ELM VƏ TƏHSİL
ADU-nun tələbələri beynəlxalq müsabiqənin Çin üzrə final mərhələsində iştirak ediblər
Bakı, 19 noyabr, AZƏRTAC
Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunun tələbələri “Çin dili körpüsü” beynəlxalq müsabiqəsinin Çin üzrə final mərhələsində iştirak ediblər.
ADU-dan AZƏRTAC-a bildirilib ki, müsabiqə məktəblilər arasında “Çin dilini öyrən – yeni dünyanı kəşf et” devizi altında təşkil olunub. Müsabiqədə müxtəlif ölkələrdən orta məktəblərin və gimnaziyaların şagirdləri ilə yanaşı, Konfutsi İnstitutunun tələbələri Fidan Mədiyeva və Nəcibə Şükürova də iştirak ediblər. Tələbələr Konfutsi İnstitutunun əməkdaşı Li Changyongun köməyi ilə Çin dilində müxtəlif mövzularda çıxış ediblər. Onlar bu ölkənin mədəniyyəti haqqında sualları cavablandırıb, sonda bədii nömrələr nümayiş etdiriblər. Müsabiqədə mükafatlandırılan tələbələr Çində 6 aylıq təhsil almaq şansı qazanıblar.
Müsabiqənin ardınca ADU-da çinşünaslıq ixtisası üzrə təhsil alan tələbələrə Çin mədəniyyətini, milli xarakterini aşılamaq üçün “Çin sərgüzəştləri” mövzusunda seminar keçirilib.
Konfutsi İnstitutunun direktoru, professor Rafiq Abbasov tələbələrin Çinə səfəri zamanı Azərbaycanın mədəniyyəti, tarixi və iqtisadiyyatını təbliğ etdiklərini bildirib. R.Abbasov, həmçinin qeyd edib ki, Prezident İlham Əliyevin imzaladığı Sərəncamla təsdiq olunmuş “Azərbaycan gəncliyi 2017-2021-ci illərdə” Dövlət Proqramına əsasən gənclərin beynəlxalq mübadilə və mədəniyyətlərarası dialoqda iştirakı dəstəklənir və onların beynəlxalq əlaqələrinin inkişaf etdirilməsinə səy göstərilir.
Tədbirdə çıxış edən Fidan Mədiyeva və Nəcibə Şükürova Çin sərgüzəştlərini, çinlilərin etnik özünüdərki, xüsusilə Çin milli xarakteri, kulinariyası, düşüncə tərzi, eyni zamanda onların milli-psixoloji keyfiyyətləri haqqında fikirlərini bölüşüblər.