Bakı, 23 yanvar, AZƏRTAC

Yanvar ayının ilk günlərindən başlayaraq Kənd Təsərrüfatı Nazirliyi yanında Dövlət Baytarlıq Xidməti (DBX) ölkədə "Epizootiya əleyhinə profilaktika və diaqnostika tədbirlər planı"na uyğun olaraq, iti yoluxucu xəstəliklərə qarşı profilaktik peyvəndləmə və diaqnostik müayinə tədbirlərinə başlayıb.

DBX-dən AZƏRTAC-a bildiriblər ki, Dövlət Baytarlıq Xidmətinin Lənkəran Rayon Baytarlıq İdarəsi iribuynuzlu, təkdırnaqlı heyvanlar arasında qarayara və ev itləri arasında quduzluq xəstəliklərinə qarşı profilaktik peyvəndləmə tədbirləri aparır. Bununla yanaşı, iribuynuzlu heyvanlardan brusellyoz xəstəliyinin müayinəsi məqsədilə qan nümunələri alınır. Tədbirlər yekunlaşdıqdan sonra ərazilərdə profilaktik dezinfeksiya işləri həyata keçirilir. Rayonda iribuynuzlu, təkdırnaqlı heyvanlarda və donuzlarda qarayara xəstəliyinə qarşı aparılan tədbirlərin fevralın birinci ongünlüyünə kimi yekunlaşdırılması nəzərdə tutulur.

İlin əvvəlindən indiyə kimi Lənkəran rayonunun ayrı-ayrı şəxsi və fermer təsərrüfatlarında 29976 baş iribuynuzlu, 162 baş təkdırnaqlı heyvanda qarayara xəstəliyi əleyhinə peyvəndləmə tədbiri aparılıb, 281 baş iribuynuzlu heyvandan brusellyoz xəstəliyinin müəyyən edilməsi məqsədilə qan nümunəsi alınıb və 800 kvadratmetr sahədə dezinfeksiya və dezinseksiya işləri görülüb.

Qeyd edək ki, Lənkəran Rayon Baytarlıq İdarəsinin mütəxəssisləri tərəfindən 2018-ci ildə 53503 baş iribuynuzlu, 22320 baş xırdabuynuzlu, 6000 baş cavan iribuynuzlu, 300 baş təkdırnaqlı heyvanda qarayara, 4000 baş ev itində quduzluq, 8371 iribuynuzlu, 3100 xırdabuynuzlu heyvanda brusellyoz xəstəliyinə qarşı peyvəndləmə tədbiri aparılıb. Eləcə də həssas heyvanlar arasında brusellyoz xəstəliyini aşkar etmək, xəstəliyin qarşısını almaq məqsədi ilə 9080 baş iribuynuzlu və 459 baş xırdabuynuzlu heyvandan (qoçlardan) qan nümunələri alınaraq müayinə edilib. Həmçinin başa vurduğumuz il ərzində rayonda 10700 kvadratmetr sahədə profilaktik dezinfeksiya tədbirləri icra olunub.

Epizootiya əleyhinə aparılan tədbirlər çərçivəsində baytar mütəxəssisləri qarayara, brusellyoz və “donuz qripi” xəstəlikləri barədə təsərrüfat sahiblərinə ətraflı məlumat veriblər. Təsərrüfatlarda baytarlıq-sanitariya qaydalarına ciddi əməl edilməsi, donuzların qapalı şəraitdə saxlanılması, heyvan saxlanılan tövlələrin girişində dezinfeksiya məqsədilə xüsusi yerlərin düzəldilməsi, donuzların yemləndirilməsi üçün kənardan gətirilən sənaye və ictimai iaşə tullantılarının qaynadılaraq heyvanlara verilməsi, təsərrüfatlarda dezinfeksiya və dezinseksiya işlərinin aparılması, təsərrüfatlara kənar şəxslərin girişinin qadağan edilməsi, heyvanlar arasında xəstəliyə şübhəli hal baş verdikdə dərhal yerli baytarlıq idarəsinə və ya Dövlət Baytarlıq Xidmətinə məlumat verilməsi tövsiyə olunub.

Cari ilin epizootiya əleyhinə planında isə bundan sonra Lənkəran rayonunda ev quşları arasında nyukasl, iribuynuzlu heyvanlarda dabaq, nodulyar dermatit, leptespiros, brusellyoz, xırdabuynuzlu heyvanlarda qarayara, dabaq, çiçək, leptespiros xəstəliklərinə qarşı profilaktik peyvəndləmə tədbirləri aparılacaq. Həmçinin həssas heyvanlar arasında brusellyoz xəstəliyini aşkar etmək, xəstəliklərin yayılmasının qarşısını almaq məqsədilə xırdabuynuzlu heyvanlardan (qoçlardan) qan nümunələrinin alınması, iribuynuzlu heyvanlarda vərəmə (allergik), qoçlarda infeksion epidedimitə (seroloji) və atlarda manqo xəstəliyinə görə (maleinizasiya) müayinələrinin aparılması nəzərdə tutulur.

Dövlət Baytarlıq Xidməti tərəfindən rayon (şəhər) baytarlıq idarələri baytarlıq preparatları, lazımi ləvazimat və avadanlıqlarla təmin edilib. Cari ildə dövlət vəsaiti hesabına alınan, “soyuq zəncir” rejimi gözlənilməklə bölgü əsasında sahə baytarlıq məntəqələrinə çatdırılan biopreparatlar, dezinfeksiya, dezinseksiya və müalicəvi dərman preparatları rayon baytarlıq idarələrinin əməkdaşları tərəfindən “Epizootiya əleyhinə profilaktika və diaqnostika tədbirlər planı”na uyğun olaraq əhalinin mal-qarasına ödənişsiz əsaslarla (pulsuz) tətbiq edilir.

Hazırda xüsusi təhlükəli xəstəliklərə görə respublikada epizootik vəziyyət sabitdir.