Ağcabədi, 18 may, Tahir Ağaməmmədov, AZƏRTAC

18 may... 29 il bu tarixi respublikamızın dilbər guşəsi olan Laçın rayonunun işğal günü kimi hüznlə qeyd etdik. Artıq kədərli, hüznlü günlərimiz geridə qalıb. Müzəffər Ali Baş Komandanın qətiyyəti, Azərbaycan Ordusunun gücü sayəsində doğma Qarabağımızın digər yerləri kimi, Laçın da azaddır. İndi laçınlılar mayın 18-ni daha hüznlə qeyd etmirlər. Düşmən üzərində möhtəşəm qələbənin xoş təəssüratını yaşayan laçınlılar illərdir həsrətində olduqları torpaqlara dönəcəkləri günü səbirsizliklə gözləyir, doğma yurdları, qayıdandan sonra görəcəkləri işlərlə bağlı xəyallar, planlar qururlar.

AZƏRTAC-ın bölgə müxbiri Ağcabədi rayonunun Taxtakörpü ərazisində məskunlaşmış Laçın rayonun Mişni kəndindən məcburi köçkün Həsənovlar ailəsinin qonağı olub, təəssüratlarını öyrənib.

Ailə başçısı Qurban Həsənov əvvəlcə kəndlərinin təbiətindən, gözəlliklərindən ağızdolusu bəhs edib: "Olduqca füsunkar təbiətə malik Mişni kəndi Qarabağ vulkanik yaylasının Hoçaz dağ silsiləsinin şimal-şərq yamaclarında Ərtəpə dağının ətəklərində, Həkəri çayının sahilində yerləşir. Mişni kəndinin ən hündür zirvələri Soyuqbulaq və Ərtəpə dağlarıdır. Kəndin dağları meşə və alp çəmənlərindən ibarətdir. Kəndin ərazisində 130-dan çox bulaq var idi. Onlardan Qızılbulaq, Şirinin bulağı, Sarıbulaq, Kahabulaq, Cabbarın bulağı, Kolovatın bulağı, Korra bulaq, Sərxun bulaqların adlarını çəkmək olar. Kənddəki Yanıx düz, Çimənlər, Alçəli, El yolu, Kəvşən, Çökəklər, Batıxlar, Çalbayır kimi özünəməxsus yer adları buranın qədim türk yurdu olduğundan xəbər verir. Çox təəssüf ki, 29 ildir bu gözəlliklərə həsrət qalmışdıq. Şükürlər olsun, Prezidentimizin qətiyyəti, ordumuzun gücü sayəsində torpaqlarımız işğaldan azad edildi və biz yenidən dağlar qoynunda olan yurdumuza qayıdacaq və bu gözəlliklər diyarında əbədi yaşayacağıq".

Qurban Həsənov Laçın rayonunun işğal edildiyi 29 il əvvəlki acı xatirələrdən də təəssüf hissi ilə danışıb. Bildirib ki, o dövrdə ölkədə xaos hökm sürürdü, insanlarda inamsızlıq var idi. Dövlət idarəçiliyində olan problemlər, hakimiyyət uğrunda mübarizə, vahid komandanlığın olmaması, ordunun Laçından çıxarılıb Bakıya aparılması nəticəsində rayon işğal olundu.

“İşğaldan sonra Ağcabədi rayonunun Taxtakörpü ərazisində məskunlaşdıq. Çox çətin, məşəqqətli həyat yaşamalı olduq. Palçıqdan daxmalar düzəldib orada yaşadıq. Ulu öndər Heydər Əliyev hakimiyyətə gələndən sonra biz dövlətin dəstəyini hiss etdik, gələcəyə inamımız yarandı. Tədricən ağır günlərdən çıxdıq. İlham Əliyev Prezident seçildikdən sonra isə məcburi köçkünlərin mənzil-məişət şəraiti daha da yaxşılaşdırıldı. Prezidentimizin məqsədyönlü siyasəti nəticəsində dövlətimiz qüdrətləndi, ordumuz gücləndi, işğal altında olan torpaqlarımız azad edildi. Laçın, Kəlbəcər və Ağdam rayonlarının Prezident İlham Əliyevin siyasəti nəticəsində şəhid verilmədən azad edilməsi isə çox böyük nailiyyətdir”, - deyə o qeyd edib.

Ailə başçısı deyir ki, hər il Laçının işğal gününü kədərli, ağır şəkildə qeyd edirdilər: “Nə xoş bizə ki, indi bu tarixi işğal olunmuş Laçının deyil, azad edilmiş Laçının sakinləri kimi xatırlayırıq. Torpaqlarımızın azad olunması sevincini bizə yaşatdığına görə Prezident İlham Əliyevə dərin təşəkkürümüzü bildiririk. Şəhidlərimizin ruhu qarşısında baş əyir, qazilərimizə Allahdan şəfa diləyirik. Kəndimiz, o doğma yerlər üçün isə xəyallarımız, istəklərimiz çoxdur. Kəndə qayıdanda ilk olaraq qəbiristanlığı ziyarət edəcəyəm, sonra evimizə, məktəbimizə gedəcəyəm. Kəndimiz əvvəlkindən də gözəl, yenidən qurulacaq və biz orada əbədi yaşayacağıq. Ən böyük arzum ailəmlə birgə tezliklə Laçına qayıtmaq və kəndimizdə müəllimlik fəaliyyətimi davam etdirməkdir”.