SİYASƏT
Milli Məclisdə Avropa Şurasının layihə rəhbəri ilə görüş olub
Bakı, 20 iyun, AZƏRTAC
Milli Məclisin Ailə, qadın və uşaq məsələləri komitəsinin sədri Aqiyə Naxçıvanlı iyunun 18-dən 21-dək Azərbaycanda faktaraşdırıcı səfərdə olan Avropa Şurasının baş layihə rəhbəri Naomi Trevinnardın rəhbərlik etdiyi nümayəndə heyəti ilə görüşüb. Bu barədə AZƏRTAC-a Ailə, qadın və uşaq məsələləri komitəsindən məlumat verilib.
Görüşdə bildirilib ki, bu səfər Avropa Şurasının “Avropada uşaqların onlayn istismarı və aldadılması” layihəsi çərçivəsində həyata keçirilir.
Söhbət zamanı Azərbaycanda uşaqların onlayn istismarı və aldadılması ilə bağlı müvafiq qanunvericilik, siyasət və təcrübə sahəsində boşluqların təhlili ilə əlaqədar fikir mübadiləsi aparılıb.
Görüşdə Milli Məclisin Ailə, qadın və uşaq məsələləri komitəsi sədrinin müavini Sahibə Qafarova, Avropa Şurasının layihə rəhbəri Ovidiu Majina və layihənin eksperti Mark Kameron da iştirak edib.