QAN YADDAŞI
20 Yanvar faciəsi Azərbaycan xalqının milli əzm və iradəsini qıra bilməyib
Naxçıvan, 16 yanvar, AZƏRTAC
Keçmiş Sovet İttifaqının qoşun hissələrinin 27 il bundan öncə fövqəladə vəziyyət elan edilmədən Bakı şəhərinə yeridilməsi nəticəsində Bakıda və Azərbaycanın digər rayonlarında 146 nəfər öldürülüb, 744 nəfər yaralanıb, 841 nəfər qanunsuz həbs olunub.
Naxçıvan Dövlət Universitetinin (NDU) mətbuat şöbəsindən AZƏRTAC-a bildirilib ki, bu faktlar ali təhsil ocağında keçirilən “20 Yanvar müstəqilliyimizin şəhidlik zirvəsidir” mövzusundakı “dəyirmi masa”da səsləndirilib.
Əvvəlcə Azərbaycan xalqının müstəqilliyi uğrunda şəhid olanların ruhu ehtiramla yad edilib.
NDU-nun rektoru, AMEA-nın müxbir üzvü Saleh Məhərrəmov Azərbaycan xalqının milli azadlıq hərəkatı və müstəqillik tarixindən, 20 Yanvar faciəsinin səbəblərindən bəhs edərək vurğulayıb ki, 20 Yanvar faciəsi xalqın əzm və iradəsini qıra, onu müstəqillik uğrunda mübarizəsindən döndərə bilməyib.
Rektor Azərbaycan xalqının ümummilli lideri Heydər Əliyevin bu faciəyə siyasi-hüquqi qiymət verilməsindəki xidmətlərindən danışaraq qeyd edib ki, ölkəmizin ərazi bütövlüyünün və dövlət müstəqilliyinin qorunması, şəhidlərin xatirəsinin əbədiləşdirilməsi, şəhid ailələrinin sosial şəraitlərinin yaxşılaşdırılması ilə bağlı bu gün də əhəmiyyətli işlər görülür.
“Dəyirmi masa”da Yeni Azərbaycan Partiyası universitet şəhərciyi ərazi ilk təşkilatının sədr müavini, dosent Xəzər Hüseynov çıxış edərək bildirib ki, 1990-cı ilin 20 Yanvarında süquta uğramaqda olan işğalçı sovet imperiyası milli azadlıq hərəkatını boğmaq məqsədilə əksəriyyəti ermənilərdən ibarət olan xüsusi təyinatlı ordunu Bakıya yeritdi, eyni zamanda, Naxçıvan erməni silahlılarının hücumlarına məruz qaldı. Belə ki, 1990-cı ilin yanvar ayında ermənilərin Sədərəyə hücumu zamanı Naxçıvan 9 şəhid verdi, 21 nəfər yaralandı.
Diskussiya zamanı qeyd olunub ki, 20 Yanvar hadisələrinə beynəlxalq müstəvidə hələ də düzgün siyasi qiymət verilməyib. Azərbaycan xalqının milli əsarətə qarşı mübarizəsi günü olan bu tarix, səhidlərimizin müqəddəs xatirəsi yaddaşlarda daim yaşayacaq.