CƏMİYYƏT
Yanğın hadisələrinin qarşısının alınması üçün profilaktik tədbirlər görülür
Bakı, 23 yanvar, AZƏRTAC
Fövqəladə Hallar Nazirliyinin (FHN) şimal-qərb regional mərkəzinin təşkilatçılığı, şimal-qərb regional dövlət yanğın nəzarəti idarəsinin iştirakı ilə Qəbələ şəhərində “Fövqəladə hallarla bağlı davranış qaydaları” mövzusunda maarifləndirmə tədbiri keçirilib.
AZƏRTAC nazirliyə istinadla xəbər verir ki, tədbir fövqəladə hallarla bağlı davranış qaydaları və mülki müdafiə sahəsində biliklərinin artırılması, baş verə biləcək yanğın hadisələrinin qarşısının alınması üçün profilaktik tədbirlərin görülməsi məqsədilə keçirilib.
Tədbirdə Mərkəzin əməkdaşları tərəfindən “Sel və daşqın”, “Zəlzələ”, “Dəm qazı”, “Yanğın zamanı davranış qaydaları”, “Nəqliyyat qəzaları” və “112” qaynar xətti” mövzularında məruzələr edilib. Toplantıda mövzulara dair videoçarxlar nümayiş olunub.
Sonda odsöndürücü balondan istifadə qaydaları otel əməkdaşlarına əyani şəkildə göstərilib, mövzulara dair suallar cavablandırılıb.