REGİONLAR
“Sabahın müəllimi” layihəsinin icrasına başlanılıb
Naxçıvan, 20 iyun, AZƏRTAC
Naxçıvan Müəllimlər İnstitutunda pedaqoji profilli ixtisasların buraxılış kurs tələbələri ilə görüş keçirilib.
AZƏRTAC-ın Naxçıvan bürosu xəbər verir ki, görüşdə çıxış edən institutun prorektoru Azad Novruzov muxtar respublikada təhsilin bütün pillələrinin inkişafına böyük diqqət və qayğı göstərildiyini vurğulayıb. Qeyd edib ki, bunu ali təhsil müəssisələrinin timsalında da görmək olar. Naxçıvan Müəllimlər İnstitutu da belə qayğı ilə əhatə olunub. Bu isə imkan verib ki, gələcəyin müəllimləri savadlı mütəxəssis kimi yetişdirilsin.
Naxçıvan Muxtar Respublikası Təhsil nazirinin müavini Ovni Muradov çıxış edərək bildirib ki, “Sabahın müəllimi” layihəsinin əsas məqsədi pedaqoji profilli ixtisaslarda oxuyan tələbələrə təhsildəki yeniliklər haqqında məlumat vermək, onların ümumtəhsil məktəblərində pedaqoji təcrübələrini təmin etmək, tələbələrin dərslik və metodik vəsaitlərin müzakirəsində iştirakının təşkilinə nail olmaq, müəllim təcrübəsini paylaşmaq və məzunların işlə təmin edilməsinə kömək göstərməkdir.
“Bu layihəyə uyğun olaraq muxtar respublikada gənc kadrların işlə təminatı diqqətdə saxlanılacaq. “Naxçıvan Muxtar Respublikasında müəllimlərin ümumtəhsil müəssisələrinə işə qəbul qaydaları”na uyğun olaraq bu proses müsabiqə yolu ilə həyata keçirilir”, - deyən Ovni Muradov qeyd edib ki, vakant vəzifənin tutulması üçün müraciət etmiş namizədlər arasında ən yüksək bal toplamış şəxs müvafiq vəzifəyə təyin olunur. Bu gün keçirilən tədbirin də əsas məqsədi pedaqoji profilli ixtisasların buraxılış kurs tələbələrinin muxtar respublikanın ümumtəhsil müəssisələrində olan vakant müəllim vəzifələri ilə tanış edilməsi, onlara gənc müəllimlərin işə qəbulu qaydaları ilə bağlı ətraflı məlumatların verilməsidir.
Nazirlik Aparatının şöbə müdiri Abdulla Əsgərov pedaqoji profilli ixtisasların buraxılış kurs tələbələrinə slaydlar vasitəsilə muxtar respublikanın ümumtəhsil məktəblərində olan vakant müəllim vəzifələri, müəllimlərin ümumtəhsil müəssisələrinə işə qəbul qaydaları və gənc mütəxəssislər üçün əlavə güzəştlər, stimullaşdırıcı tədbirlər haqqında geniş məlumat verib.
Babək rayon Nəcəfalı Dizə kənd tam orta məktəbinin ibtidai sinif müəllimi Kəmalə Əhmədova çıxış edərək gənc kadrlar üçün yaradılan şəraitə, müəllim əməyinə verilən yüksək qiymətə görə gənc həmkarları adından Naxçıvan Muxtar Respublikası Ali Məclisinin Sədrinə minnətdarlığını bildirib.