QAN YADDAŞI
20 Yanvar faciəsi - xalqımızın azadlıq arzularına qarşı törədilən qəsd
Ağsu, 20 yanvar, AZƏRTAC
Minlərlə ağsulu yanvarın 20-də səhər saatlarında şəhərdəki Qəhrəmanlıq kompleksinə, oradan isə şəhid məzarlığına gələrək iyirmi yeddi il əvvəl sovet imperiyası hərbi hissələrinin Bakıda törətdiyi qətliamı yad ediblər. Qərənfillərlə örtülən xatirə kompleksi və şəhid məzarları insanların vətənin azadlığı, torpaqlarımızın bütövlüyü uğrunda qurban gedənlərin xatirəsinə dərin ehtiramının təcəssümü idi.
AZƏRTAC xəbər verir ki, izdihamlı mərasimdəki çıxışlarda yanvarın 19-dan 20-nə keçən gecə dinc, əliyalın insanların, o cümlədən uşaqların, qadınların və qocaların gülləbaran edilmələrinin Azərbaycan tarixinin qanla yazılan səhifələrindən olduğu vurğulanıb.
Qanlı faciəni bir daha yad edən çıxışçılar hələ o vaxt Moskvada ikən həyatını təhlükəyə qoyaraq bu hadisələrə ilk siyasi qiymət verən ulu öndər Heydər Əliyevin cəsarətli bəyanatından danışıblar. Bildiriblər ki, Ümummilli Liderimiz keçirdiyi mətbuat konfransında bu terror aktına rəvac verən hakimiyyət nümayəndələrini və hərbçiləri cinayətkar adlandırıb.
Həmin gün rayon mədəniyyət sarayında 20 Yanvara həsr edilən sənədli film göstərilib, “Şəhid ruhlar” adlı ədəbi-bədii kompozisiya nümayiş etdirilib.
x x x
Şamaxıda rayon icra hakimiyyətinin, hüquq-mühafizə orqanlarının, idarə, müəssisə və təşkilatların kollektivləri, ictimaiyyətin çoxsaylı nümayəndələri 20 Yanvar hüzn gününü izdihamlı mərasimlə qeyd ediblər.
Səhər saatlarında mərasim iştirakçıları şəhidlərin xatirəsinə ucaldılan abidəni ziyarət ediblər. Öncə ölkəmizin müstəqilliyi, xalqımızın azadlığı uğrunda canlarını qurban verən qəhrəman Vətən övladlarının xatirəsi bir dəqiqəlik sükutla yad edilib, onların ruhuna dualar oxunub.
Çıxışlarda vurğulanıb ki, 20 Yanvar xalqımızın qürur və qəhrəmanlıq tarixidir. Bu gün hər birimiz Azərbaycanın azadlığı uğrunda canlarından keçən şəhidlərimizlə fəxr edirik. Onların əziz xatirəsi həmişə olduğu kimi, bu gün də Şamaxıda böyük ehtiramla yad olunur.
Ziyarətə gələn izdiham məzarları təzə-tər çiçəklərə bürüyüb, abidənin önünə əklillər düzüblər.
Rayon rəhbərləri Qanlı Yanvar faciəsində şəhid olan Vidadi Məmmədovun və Ağanəzər İsrayılovun məzarlarını ziyarət edib, onların ailə üzvləri ilə birlikdə ehsan süfrəsində iştirak edib, qayğıları ilə maraqlanıblar.
x x x
Kürdəmir rayonunda 20 Yanvar faciəsinin iyirimi yeddinci ildönümü qeyd edilib.
Səhər saatlarında rayon rəhbərləri, ictimaiyyətin çoxsaylı nümayəndələri ilk öncə ötən il aprel döyüşlərində erməni mövqelərinə aviasiya zərbələri endirən zaman düşmən tərəfindən vurulan Mİ-24 helikopterində şəhid olan hərbçimiz baş leytenant Əbu Bəkr İsmayılovun yaşadığı evin qarşısındakı barelyefin önünə gül dəstəsi qoyublar.
Sonra tədbir iştirakçıları 20 Yanvar parkında “Ana harayı” abidəsini ziyarət edib, önünə gül dəstələri düzüb, şəhidlərin xatirəsini ehtiramla yad ediblər. Burada məktəblilərin ifasında 20 Yanvar faciəsinə həsr edilən əbədi-bədii kompozisiya nümayiş etdirilib, şagirdlərin əl işlərindən ibarət rəsm və kitab sərgisinə baxış olub.
İzdiham Şəhidlər xiyabanında ucaldılan “Şəhidlər” abidəsini, şəhidlərin uyuduğu məzarları ziyarət edərək üzərinə çiçəklər qoyub.
Mərasim iştirakçıları, sonra aprelin döyüşlərində qəhrəmancasına şəhid olan Sığırlı kənd sakini, Azərbaycan Ordusunun giziri Tural Qurbanovun, habelə rayon ərazisində olan digər şəhidlərin məzarlarını ziyarət ediblər.
x x x
İsmayıllıda yanvarın 20-də səhər mədəniyyət mərkəzinin yanındakı monitorda 20 Yanvar faciəsini əks etdirən, çoxsaylı tamaşaçının izlədiyi filmlərin nümayişi ilə açılıb.
Mərkəzi meydana toplaşan böyük izdiham saat 10-dan başlayaraq axın-axın Şəhidlər xiyabanını ziyarətə gəlib. Burada şəhidlərin xatirəsinə xütbə oxunub, dua verilib.
Sonra ziyarətçilər məzarlara qərənfillər düzüb, Vətənimiz, dövlətçiliyimiz, müstəqilliyimiz uğrunda şəhid olanları ehtiramla yad ediblər.
Şəhidlər xiyabanını ziyarətdən sonra mədəniyyət mərkəzində “20 Yanvar - Qan yaddaşımızdır” mövzusunda ədəbi-bədii kompozisiya nümayiş etdirib.
Həmin gün rayon icra hakimiyyətinin rəhbərliyi şəhid ailələri ilə görüşüb, onların qayğıları ilə maraqlanıb.