək Yolu üzərində rəqəmsal məkanın yaradılması baxımından əhəmiyyətlidir.

AZƏRTAC xəbər verir ki, bunu oktyabrın 19-da Azərbaycan Rəqəmsal Ticarət Qovşağına dair keçirilən ilk beynəlxalq konfransda İqtisadi İslahatların Təhlili və Kommunikasiya Mərkəzinin (İİTKM) icraçı direktoru Vüsal Qasımlı deyib. Bildirib ki, bugünkü konfransda dünyanın 10 ölkəsindən 100-dək nümayəndə iştirak edir. Konfransın keçirilməsində məqsəd rəqəmsal ticarət mərkəzinin infrastrukturuna xüsusi diqqət yetirərək, transsərhəd iqtisadi əlaqələrin, elektron xidmətlərin və yeni iş imkanlarının perspektivlərini müzakirə etməkdir.

"Rəqəmsal Ticarət Qovşağı elektron ticarət və elektron kommersiya sahəsində dövlət-özəl əməkdaşlığı üçün gözəl nümunədir. Rəqəmsal Ticarət Qovşağı Böyük İpək Yolu üzərində rəqəmsal məkanın, eyni zamanda, Avropa coğrafiyasında vahid elektron məkanın yaradılması baxımından mühüm əhəmiyyət kəsb edir. Rəqəmsal Ticarət Qovşağı müsəlman dünyasında elektron iqtisadiyyatın inkişafı üçün də çox əhəmiyyətlidir. İSESKO ilə Rəqəmsal Ticarət Qovşağı arasında əməkdaşlığa dair memorandum imzalanıb. Beləliklə, bu gün həm Avropa İttifaqı, həm də Rusiya ilə imzaların qarşılıqlı tanınması, transsərhəd elektron iqtisadiyyatın inkişafı üçün imzalanmış anlaşma memorandumları Azərbaycanın rəqəmsal ticarət mövqeyini gücləndirəcək", - deyə V.Qasımlı qeyd edib.

İİTKM-in icraçı direktoru deyib: "Rəqəmsal Ticarət Qovşağı nəinki Azərbaycanda, postsovet məkanında ilk dəfə olaraq qeyri-rezidentlərə onlayn qaydada müəssisə açmaq, məsafədən onu idarə etmək imkanı verən bir modeldir. Eyni zamanda, Rəqəmsal Ticarət Qovşağı postsovet məkanında ilk dəfə olaraq imzaların qarşılıqlı tanınması istiqamətində çoxtərəfli əməkdaşlığı təbliğ edən qurum kimi səciyyələndirilə bilər. Xüsusilə qeyd etmək istəyirəm ki, Rəqəmsal Ticarət Qovşağı ilk dövlət-startap layihəsi olaraq postsovet məkanında həm Qərb yarımkürəsinin aparıcı elektron ticarət portalı olan "Amazon", həm də Şərq yarımkürəsində aparıcı elektron ticarət portalı olan "Alibaba" ilə tam inteqrasiya olunub. Bu, gələcəkdə Azərbaycan iqtisadiyyatında ixracın həcminin artması üçün çox gözəl imkanlar yaradır. Rəqəmsal Ticarət Qovşağı "Azexport" portalının bir hissəsi olaraq Azərbaycanın ixrac imkanlarının genişlənməsinə öz töhfəsini verəcək".

Prezident Administrasiyasının iqtisadi siyasət və sənaye məsələləri şöbəsinin sektor müdiri Elxan Mikayılov diqqətə çatdırıb ki, Azərbaycanda Rəqəmsal Ticarət Qovşağının yaradılması beynəlxalq ticarətə inteqrasiyanın yeni bir mərhələsidir. Belə bir qovşağın yaradılması Prezident İlham Əliyevin ölkəmizdə apardığı siyasətin məntiqi nəticəsidir. Azərbaycan, ümumiyyətlə regionda regional ticarət habına çevrilmək istiqamətində çox ciddi nailiyyətlər əldə edib. Azərbaycanın regional logistika qovşağına çevrilməsi, bu istiqamətdə atılan addımlar, xüsusilə Strateji Yol xəritələri çərçivəsində bununla bağlı ayrıca yol xəritəsinin qəbul olunması, Azərbaycanın regional ticarət habına çevrilməsi çox böyük rola malikdir. Azərbaycan malik olduğu imkanları elektron səviyyədə də daşıyaraq regionda rəqəmsal əməliyyatların Azərbaycan üzərindən aparılması və beynəlxalq ticarət dövriyyəsinin bu baxımdan inkişaf etdirilməsində böyük potensiala malikdir.

Azərbaycanda qeyri-neft sektorunun inkişafı ilə bağlı mühüm tədbirlər həyata keçirilir ki, bunlardan biri də "Azexport" portalının yaradılmasıdır. Portala 50-dən çox ölkədən daxil olan sifarişlərin həcmi 300 milyon dollardan artıqdır. "Azexport"a təkcə Azərbaycan istehsalçıları deyil, qonşu ölkələrin istehsalçıları da qeydiyyatdan keçməyə maraq göstərirlər. Bu portal regional ticarət portalına çevrilmə potensialı qazanıb və bundan irəli gələrək Prezident İlham Əliyevin müvafiq Fərmanına əsasən Rəqəmsal Ticarət Qovşağı yaradılıb.

İqtisadiyyat nazirinin müavini Sahil Babayev ölkədə iqtisadiyyatın şaxələndirilməsi, qeyri-neft sektorunun inkişafı, ölkə əhalisinin rifahının yaxşılaşdırılması istiqamətində sistemli tədbirlərin həyata keçirildiyini deyib. Bildirib ki, bu tədbirlərin əsas qayəsi məhz iqtisadiyyatın inkişafı, yeni iş yerlərinin yaradılması, yeni istehsal sahələrinin yaradılması, sənayenin, kənd təsərrüfatının və digər sahələrdə iqtisadiyyatın sektorlarının inkişafını təmin etməkdir. Rəqəmsal Ticarət Qovşağı ticarət bazarlarının şaxələndirilməsi baxımından böyük əhəmiyyət kəsb edir.

O, yeni yaradılan ticarət evlərinin əhəmiyyətini qeyd edib: "Artıq Belarusda Azərbaycan Ticarət Evi uğurla fəaliyyət göstərir. Hazırda bu istiqamətdə Ukraynada hüquqi baza yaradılıb. Eyni zamanda, yeni ticarət evi Rusiyada yaradılır və gələn il fəaliyyətə başlaması planlaşdırılır. Bundan başqa, Azərbaycan qeyri-neft sektorunun inkişafı sahəsində sənaye parklarının inkişafına böyük önəm verir. Bu parkların yaradılmasına 1,1 milyard dollar həcmində sərmayə yatırılıb, 11 rezidentin statusu təsdiq edilib.

S.Babayev qeyd edib ki, bu ilin 8 ayında qeyri-neft ixracı 30 faiz, kənd təsərrüfatı 35 faiz, qeyri-neft sənayesi 25 faiz artıb.

Avropa İttifaqının (Aİ) Azərbaycandakı nümayəndəliyinin rəhbəri Kestutis Yankauskas qeyd edib ki, Aİ Azərbaycanda Rəqəmsal Ticarət Qovşağına dair keçiriləcək bütün layihələrə dəstək olmağa hazırdır. Azərbaycan bu sahədə ciddi addımlar atır. İnanıram ki, noyabrda keçiriləcək Şərq Tərəfdaşlığı sammitində təqdim etmək üçün əlinizdə konkret nəticələriniz olacaq.

K.Yankauskas deyib: "Aİ Azərbaycanla çoxşaxəli əməkdaşlıq üçün intensiv danışıqlar aparır. Eyni zamanda, çoxşaxəli tərəfdaşlıq əlaqələri qurmaq və bununla bağlı sazişlər bağlamaq barəsində müzakirələr edir. Azərbaycan və Avropa İttifaqı önəmli ticarət tərəfdaşlarıdır. Azərbaycanın ixracının yarısı bizə aiddir. Avropa İttifaqı Azərbaycanın iqtisadi və ixrac potensialını artırmaq üçün dəstək verməyi düşünür".

"PAŞA Bank"ın idarə heyətinin üzvü Aydın Atakişiyev bildirib ki, biz ölkələrarası ticarətin dəstəklənməsi, biznes proseslərin rəqəmsallaşması, ümumilikdə Azərbaycan biznesinin texnologiyalar vasitəsilə daha da gücləndirilməsi prosesində vacib alətə çevrilmək üçün Rəqəmsal Ticarət Qovşağının istifadəyə verilməsini səbirlsizliklə gözləyirik. "PAŞA Bank" olaraq bizim bu təşəbbüsə qoşulmağımız və Azərbaycan iqtisadiyyatının rəqabətliliyinin artırılmasını dəstəkləməyə davam etməyimiz sevindirici haldır. Əminik ki, bu əhatəli rəqəmsallaşma təşəbbüsü Azərbaycanda biznesin inkişafı və onun "PAŞA Bank"ın xidmət etdiyi regional üçbucaq çərçivəsində və daha da geniş coğrafi miqyasda ticarət və investisiya axınlarına çıxış əldə etmələri üçün çox əlverişli və məhsuldar platformaya çevriləcək. Biz Rəqəmsal Ticarət Qovşağının hər zaman müştərilərimiz arasında təbliğ etdiyimiz effektiv idarəçiliyin təşviqi üçün önəmli alət olduğunu hesab edirik.

Konfransda Rəqəmsal Ticarət Qovşağına dair videoçarx nümayiş olunub.

Konfrans çərçivəsində İqtisadi İslahatların Təhlili və Kommunikasiya Mərkəzi ilə Rusiyanın "QazinformService", Polşanın "Asseco data Sistems" və İsveçrənin "OrientSwiss" şirkətləri arasında əməkdaşlığa dair anlaşma memorandumu imzalanıb. Bu memorandumların imzalanması ölkələrarası biznes əlaqələrinin yaxşılaşdırılmasına, Azərbaycanın iqtisadi inkişafının, e-ticarət və e-kommersiyanın inkişafının asanlaşdırılmasına öz töhfəsini verəcək.

"Rəqəmsal Ticarət Qovşağının Azərbaycan Respublikasının ticarət əlaqələrinə və iqtisadi inkişafına töhfəsi", "Sərhədlərarası ticarət üçün innovativ həllər" və "Azərbaycanın Rəqəmsal Ticarət Qovşağı: İnkişaf perspektivləri" mövzularında keçirilən panel iclaslarda rəqəmsal qovşaqların inkişafı ilə bağlı ümumi konsepsiya, bu sahədə əməkdaşlıq, elektron imzaların tətbiqi və qarşılıqlı tanınması mövzularında müzakirələr aparılıb.

Qeyd edək ki, Azərbaycanın Rəqəmsal Ticarət Qovşağı Prezident İlham Əliyevin 2017-ci il fevralın 22-də imzaladığı "Rəqəmsal Ticarət Qovşağı kimi Azərbaycanın mövqeyinin gücləndirilməsi və xarici ticarət əməliyyatlarının genişləndirilməsi ilə bağlı əlavə tədbirlər haqqında" Fərmanı əsasında yaradılıb. Rəqəmsal Ticarət Qovşağının operatoru İqtisadi İslahatların Təhlili və Kommunikasiya Mərkəzidir.