Bakı, 13 iyun (AZƏRTAC). İyunun 13-də Qaradağ rayonunun Lökbatan qəsəbəsində yerləşən Heydər Əliyev Mərkəzində “15 İyun -Xaosun sonu, milli qurtuluşun başlanğıcı” mövzusunda “dəyirmi masa” keçirilmişdir.

Qaradağ Rayon İcra Hakimiyyətindən AZƏRTAC-a bildirilmişdir ki, əvvəlcə tədbir iştirakçıları Ulu Öndərin abidəsi önünə güllər düzmüş, dahi şəxsiyyətə hörmət və ehtiramlarını bildirmişlər.

Qaradağ Rayon İcra Hakimiyyəti başçısının müavini Təranə İsmayılova çıxış edərək bu günün ölkəmizin tarixinə qızıl hərflərlə yazıldığını qeyd etmişdir. O, 1990-cı illərin əvvəllərində hökm sürən çox mürəkkəb və gərgin bir şəraitdə yenicə bərpa olunmuş dövlət müstəqilliyimizin möhkəmləndirilməsində, Azərbaycanın dövlətçilik ənənələrinin bərpa edilməsində ulu öndər Heydər Əliyevin misilsiz xidmətlərinin olduğunu vurğulamışdır. Bildirmişdir ki, Azərbaycanın taleyinin həll olunduğu ən ağır və faciəli günlərdə dahi rəhbərin xalqının təkidli tələbləri ilə yenidən hakimiyyətə qayıtması ölkəmizin tarixində həqiqətən dönüş nöqtəsi olmuşdur. Bu qayıdış Azərbaycan xalqının itirilmiş inamını özünə qaytardı, sabaha, gələcəyə olan ümidini artırdı. 15 İyun - Milli Qurtuluş Günü ulu öndər Heydər Əliyevin bütünlüklə xalqı azərbaycançılıq ideyası ətrafında birləşdirməsinin bariz sübutu olmuşdur. Məhz Heydər Əliyevin misilsiz fəaliyyəti nəticəsində ölkəmiz hərtərəfli inkişaf və tərəqqi yoluna qədəm qoymuşdur.

Digər çıxış edənlər o dövrdə xaos və anarxiya nəticəsində dövlətçiliyimizin itirilmək təhlükəsinin olduğu bildirmişlər. Qeyd edilmişdir ki, ölkənin hər bir tərəfindən fəallaşan silahlı dəstələr yenicə müstəqilliyini bərpa etmiş dövlətimizi parçalamaq niyyətində idilər. Lakin xalqın tələbi ilə hakimiyyətə qayıdan ümummilli lider Heydər Əliyev xalqına arxalanaraq daxili və xarici qüvvələrin Azərbaycan dövlətçiliyini məhv etmək, ölkəni parçalamaq, vətəndaş qarşıdurması yaratmaq kimi cəhdlərinin qarşısını qətiyyətlə almışdır. Məhz Heydər Əliyevin siyasi hakimiyyətə qayıdışından sonra ölkədə ilk demokratik prezident seçkiləri keçirilmişdir. 1994-cü ilin mayında Ermənistan ilə Azərbaycan arasında atəşkəsə nail olunmuşdur. Ölkənin ictimai-siyasi, iqtisadi, elmi-mədəni həyatında, beynəlxalq əlaqələrin genişlənməsində əsl dönüş yaranmışdır. 1994-cü ildə “Əsrin müqaviləsi”nin imzalanması ilə yeni neft strategiyasının həyata keçirilməsinə başlanmış, aparılan iqtisadi islahatlar nəticəsində ölkədə ictimai-siyasi sabitlik bərqərar edilmişdir. Müstəqil Azərbaycanın ilk Konstitusiyasının yaradıcısı olan Heydər Əliyev demokratik, hüquqi dövlət quruculuğu istiqamətində ardıcıl siyasət yeridərək ölkədə insan hüquq və azadlıqlarının bərqərar olması üçün əsaslı zəmin yaratmışdır. Ümummilli lider Heydər Əliyevin müəyyən etdiyi strateji xətt bu gün Prezident İlham Əliyev tərəfindən uğurla davam etdirilir.

Tədbirin sonunda rayonun ictimai-siyasi və mədəni həyatında fəal iştirak edənlərə hədiyyə, YAP-ın sıralarına yeni üzv olanlara vəsiqələr təqdim edilmişdir.