Bakı, 17 fevral, AZƏRTAC

Nəsimi Rayon İcra Hakimiyyəti başçısı yanında şuranın geniş iclası keçirilib.

İcra hakimiyyətindən AZƏRTAC-a bildiriblər ki, iclasda 2019-cu ildə rayonun sosial-iqtisadi inkişafı istiqamətində görülən işlər müzakirə olunub.

İclasda çıxış edən icra hakimiyyətinin başçısı Asif Əsgərov bildirib ki, ötən il ölkəmizdə olduğu kimi, Bakının Nəsimi rayonunda da davamlı sosial-iqtisadi inkişaf təmin edilib, bir sıra layihələr uğurla həyata keçirilib. Qeyd edilib ki, Prezident İlham Əliyevin ötən ilin əvvəlində yerli icra strukturlarının qarşısında qoyduğu vəzifələrin Nəsimi rayonunda bütünlüklə və ardıcıl icrası ilin uğurla başa çatdırılmasını təmin edib.

Bildirilib ki, hesabat ilində Bakı şəhərinin Nəsimi rayonunun sosial-iqtisadi inkişafında, müəssisə və təşkilatların fəaliyyətində nəzərə çarpacaq müsbət irəliləyişlər olub.

Rayon üzrə iqtisadiyyatın bütün sahələrində mövcud olan artım dinamikası saxlanılıb, 9000 daimi iş yeri açılıb, orta aylıq əməkhaqqı əvvəlki illə müqayisədə 16,9 faiz artaraq, 762.6 manat təşkil edib.

Vurğulanıb ki, ötən tədris ilində rayonun orta məktəblərini 1574 nəfər bitirib, onlardan 1233 nəfəri tələbə adını qazanıb. Məzunlardan 327 nəfəri xarici ölkələrin ali məktəblərinə, 57 nəfəri 600-dən çox, 8 nəfəri 650-dən çox bal toplayaraq ali məktəblərə qəbul olublar.

İcra başçısı bildirib ki, Azərbaycan Respublikası Prezidentinin Sərəncamı ilə 2019-cu ilin “Nəsimi ili” elan edilməsi rayon üçün tarixi və əlamətdar hadisə olub, böyük Azərbaycan şairi İmadəddin Nəsiminin 650 illik yubileyi Nəsimi rayonunda da böyük fərəh və ruh yüksəkliyi ilə qeyd olunub. Ötən il abadlıq və quruculuq sahəsində də tədbirlər davam etdirilib. Qaz, elektrik enerjisi, istilik, su təchizatı və kanalizasiya sistemlərinin yaxşılaşdırılması, rayonun küçələrinin və məhəllədaxili yolların əsaslı təmiri, yenidənqurulması və işıqlandırılması işləri uğurla həyata keçirilib. Vətəndaşların rifahının daha da artırılması, onların asudə vaxtlarının səmərəli təşkilinin təmin edilməsi, sosial infrastrukturların yaradılması ilə bağlı tədbirlərin görülməsi barədə tapşırıqların icrası istiqamətində 2019-cu ildə geniş abadlıq-quruculuq işləri aparılaraq Asif Məhərrəmov küçəsi başdan-başa yenidən qurulub, binaların fasadları, liftlər, dam örtükləri təmir edilib, həyətlərdə abadlıq işləri aparılıb, yeni yaşıllıq zolaqları salınıb.

Qeyd olunub ki, vətəndaşların müəyyən edilmiş vaxtlarda qəbulu, onların müraciətlərinə əsaslandırılmış yazılı cavabların verilməsi, şəffaflığın artırılması, mövcud nöqsanların aradan qaldırılması məsələləri daim diqqət mərkəzində saxlanılıb.

Hesabat yığıncaqda çıxış edənlər rayonda görülmüş işləri yüksək qiymətləndirdilər, qarşıda duran vəzifələrdən, həlli vacib məsələlərdən söhbət açıblar.

Azərbaycan Respublikası Prezidenti Administrasiyasının sektor müdiri Tağı Tağıyev yığıncaqda çıxış edərək, 2020-ci ildə nəsimililərə daha böyük uğurlar arzulayıb.

Müzakirələrdən sonra cari ilin konkret hədəflərini əks etdirən qərar qəbul olunub. Toplantı iştirakçıları adından Prezident İlham Əliyevə ünvanlanan müraciətdə rayonun sürətli inkişafına göstərdiyi diqqət və qayğıya görə ölkə rəhbərinə minnətdarlıq ifadə olunub.