REGİONLAR
AMEA Naxçıvan Bölməsi tərəfindən bir ildə Vikipediyaya 228 material və 8 adda monoqrafiya yerləşdirilib
Naxçıvan, 28 yanvar, AZƏRTAC
AMEA Naxçıvan Bölməsinin Rəyasət Heyətinin növbəti iclasında görülmüş işlər və qarşıda duran vəzifələr müzakirə edilib.
Bölmənin İnformasiya şöbəsindən AZƏRTAC-ın Naxçıvan bürosuna bildirilib ki, əvvəlcə bölmənin sədri, akademik İsmayıl Hacıyev iştirakçıları gündəlikdəki məsələlərlə tanış edib.
Sonra bölmənin Təbii Ehtiyatlar İnstitutunun direktoru, AMEA-nın müxbir üzvü Tofiq Əliyev rəhbərlik etdiyi müəssisədə gil istehsalı ilə bağlı görülən işlərdən danışıb. Alim mineral tərkibinə görə rəngləri dəyişən gillərin hər bir növünün özünəməxsus xüsusiyyətləri olduğunu deyib. Bildirib ki, bir çox sənaye sahələrində geniş istifadə edilən bu maddənin Naxçıvan, Şahbuz, Babək və digər yataqlarda xeyli ehtiyatları mövcuddur.
Tofiq Əliyev bir sıra yataqlardan nümunələrin götürüldüyünü, tərkiblərinin öyrənildiyini və gələcəkdə bu istiqamətdə işlərin davam etdiriləcəyini vurğulayıb. O, gil yataqlarının istismara cəlb edilməsinin Naxçıvanın sosial-iqtisadi inkişafına öz töhfəsini verə biləcəyini qeyd edib.
İclasda bölmənin viki-qruplarının fəaliyyətləri də müzakirə olunub. Məsələ ilə bağlı İnformasiya şöbəsinin mütəxəssisi Səkinə Cümşüdova çıxış edərək bildirib ki, 2019-cu ildə Naxçıvanın arxeoloji abidələri, qədim yaşayış yerləri, nekropol və qalaları, müxtəlif memarlıq abidələri - məscidlər, pirlər ilə bağlı Vikipediyaya 228 material, 8 adda monoqrafiya yerləşdirilib. O qeyd edib ki, materialların 22-si, monoqrafiyanın isə biri ermənilərin Azərbaycana, o cümlədən Naxçıvana qarşı ərazi iddiaları və həyata keçirdikləri soyqırımlarla bağlıdır. Bundan əlavə, o, Naxçıvanın görkəmli tarixi şəxsiyyətləri və etnoqrafiyası ilə bağlı 9 elmi məqalədə redaktə işləri aparıldığını, 46 mədəniyyət abidəsinin şəkillərinin yerləşdirdiyini diqqətə çatdırıb. Səkinə Cümşüdovanın sözlərinə görə, yerləşdirilən məlumatlar mindən çox oxucu tərəfindən oxunulub və onlara elmi bazalarda 300-dən artıq istinad edilib.
Mövzu ilə bağlı çıxış edən İsmayıl Hacıyev viki-qrupda ölkəmizlə, Naxçıvan Muxtar Respublikası ilə bağlı materialların xarici dillərdə olmasının vacibliyini vurğulayıb.
İclasda bölmənin “Elmi əsərlər” jurnalının redaksiya heyətinin tərkibində qismən dəyişiklik edilib, “Gəmiqaya” adlı qəzetin nəşr edilməsi ilə bağlı qərar qəbul olunub.
Sonda bir sıra cari məsələlər müzakirə edilib.