Bakı, 21 may, AZƏRTAC

Mayın 19-da Gəncədə “LİBRAFF” kitab mağazasının təşkilatçılığı ilə keçirilən imza günündə tədqiqatçı-jurnalist Dilqəm Əhmədin qələmindən çıxan “Fərqlilər” və “Mühacirlərin dönüşü” kitabları şəhər ictimaiyyətinə, oxuculara təqdim edilib.

Avropa Azərbaycan Cəmiyyətindən AZƏRTAC-a bildiriblər ki, imza günündə, həmçinin müəllifin Azərbaycan Xalq Cümhuriyyəti və mühacirət tarixi ilə bağlı uzun illər ərzində apardığı araşdırmalar zamanı topladığı orijinal materiallar, nadir fotoşəkillər və sənədlər sərgilənib.

Tədbirdə Türkiyə Cümhuriyyətinin Gəncə şəhərindəki Baş Konsulluğu, Azərbaycan Yazıçılar Birliyinin Gəncə şöbəsinin, Cümhuriyyət muzeyinin əməkdaşları, şəhər ictimaiyyəti, ali məktəblərin müəllim və tələbə heyəti, KİV nümayəndələri iştirak ediblər.

Tədbiri giriş sözü ilə açan “LİBRAFF” kitab mağazaları şəbəkəsinin piar və marketinq direktoru Ülviyyə Allahverdiyeva bu il Azərbaycan Xalq Cümhuriyyətinin (AXC) yaranmasının 100-cü ildönümünün qeyd olduğunu, bu münasibətlə də tədbirlər planı hazırlandığını bildirib.

İlboyu Azərbaycan Xalq Cümhuriyyəti ilə bağlı tədbirlərin davam edəcəyini söyləyən Ü.Allahverdiyeva Gəncədə bu cür tədbirin keçirilməsinin tarixi əhəmiyyət daşıdığını bildirərək deyib: “Çünki Gəncə Cümhuriyyətimizin ilk paytaxtı olub, biz də bu məqsədlə ilk tədbirimizi burada keçirməyi qərara aldıq”.

Sonra Dilqəm Əhməd Cümhuriyyət tarixi və topladığı materiallar haqqında oxuculara ətraflı məlumat verib. O bildirib ki, Gəncədə Cümhuriyyət sərgisi və imza mərasimi keçirmək həm də mənəvi borcdur: “Gəncə Yusifbəylilərin, Rəfibəylilərin, Şeyxzamanlıların, Ziyadxanlıların, Pişnamazzadələrin, Xasməhəmmədovların yurdudur. Cümhuriyyətimizin qurucularının çoxu bu torpaqda yetişib. Ona görə də burada sərgi və imza günü keçirmək bizim üçün şərəfdir”.

Daha sonra müəllif sərgi ilə bağlı oxuculara məlumat verərək deyib: “Mən bu materialları Türkiyənin İstanbul şəhərindən əldə etmişəm. Kolleksiyamızda Cümhuriyyətimizin banisi Məhəmməd Əmin Rəsulzadənin 5 fotoşəkli, 3 məktubu, imzalı kitabı, eləcə də Əlimərdan bəy Topçubaşova, Miryaqub Mirmehdiyevə, Abbasqulu Kazımzadəyə, Mirzəbala Məhəmmədzadəyə, Əhməd bəy Ağaoğluna aid orijinal fotoşəkillər, müxtəlif materiallar var. Bu materiallar hazırda üç kitab şəklində oxuculara təqdim edilib”.

Azərbaycan mühacirət tarixinin tədqiqatçısı Dilqəm Əhmədin 4 il ərzində Türkiyədə bu dövrə aid topladığı materiallar - fotolar, sənədlər “TEAS PRESS” Nəşriyyat Evi tərəfindən “Fərqlilər” (2015) və “Mühacirlərin dönüşü” (2017) adlı kitablarda çap olunub. Müəllifin “Fərqlilər” kitabında mühacirlərlə yanaşı, Azərbaycan tarixində önəmli rol oynamış şəxsiyyətlərin həyatı haqqında nadir materiallar təqdim edilib.

Əsərdə Məhəmməd Əmin Rəsulzadənin nadir fotoşəkilləri və məktubu, Mirzə Şəfi Vazeh, Mirzə Fətəli Axundzadə, İsmayıl bəy Qutqaşınlı, Cəlil Məmmədquluzadə, Məmməd Səid Ordubadi, Əmin Abid Gültəkin, Üzeyir Hacıbəyli, Əlimərdan bəy Topçubaşov, Nuru Paşa, Salman Mümtaz və digər görkəmli şəxsiyyətlərin həyatı haqqında maraqlı məlumatlar verilib.

Müəllifin “Mühacirlərin dönüşü” adlı ikinci kitabında Azərbaycan Xalq Cümhuriyyəti və mühacirəti tarixinə aid 50-yə yaxın yeni material təqdim edilib.

D.Əhməd 19 may tarixinin həm də Azərbaycanın böyük fikir adamı Əhməd bəy Ağaoğlunun anım günü olduğunu bildirərək şəxsi kolleksiyasında olan materiallar əsasında yeni kitab hazırladığını bildirdi.