SİYASƏT
Azərbaycanın ərazi bütövlüyünün bərpası dövlətimizin qarşısında duran mühüm vəzifədir
Bakı, 13 dekabr, AZƏRTAC
Dekabrın 13-də Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov ADA Universitetində Latın Amerikası ölkələri və Əlcəzairdən olan diplomatlara mühazirə deyib.
Dövlət Komitəsindən AZƏRTAC-a bildiriblər ki, diplomatlara Ermənistan-Azərbaycan Dağlıq Qarabağ münaqişəsinin tarixi və mövcud vəziyyəti barədə ətraflı məlumat verilib.
Qeyd edilib ki, Ermənistan BMT-nin Təhlükəsizlik Şurası tərəfindən 1993-cü ildə qəbul edilmiş və Azərbaycanın işğal olunmuş ərazilərindən erməni qoşunlarının tam, dərhal və qeyd-şərtsiz geri çəkilməsini tələb edən qətnamələrə əməl etməyərək, ölkəmizin ərazisinin 20 faizini hələ də işğal altında saxlayır, nəticədə isə azərbaycanlı məcburi köçkünlərin problemi öz həllini tapmır.
Diqqətə çatdırılıb ki, Latın Amerikası ölkələri ilə əlaqələr Azərbaycanın xarici siyasətində xüsusi yer tutur. Vurğulanıb ki, bu ölkələr beynəlxalq arenada Azərbaycanın maraqlarını dəstəkləyirlər. Latın Amerikası ölkələri, xüsusilə də Kolumbiya, Peru, Panama, Honduras, Paraqvay və Qvatemala qanunvericilik orqanları səviyyəsində Xocalı soyqırımı ilə bağlı qətnamə qəbul ediblər.
Məlumat verilib ki, Azərbaycan dövləti Ermənistan-Azərbaycan Dağlıq Qarabağ münaqişəsi nəticəsində ağır məhrumiyyətlərə düçar olmuş məcburi köçkünlərin sosial problemlərinin həllini daim nəzarətdə saxlayır. Prezident İlham Əliyevin məcburi köçkünlərin mənzil-məişət şəraitinin yaxşılaşdırılması, məşğulluğunun təmin edilməsi və maddi rifah halının yüksəldilməsi ilə bağlı verdiyi tapşırıqlar ardıcıllıqla icra olunur. Birinci vitse-prezident xanım Mehriban Əliyevanın təşəbbüsü və rəhbərliyi ilə böyük layihələr həyata keçirilir. Azərbaycan qaçqın və məcburi köçkünlərə dövlət qayğısına görə dünyada nümunə göstərilir və bu cür problemdən əziyyət çəkən digər ölkələrlə öz təcrübəsini bölüşməyə hazırdır.
Diplomatlara dövlət qurumları və beynəlxalq təşkilatların rəy və təklifləri, beynəlxalq təcrübə nəzərə alınmaqla hazırlanmış “Böyük Qayıdış” proqramı haqqında da məlumat verilib. Bildirilib ki, bu sahədə artıq ilk təcrübə də var. Bu, Cəbrayıl rayonunun işğaldan azad edilmiş Cocuq Mərcanlı kəndi və Tərtər rayonunun Şıxarx qəsəbəsidir. Cocuq Mərcanlı kəndi, eyni zamanda, post-münaqişə reabilitasiya və regionda davamlı sülhün təmin olunmasının nadir modelidir. Cocuq Mərcanlı bərpa olduqdan sonra məcburi köçkünlərin qayıdış hüququndan istifadə edərək buraya könüllü şəkildə köçmələri onların hər zaman doğma yurdlarına qayıtmaq istəyini nümayiş etdirir.
Azərbaycanın ərazi bütövlüyünün bərpası və “Böyük Qayıdış” proqramının tam olaraq icra edilməsi dövlətimizin qarşısında duran mühüm vəzifədir.
Daha sonra təlim iştirakçılarının çoxsaylı sualları cavablandırılıb.
Qeyd edək ki, dekabrın 7-dən 14-dək ADA Universitetində “Xəzər dənizi hövzəsi ölkələrinin öyrənilməsi” proqramı çərçivəsində Meksika, Uruqvay, Çili, Ekvador, Qambiya, Argentina, Venesuela, Surinam və Əlcəzairdən olan diplomatlar üçün təlim keçirilir.