Bakı, 3 mart, AZƏRTAC

Əməkdar elm xadimi, Bakı Dövlət Universitetinin Botanika və bitki fiziologiyası kafedrasının müdiri, biologiya elmləri doktoru, professor, AMEA-nın müxbir üzvü Elşad Qurbanov Qotfrid Vilhelm Leybnits adına Avropa Təbiət Elmlər Akademiyasının akademiki seçilib.

Bu barədə AZƏRTAC-a Elşad Qurbanov məlumat verib.

Elşad Qurbanovun davamlı tədqiqatları nəticəsində çoxlu monoqrafiya, dərslik və dərs vəsaiti işıq üzü görüb. Bunlardan “Bitki ekologiyası (geobotanikanın əsasları ilə)”, “Rastitelnıy mir basseyna reki Naxiçevançaya”, “Bitki morfologiyası”, “Ali bitkilərin sistematikasından laboratoriya məşğələləri”, “Ali bitkilərin sistematikası”, “Dərman bitkiləri”, “Geobotanika”, “Bitki morfologiyası” və s. kitablar alimin qələminin məhsuludur. Onun Azərbaycan Respublikasının Milli Atlasında iki, Coğrafiya Atlasında bir ekoloji-geobotaniki xəritəsi dərc olunub. Bununla yanaşı, E.Qurbanov Azərbaycanın bir çox botaniki-coğrafi rayonlarının ekoloji-geobotaniki (13 xəritə) xəritəsini tərtib edib. XXI əsr Botaniklər kateqoriyasına yeganə azərbaycanlı botanik kimi daxil edilmiş alim 400-ə qədər elmi əsərin, 16 kitabın, 60-dan çox proqram və metodik göstərişin, 13 müəlliflik şəhadətnaməsinin müəllifi, 1 patentin, 17 kitabın elmi redaktorudur. O, dəfələrlə beynəlxalq və respublika elmi konfranslarında (Avropa ölkələrində, Rusiya, Türkiyə, Gürcüstan, İran) çıxış edib. İkicildlik Azərbaycanın “Qırmızı kitabı”nın ikinci nəşrinin redaksiya heyətinin üzvüdür.

Elşad Qurbanov, həmçinin BDU-nun Elmi şurasının üzvü, botanika, mikologiya və ətraf mühitin idarə edilməsi və bioloji monitorinq ixtisasları üzrə magistrantların dissertasiya müdafiə şurasının sədridir. O, botanika ixtisası üzrə AMEA-nın koordinasiya şurasının sədr müavinidir, AMEA Biologiya və Tibb Elmləri bölməsinin büro üzvüdür.

Görkəmli alim, eyni zamanda, Türkiyənin Ankara şəhərində fəaliyyət göstərən Türk Dünyası Araşdırmaları Beynəlxalq Elmlər Akademiyasının həqiqi üzvüdür və Beynəlxalq Qızıl Ulduz Medalı ilə təltif edilib. Hazırda onun botanika sahəsindəki fəaliyyətinin bir hissəsi erməni vandalları tərəfindən 30 ilə yaxın ekoloji terrora məruz qalmış Qarabağ florasının və biomüxtəlifliyinin əsaslı şəkildə öyrənilməsinə, məhv olmaq təhlükəsi qarşısında qalan növlərin qorunub saxlanılmasına dair tədbirlər planının hazırlanmasına yönəlib.