REGİONLAR
2014-cü ilin doqquz ayı beyləqanlılar üçün yaddaqalan və əlamətdar olub
2014-cü il beyləqanlılar üçün Prezident İlham Əliyevin Beyləqana səfəri ilə əlamətdar olub. Dövlət başçısı səfər zamanı Gənclər Mərkəzinin, şahmat məktəbinin, körpələr evi-uşaq bağçasının, Mərkəzi Şəhər Stadionunun və Birinci Şahsevən-Əhmədli-Dünyamalılar avtomobil yolunun açılışında iştirak edib, rayon gənclərinin və ictimaiyyətinin nümayəndələri ilə görüşüb.
AZƏRTAC xəbər verir ki, cari ilin doqquz ayının yekunları ilə bağlı Beyləqan rayonunda keçirilən yığıncaqda dövlətimizin başçısının regionların inkişafına diqqət və qayğısından minnətdarlıq hissi ilə söhbət açılıb. Qeyd edilib ki, səfərdə Prezident İlham Əliyev Beyləqan rayonunun sosial-iqtisadi inkişafının sürətləndirilməsi, Olimpiya İdman Kompleksinin inşası, Birinci Şahsevən-Əhmədli-Dünyamalılar avtomobil yolunun tikintisinin davam etdirilməsi ilə bağlı Sərəncamlar imzalayıb. Bu, rayonda aparılan abadlıq-quruculuq işlərinin daha geniş vüsət almasına şərait yaradıb.
Yığıncaqda bildirilib ki, hesabat dövründə Birinci Aşıqlı kənd tam orta məktəbi üçün 360 şagird yerlik, 2 nömrəli uşaq bağçası üçün 55 yerlik binaların, Dövlət Sosial Müdafiə Fondunun rayon şöbəsi, polis şöbəsi, maliyyə idarəsi, Dövlət Reyestr Xidmətinin 6 saylı idarəsinin inzibati binaları istifadəyə verilib, Bünyadlı, İkinci Şahsevən və şəhər 2 nömrəli tam orta məktəbləri əsaslı təmiri edilib. Hazırda Qarabağ müharibəsi əlilləri və şəhid ailələri üçün 54 mənzilli, 6 mərtəbəli yaşayış binasının, toxum müfəttişliyi və aqrokimya laboratoriyasının, Haramı və İmamverdililər kənd məktəblərinin tikintisi davam etdirilir, rayon telekommunikasiya qovşağı, “Azərpoçt” MMC-nin rayon filialının inzibati binası əsaslı təmir olunur.
Diqqətə çatdırılıb ki, 2014-cü ilin 9 ayı ərzində rayonda ümumi məhsul buraxılışı əvvəlki ilin eyni dövrü ilə müqayisədə 24 faiz artaraq 143 milyon manat, əsas kapitala yönəldilən investisiyalar 1,9 dəfə artaraq 45 milyon manat təşkil edib. İqtisadiyyat və Sənaye Nazirliyinin Sahibkarlığa Kömək Milli Fondunun xətti ilə 187 layihə üzrə sahibkarlara 7 milyon 059 min manat güzəştli kredit verilib.
Yığıncaqda əhalinin təbii qaz, elektrik enerjisi, rabitə və digər xidmətlərlə təminatının yaxşılaşdırılması istiqamətində görülən işlərdən, təhsil, mədəniyyət, səhiyyə və aqrar sahədə əldə olunan uğurlardan da bəhs edilib. Həmçinin mövcud problemlərə toxunulub, onların həllindən danışılıb.
Bildirilib ki, beyləqanlılar bundan sonra da Prezident İlham Əliyevin ətrafında sıx birləşərək, respublikamızın, eləcə də rayonun sosial-iqtisadi inkişafının yüksəldilməsində öz töhfələrini verəcəklər.