Dubay, 18 fevral, AZƏRTAC

Birləşmiş Ərəb Əmirliklərinin (BƏƏ) Dubay şəhərində keçirilən “Gulfood 2019” beynəlxalq qida sərgisində qida sənayesi sahəsində fəaliyyət göstərən 21 Azərbaycan şirkəti İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə öz məhsullarını “Made in Azerbaijan” vahid ölkə stendində təqdim edir.

Azərbaycan şirkətlərinin nümayəndələri AZƏRTAC-a müsahibəsində ölkədə sahibkarlığın inkişafı sahəsində aparılan siyasətin müsbət nəticələrindən, yerli şirkətlərin məhsullarının xarici bazarlara, o cümlədən BƏƏ və digər Körfəz ölkələrinin bazarlarına çıxarılmasına verilən dəstəkdən danışıblar. Onların fikrincə, dünyanın əksər ölkələrinin iştirak etdiyi “Gulfood” sərgisi kimi beynəlxalq sərgilərə qatılmaq ölkəmizdə istehsal olunan məhsulların təbliği və xarici bazarlara çıxarılması üçün yaxşı fürsətdir. Azərbaycan şirkətlərinin bu kimi sərgilərdə iştirakı yerli məhsullarımızın tanıdılması ilə yanaşı, ölkəmizin ixrac potensialını artırmağa və Azərbaycan iqtisadiyyatının möhkəmlənməsinə xidmət edir.

“Əlbəttə, bizim dövlətimiz sahibkarlığa daim dəstək göstərir. Bu, bizim şirkətin iştirak etdiyi ilk sərgi deyil, bir çox ölkələrdə belə sərgilər keçirilir - Rusiya, Qətər, Polşa və digər ölkələrdə. Belə sərgilər barədə AZPROMO hər bir şirkətə məlumat göndərir və iştirak üçün lazımi dəstək göstərir. AZPROMO yerli şirkətlər üçün əlindən gələni əsirgəmir”, - deyə “Grow Group Azərbaycan” şirkətinin layihə rəhbəri Elxan Həsənov deyib.

Onun sözlərinə görə, şirkət 2011-ci ildən fəaliyyət göstərir və əsasən üç istiqaməti əhatə edir - istixanaların tikilməsi, istixanada məhsulların yetişdirilməsi və istixana materiallarının satışı.

“Gulfood” sərgisində biz yetişdirdiyimiz pomidorların xaricə ixracını genişləndirmək məqsədilə iştirak edirik. BƏƏ-nin bir neçə şirkəti ilə bu ölkəyə məhsul ixracına dair danışıqlar aparırıq. Bundan öncə digər ərəb ölkələri ilə əməkdaşlıq etməyə başlamışıq və həmin ölkələrə pomidor ixrac edirik. Həmçinin biz, Körfəz ölkələrinə də ixraca diqqəti cəmləmişik. Çox güman ki, yay fəslində BƏƏ-yə öz məhsullarımızın ixracına başlayacağıq”, - deyə E.Həsənov bildirib.

O qeyd edib ki, ümumiyyətlə Azərbaycan pomidoruna böyük maraq var: “Bizim məhsullarımız çox keyfiyyətli olduğuna görə Niderland malları ilə rəqabət aparmalı olur. Lakin, hazırda BƏƏ-də və ümumiyyətlə ərəb ölkələrində Niderland bir brend kimi tanınır. Azərbaycan isə ixraca yeni başladığı üçün bizim məhsullar bu ölkələrdə hələ o qədər də tanınmayıb. Ümidvarıq ki, belə sərgilərdə iştirakımız və imzalanacaq müqavilələr nəticəsində bizim də məhsullarımız Körfəz ölkələrində tanınacaq, Niderland məhsulları ilə tam rəqabət apara biləcəyik”.

Azərbaycanın “TAC” şirkətinin marketinq və PR üzrə direktoru Surayya Verdiyeva bildirib ki, Azərbaycan şirkətlərinin qida sərgisində iştirakının böyük əhəmiyyəti var: “BƏƏ-nin və digər ölkələrin ziyarətçiləri bizim məhsullar barədə məlumatlar alır və maraq göstərir Bildiyiniz kimi, bu region üçün su və digər içkilər böyük əhəmiyyət kəsb edir. Bizim şirkət hələ ki, BƏƏ-yə öz məhsullarını ixrac etmir, amma bu sahədə müəyyən işlər görülür, danışıqlar aparılır. Hazırda bizim şirkət yeni içki növləri istehsal etməyə başlayıb. Bir çox ölkələrin nümayəndələri kimyasız, süni boyasız məhsullara üstünlük verir və bizimlə danışıqlar apararkən keyfiyyət sertifikatı ilə maraqlanırlar. Bütün bunları nəzərə alaraq, biz, təbii məhsullar istehsal edirik və onların tezliklə xarici bazarlara çıxaracağına ümid bəsləyirik”.

“Avrora” şirkətinin ixrac meneceri Elşad Qasımov isə AZƏRTAC-a müsahibəsində deyib ki, Azərbaycanın daxili qida məhsulları bazarında böyük şirkətlərdən biri olan şirkətin hazırda qarşısına qoyduğu ən böyük vəzifələrdən daxili bazarda göstərdiyi uğuru xarici bazarda da göstərməkdir. Onun sözlərinə görə, bu məqsədə nail olmaq üçün şirkət belə sərgilərə daim qatılır, öz mallarını nümayiş etdirir və tanıtdırır: “Qısa müddətdə ixraca başlamasına baxmayaraq, “Avrora” şirkəti artıq 6-dan çox ölkəyə öz məhsullarını ixrac edir və xarici distributorlarla müqavilələr imzalayıb. Ümid edirik ki, bu yaxın gələcəkdə daha böyük rəqəmlərə çatacağıq. BƏƏ-yə məhsul ixracına dair yerli distributor şəbəkəsi ilə danışıqlar aparılır və artıq məhsullarımız ekspertizaya verilib. Hazırda cavab gözləyirik və işləməyə tam hazırıq”.

Asya Hacızadə

AZƏRTAC-ın xüsusi müxbiri

Dubay