İQTİSADİYYAT
“Maxaçqala” Aeroportu Azərbaycana birbaşa müntəzəm reyslər açmaq istəyir
Moskva, 21 fevral, AZƏRTAC
“Maxaçqala” Beynəlxalq Aeroportu Azərbaycan, Gürcüstan və Qırğızıstana müntəzəm reyslər təşkil etmək üçün bir neçə aviadaşıyıcı ilə danışıqlar aparır.
AZƏRTAC xəbər verir ki, aeroportun mətbuat xidmətinin məlumatına görə, Azərbaycan, Gürcüstan və Qırğızıstana birbaşa reyslər açmaq planlaşdırılır. “Maxaçqala” Beynəlxalq Aeroportu” Səhmdar Cəmiyyətinin baş direktoru Arsen Pirmaqomedov deyib: “Biz respublikamızla ənənəvi olaraq Dağıstan xalqlarının və qonşu respublikaların diasporunun yaşadığı, Dağıstan ilə işgüzar əlaqələrdə və qarşılıqlı iqtisadi münasibətlərdə maraqlı olan Azərbaycan, Gürcüstan və Qırğızıstan arasında hava əlaqəsi yaratmaq istəyirik”.
Hazırda “Maxaçqala” Aeroportundan üç beynəlxalq istiqamətdə – Qazaxıstan, Türkiyə və Birləşmiş Ərəb Əmirlikləri istiqamətlərində reyslər həyata keçirilir.
Fəridə Abdullayeva
AZƏRTAC-ın xüsusi müxbirik
Moskva