Bakı, 12 iyun, Səadət Hakıyeva, AZƏRTAC

Avropa İnsan Hüquqları Məhkəməsi Ermənistanın hazırda Azərbaycanda saxlanılan 11 vətəndaşının dərhal sərbəst buraxılması tələbini rədd edib. Bu, bir daha Azərbaycan hökumətinin əsir götürülən və beynəlxalq qanunlarla təsbit olunmuş, ölkənin daxili qanunvericiliyini və beynəlxalq hüququ pozan, habelə ağır müharibə cinayətləri törətməkdə şübhəli bilinən şəxslərə qarşı ölkəmizdə təşəkkül tapmış humanizm ənənələrinə həssaslıqla yanaşdığını nümayiş etdirdi. Nəzərə almalıyıq ki, Ermənistandan fərqli olaraq, Azərbaycanda hərbi əsirlərə və sərhədi pozaraq qanunsuz şəkildə ərazimizə daxil olan erməni vətəndaşlarına qarşı humanist münasibət göstərilib, bir çox mülki ermənini və hərbçini öz ölkəsinə geri qaytarıb.

AZƏRTAC xəbər verir ki, bu fikirləri Milli Məclisin deputatı Anar Məmmədov söyləyib.

Deputat bildirib ki, Azərbaycan Ordusunun sentyabrın 27-dən başlayaraq Ermənistanın işğalı altında olan torpaqlarımızın azad edilməsi istiqamətində həyata keçirdiyi hərbi əməliyyatlar nəticəsində düşmən böyük itkilər verib. Azərbaycan Ordusu tərəfindən əsir götürülən işğalçı ordunun əsgərlərinə dövlətimizin münasibəti bu gün də göz qabağındadır. Bütün əsirlərlə beynəlxalq tələblər səviyyəsində, humanistcəsinə davranılıb, yaralı erməni hərbçiləri ölkəmizin müasir xəstəxanalarında müalicə edilib, onlara insanlıq qayğısı göstərilib. Azərbaycanda saxlanılan bütün erməni hərbi əsirlər və mülki şəxslərlə 1949-cu il Cenevrə konvensiyalarının tələblərinə uyğun olaraq rəftar edilib.

A.Məmmədov vurğulayıb ki, ermənilərdən fərqli olaraq, azərbaycanlılar sülhsevər, humanist, bəşəri dəyərlərə önəm verən xalqdır. Vətən müharibəsi zamanı Azərbaycan tərəfi hərbi əsrlərə qarşı da humanist və qaydalara uyğun davranıb. Müharibə vaxtı ermənilərin Hadrut qəsəbəsində qoyub qaçdıqları yaşlı iki şəxs Azərbaycan tərəfindən Beynəlxalq Qırmızı Xaç Komitəsinin vasitəçiliyi ilə Ermənistana qaytarıldı. Amma Ermənistan nə Birinci, nə də İkinci Qarabağ müharibəsi dövründə azərbaycanlı əsirlərə qarşı bu cür humanist münasibətdə olmayıb.

“Təkcə Xocalıda əsir götürdükləri minlərlə azərbaycanlının başına gətirdikləri tükürpədici işgəncələri xatırlamaq onların əsirlərlə insanlıqdan uzaq rəftarını göz önünə gətirməyə yetir. Yaxın keçmişdə baş verən bu vandallıqlarla bağlı saysız-hesabsız faktlar, eləcə də erməni vəhşiliklərinə məruz qalan minlərlə canlı şahid var. Bütün bunlarla müqayisədə Ermənistanın hazırda Azərbaycanda saxlanılan 11 vətəndaşının dərhal sərbəst buraxılması tələbi əsassızdır və Avropa İnsan Hüquqları Məhkəməsi də qəbul etdiyi kimi, cinayət təqibi başa çatanadək bu şəxslərin həbsdə saxlanılması mütləqdir. Çünki Ermənistanın dərhal sərbəst buraxılmasını tələb etdiyi şəxslərdən ikisi - Lüdviq Mkrtçyan və Alyoşa Xosrovyan Azərbaycan vətəndaşlarına işgəncə verməkdə təqsirləndirilərək hazırda istintaqa cəlb olunublar. Azərbaycan da öz hüquq və öhdəliklərinə uyğun davranaraq, beynəlxalq və daxili hüququn müəyyən olunmuş prinsiplərinə riayət etməyə və bu təqibi başa çatdırmağa sadiqdir. Azərbaycan bu şəxslərin vəziyyəti ilə bağlı bütün tələbləri yerinə yetirib”, -deyə deputat qeyd edib.

Onun sözlərinə görə, bu gün regionda uzunmüddətli sülhün, əməkdaşlığın və təhlükəsizliyin təmin olunması üçün real şərait yaransa da, qarşı tərəfin buna hazır olmadığı ortadadır. Azərbaycan bu prosesə tam hazırdır. İndi növbə Ermənistanındır. Lakin Ermənistan faşizm və işğalçılıq niyyətindən əl çəkdiyini sübut etmək üçün, ilk növbədə, Birinci Qarabağ müharibəsi zamanı itkin düşmüş və əsir götürülmüş vətəndaşlarımız haqqında məlumatları Azərbaycan tərəfinə təqdim etməlidir.