ELM VƏ TƏHSİL
Şamaxı Astrofizika Rəsədxanasının kitabxanası müasir informasiya sistemi ilə təkmilləşdirilib
Bakı, 16 iyun, AZƏRTAC
AMEA-nın Mərkəzi Elmi Kitabxanasının (MEK) əməkdaşları akademiyanın elmi-tədqiqat institutlarının kitabxanalarında qabaqcıl kitabxana informasiya sistemini tətbiq etmək məqsədilə N.Tusi adına Şamaxı Astrofizika Rəsədxanasının (ŞAR) Elmi Kitabxanasına ezam olunublar.
Bu barədə AZƏRTAC-a AMEA-dan məlumat verilib. Bildirilib ki, MEK-in İnnovativ layihələr şöbəsinin müdiri Səyyarə Məmmədova, Avtomatlaşdırma və proqram təminatı şöbəsinin müdiri Natavan Hacıyeva, Reproqrafiya şöbəsinin müdiri Sərdar Cabbarov, Xarici dillərdə ədəbiyyat fondunun müdiri Kubra Sadıqova səfər əsnasında Mərkəzi Elmi Kitabxananın çoxşaxəli fəaliyyəti, iş prinsipləri və sistemi, mövcud bazaları, fondları haqqında həmkarlarına geniş məlumat veriblər. Eyni zamanda, ŞAR Elmi Kitabxanasının iş rejimi və fəaliyyəti, kitabxananın tarixi, mövcud fondları və fondlarının tərkibi, texniki avadanlıqları ilə yaxından tanış olublar.
MEK əməkdaşları tərəfindən kitabxananın elektron informasiya avadanlıqlarının vəziyyəti nəzərdən keçirilərək orada İRBİS-64 AKİS-in proqram təminatı quraşdırılıb (kitablar, jurnallar, tammətnli verilənlər bazaları yaradılıb). Dünyanın zəngin kitabxanalarında daha çox tətbiq olunan ARBİKON və LİBNET mərkəzləşdirilmiş kataloqlaşdırılma bazalarından istifadə edilərək, ŞAR Elmi Kitabxanasının fondlarında astronomiya və astrofizikaya aid rusdilli ədəbiyyatların verilənlər bazasına avtomatik yüklənməsi təmin edilib. Bu isə gün ərzində çox sayda kitabların bazaya daxil edilməsinə imkan verir. Beləliklə, Şamaxı Astrofizika Rəsədxanasının Elmi Kitabxanasının avtomatlaşdırılmış kitabxana elektron kataloqunun onlayn sisteminə qoşulması tam hazır vəziyyətə gətirilib. Sonra ŞAR Elmi Kitabxanasının əməkdaşları proqramdan istifadə qaydaları haqqında təlimatlandırılıb.
Qeyd edək ki, səfər zamanı MEK-in mübadilə fondundan Qarabağ tarixinə, həmçinin dahi Azərbaycan şairi və mütəfəkkiri Nizami Gəncəviyə aid 15 adda 49 nüsxə ədəbiyyat kitabxanaya hədiyyə edilib. Həmin kitablar əsasında MEK əməkdaşlarının iştirakı ilə ŞAR Elmi Kitabxanasında “Qarabağ Azərbaycandır!” və “Nizami Gəncəvi - 880” adlı sərgilər təşkil olunub.
Rəsədxananın Elmi Kitabxanası daha çox astronomiya və astrofizikaya dair elmi və elmi kütləvi ədəbiyyatlarla zəngindir. Kitabxanada, həmçinin Nəsirəddin Tusinin əsərlərinin iki əlyazması saxlanılır.