REGİONLAR
Qax, Zaqatala və Balakən məktəblilərini cənub bölgəsində maraqlı ekskursiyalar gözləyir
Qax-Zaqatala-Balakən, 18 noyabr, Mustafa Dadaşov, AZƏRTAC
Azərbaycan Prezidenti İlham Əliyevin tövsiyəsinə əsasən “Ölkəmizi tanıyaq” devizi ilə keçirilən maarifləndirici tur-aksiyanın növbəti mərhələsi çərçivəsində Qax, Zaqatala və Balakən rayonlarının məktəblilərindən ibarət qruplar noyabrın 18-də səhər saatlarında Lənkəran-Masallı-Astara marşrutu üzrə respublikamızın cənub bölgəsinə yola salınıblar.
AZƏRTAC-ın bölgə müxbiri xəbər verir ki, tur-aksiyada iştirak edən Qax məktəbliləri ilə bir gün əvvəl rayon icra hakimiyyətində keçirilən görüşdə icra hakimiyyətinin başçısı Musa Şəkiliyev tur-aksiyaların əhəmiyyətindən söhbət açıb, bu layihənin yeniyetmə və gənclərin dünyagörüşlərinin zənginləşməsində mühüm rol oynadığını vurğulayıb.
Məktəblilərin diqqətinə çatdırılıb ki, Azərbaycanın iqtisadiyyatında qeyri-neft sektorunun, xüsusilə aqrar sahənin çox böyük payı var. Bu baxımdan Lənkəran, Masallı və Astara rayonları ölkə iqtisadiyyatında mühüm yerlərdən birini tutur. Bu bölgə sitrus bağları, çay və çəltik plantasiyaları, səfalı məkanları ilə tanınır, tarixi yerləri, özünəməxsus adət-ənənələri ilə seçilir.
Noyabrın 18-də səhər saatlarında tur-aksiya iştirakçılarını yola salmaq üçün Qax şəhərinin mərkəzindəki meydana toplaşan rayon rəhbərliyi, müəllim və valideynlər məktəblilərə tövsiyələrini veriblər. Yolasalma mərasimində bildirilib ki, məktəbliləri Lənkəran, Masallı və Astara rayonlarında olduqca maraqlı ekskursiyalar gözləyir. Onlar dörd gün ərzində Lənkəran, Masallı və Astara rayonlarının tarixi məkanları, muzeyləri ilə yaxından tanış olacaq, bu rayonların görməli yerlərini gəzəcəklər. Bundan əlavə, onların asudə vaxtlarının mənalı və səmərəli keçməsi üçün müxtəlif intellektual oyunların, əyləncəli proqramların təşkili də nəzərdə tutulub. Lənkəran rayonundakı Hirkan Milli Parkına və Xanbulan gölünə ekskursiya, çay plantasiyaları və sitrus meyvə bağları ilə tanışlıq da məktəblilərin ürəyincə olacaq.
Şəhər 2 saylı məktəb-liseyin 9-cu sinif şagirdi Sevinc Razıyeva, 3 saylı tam orta məktəbin 11-ci sinif şagirdi Fidan Bazayeva, Qaxilgiloy tam orta məktəbin 10-cu sinif şagirdi Kaxa Otaraşvili, Cəlayir kənd tam orta məktəbin 10-cu sinif şagirdi Aysun Rəcəbli və digər məktəblilər aksiyada iştirak etdiklərinə görə böyük sevinc hissi keçirdiklərini bildiriblər.
Sonra məktəblilər onlar üçün ayrılmış avtobusla cənub bölgəsinə yola düşüblər.
x x x
“Ölkəmizi tanıyaq” tur-aksiyasına Zaqatala məktəbliləri də böyük həvəslə qoşulublar.
Lənkəran-Masallı-Astara istiqamətində ekskursiyaya yollanan məktəblilərlə bir gün əvvəl Heydər Əliyev Mərkəzində keçirilən görüşdə rayon icra hakimiyyətinin başçısı Mübariz Əhmədzadə artıq beşinci ildir uğurla davam edən tur-aksiyaların yeniyetmə və gənclərin vətənpərvərlik, tarixi-mədəni irsimizə hörmət ruhunda tərbiyə olunmasına, onların dünyagörüşünün daha da zənginləşməsinə böyük töhfə verdiyini vurğulayıb. Bildirilib ki, ölkəmizin tarixini, mədəniyyətini, müstəqillik illərində qazanılan nailiyyətləri dərindən öyrənmək məqsədi daşıyan bu layihə yetişməkdə olan gənc nəslin Vətənə məhəbbət ruhunda tərbiyə olunmasına verilən böyük önəmin bariz nümunəsidir.
Bildirilib ki, məktəblilərin səfər edəcəyi Lənkəran, Astara və Masallı rayonları da Zaqatala rayonu kimi, ölkə iqtisadiyyatında mühüm yerlərdən birini tutur. Cənub bölgəsi sitrus bağları, çay və çəltik plantasiyaları, səfalı məkanları ilə tanınır, tarixi yerləri, özünəməxsus adət-ənənələri ilə seçilir. Son illər ölkənin digər regionları kimi, cənub bölgəsində də müasir mehmanxana və sağlamlıq komplekslərinin istifadəyə verilməsi Azərbaycanın iqtisadi potensialını nümayiş etdirməklə yanaşı, ölkəyə gələn turistlərin sayının artmasına da böyük təkan verir.
Noyabrın 18-də səhər saatlarında Zaqatala şəhərindəki Heydər Əliyev Mərkəzinin qarşısında böyük qələbəlik var idi. Lənkəran-Masallı-Astara marşrutu üzrə ekskursiyaya çıxan məktəbliləri yola salmaq üçün Mərkəzin qarşısına toplaşan rayonun rəhbər işçiləri, müəllim və valideynlər şagirdlərə tövsiyələrini verirdilər.
Məktəblilər əvvəlcə ümummilli lider Heydər Əliyevin abidəsi önünə gül-çiçək düzüb, dahi rəhbərin xatirəsini ehtiramla yad ediblər.
Qrupun rəhbəri, rayon icra hakimiyyətinin əməkdaşı Zaur Hüseynzadə AZƏRTAC-ın bölgə müxbirinə müsahibəsində deyib: “Məktəblilərin həyatında tarixi bir gündür. Onların əksəriyyəti ilk dəfədir respublikamızın dilbər guşələrinə səyahət edir. Gənclər cənub bölgəsinin tarixi məkanlarını, məşhur turizm obyektlərini indiyədək televiziya ekranlarından izləyiblər. İndi isə onlar bu gözəllikləri öz gözləri ilə görəcəklər”.
Rayonun Əliabad qəsəbə 3 saylı tam orta məktəbinin 9-cu sinif şagirdi Süleyman Məmmədov, Qımır kənd tam orta məktəbin 10-cu sinif şagirdi Gülayə Səmədova və digər məktəblilər bu layihədə iştirak etdiklərinə görə çox sevindiklərini bildiriblər.
Rayon rəhbərliyinin, müəllim və valideynlərin xeyir-duasından sonra məktəblilər Lənkəran istiqamətində yola çıxıblar.
x x x
“Ölkəmizi tanıyaq” devizi ilə keçirilən maarifləndirici tur-aksiyaya Azərbaycanın şimal-qərb qapısı sayılan Balakən rayonunun məktəbliləri də böyük sevinc hissi ilə qoşulublar.
Tur-aksiya çərçivəsində noyabrın 18-də səhər saatlarında rayonun fəal məktəblilərindən ibarət qrup cənub bölgəsinə yola düşüb.
Yolasalma mərasimindən əvvəl rayon icra hakimiyyətində tur-aksiya iştirakçıları ilə rayon rəhbərliyinin görüşü olub.
Tədbirdə çıxış edən rayon icra hakimiyyətinin başçısı İslam Rzayev ekskursiyanın məktəblilər üçün faydalı olacağına, tur-aksiya iştirakçılarının ölkəmizin cənub bölgəsindən zəngin təəssüratlarla qayıdacaqlarına əminliyini bildirib.
Lənkəran-Masallı-Astara marşrutu üzrə ekskursiyaya çıxan Balakən məktəblilərini yola salmaq üçün Bayraq Muzeyinin qarşısına toplaşan rayonun rəhbər işçiləri, müəllim və valideynlər gənclərə tövsiyələrini veriblər.
Tur-aksiyanın iştirakçıları olduqca şən görünürdülər. Onlar bu ekskursiyadan çoxlu məlumat əldə edəcəklərinə əmindirlər. Məktəblilərin əksəriyyəti ilk dəfədir respublikamızın cənub bölgəsinə səyahət edir. Dövlətimizin başçısının təşəbbüsü ilə gerçəkləşən bu layihə sayəsində balakənli məktəblilər tarixi məkanlarla, yeni tikililərlə yaxından tanış ola biləcəklər. Lənkəranda Heydər Əliyev Mərkəzinə, Bayraq Meydanına, “Qoşa qala” qapılarına, Həzi Aslanovun ev-muzeyinə, Dairəvi qalaya, Mayak binasına, Hirkan Milli Parkına, Xanbulan gölünə, çay plantasiyaları və sitrus meyvə bağlarına ekskursiyalar məktəblilərin yaddaşında silinməz iz qoyacaq. Tur-aksiya iştirakçılarının Masallı və Astaraya səfərləri də maraqlı və yaddaqalan olacaq.
Sonra tur-aksiya iştirakçıları onlar üçün ayrılmış avtobusla Lənkəran-Masallı-Astara marşrutu üzrə yola düşüblər.