Şəmkir, 22 fevral, Famil Quliyev, AZƏRTAC

Fevralın 22-də Şəmkir şəhərindəki “Excelsior” otelinin konfrans zalında Şəmkir, Tovuz, Daşkəsən və Gədəbəy rayonlarından bələdiyyə sədri və üzvü olan qadınların iştirakı ilə “Dayaq” Mentorluq layihəsinin açılış konfransı olub.

AZƏRTAC-ın bölgə müxbiri xəbər verir ki, Ailə, Qadın və Uşaq Problemləri üzrə Dövlət Komitəsinin Almaniya Beynəlxalq Əməkdaşlıq Təşkilatı (GİZ) ilə birgə həyata keçirdiyi tədbirin məqsədi qadınların ictimai həyatda iştirakını gücləndirmək və Azərbaycanda yerli səviyyədə daha çox genderyönümlü idarəetməni təmin etməkdir.

Konfransda Şəmkir Rayon İcra Hakimiyyəti başçısının birinci müavini Qüdrət Əliyev çıxış edərək rayonda qadınlar üçün yaradılan imkanlar və qadınların fəaliyyətinin təmin edilməsində əldə olunan uğurlar haqqında məlumat verib. Diqqətə çatdırıb ki, dövlətimizin başçısı İlham Əliyevin tapşırığına əsasən, qadınların bütün sahələrdə irəli çəkilməsi, gender bərabərliyinin təmin edilməsi istiqamətində digər rayonlarda olduğu kimi, Şəmkirdə də mühüm tədbirlər həyata keçirilir, qadınlar böyük işlərə cəlb olunur: “Son illər bütün respublikada qadınların aktiv fəaliyyətə cəlb edilməsi məqsədilə mühüm sahibkarlıq obyektləri tikilir, qadınlar işlə təmin edilirlər. Misal kimi ötən il Şəmkir rayonunda açılışı olan xalçaçılıq fabrikini qeyd etmək olar. 150 qadının buraya cəlb edilməsi nəzərdə tutulub, hazırda fabrikdə 80 qadın işlə təmin edilib. Eyni zamanda, Aqroparkın açılışı baş tutub ki, burada da işçilərin 80-85 faizini qadınlar təşkil edir”.

Sonra Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova çıxış edərək GİZ ilə əməkdaşlıq çərçivəsində həyata keçirilən tədbirləri diqqətə çatdırıb. Qeyd edib ki, bu çərçivədə 2012-ci ildən böyük layihələr icra edilir ki, bunlardan da ən mühümü elə “Dayaq” Mentorluq Proqramıdır. O bildirib ki, əvvəllər qadınların bələdiyyə orqanlarında iştirakçılığı aşağı idi, lakin biz bu gün müşahidə edirik artıq bu göstərici 35 faizədək artıb. Bu, dövlət qadın siyasətinin müvəffəqiyyətlə həyata keçirilməsinin nəticəsidir. Azərbaycan Respublikasının Prezidenti İlham Əliyevin rəhbərliyi ilə ölkəmizdə qadınların hər bir sahəyə fəal cəlb olunması, irəli çəkilməsi, iştirakçılığının artırılması istiqamətində böyük işlər görülür. “Ən mühüm məqsədlərdən biri də odur ki, qadınlar iştirak etdikləri layihələrdən həqiqətən bəhrələnə bilsinlər və əldə etdikləri məlumatları digər qadınlarla da bölüşərək onlarında bu cür fəallığa cəlb olunmasında mühüm rol oynasınlar”.

S. Qəhrəmanova bu il qadınlara seçki hüququnun verilməsinin 100 ilinin tamam olması və ölkə səviyyəsində böyük tədbirlərin həyata keçirilməsini qeyd edib. Komitə sədrinin müavini regionlarda həyata keçirilən “Kənd və rayon yerlərində yaşayan qadınların iqtisadi və sosial həyatda iştirakının təşviqatı” layihəsi və qadın resurs mərkəzlərinin fəaliyyəti haqqında məlumat verib.

GİZ Cənubi Qafqazda Yaxşı Yerli Özünü İdarəetmə Proqramı üzrə qrup rəhbəri Gerald Duda Azərbaycan ilə əməkdaşlıqdan məmnunluğunu ifadə edib və həyata keçirilən tədbirlərdən danışıb. O, qeyd edib ki, təşkilatımızın ən mühüm əməkdaşlarından biri də Azərbaycandır. Bildirilib ki, bu əməkdaşlıq çərçivəsində qadınların iştirakçılığının artırılması, onların cəmiyyətdə mühüm yer tutmasına xüsusi önəm verilir.

Konfransda Ailə, Qadın və Uşaq Problemləri üzrə Dövlət Komitəsinin nümayəndələri Elgün Səfərovun, Tural Hüseynzadənin, Almaniya Əməkdaşlıq Təşkilatının Yerli Özünüidarəetmə Proqramının nümayəndəsi Fidan Qasımovanın, layihənin eksperti Ruhəngiz Hüseynovanın və “E-box” şirkətinin direktoru Şamo Salayevin “Qadınların siyasi iştirakını artırmaq üçün mexanizmlər (Azərbaycan perspektivi)”, “Yerli səviyyədə qadınların səlahiyyətləndirilməsi”, “Məişət zorakılığının qarşısının alınması istiqamətində həyata keçirilən tədbirlər”, “Startup” layihələrin hazırlanması” və digər mövzularda çıxışları dinlənilib.

Çıxışlarda qadın hüquqlarının müdafiəsi, məişət zorakılığı, uşaq nikahları, insan alveri və narkotiklərlə mübarizə, vətəndaşlara xidmət və digər mövzular üzrə məlumatlar da iştirakçıların diqqətinə çatdırılıb.