20 Yanvar şəhidi, ağdaşlı güləşçi Müşfiq İsayevin xatirəsi həmişə qəlblərdə yaşayacaq
Ağdaş, 20 yanvar, Şahnəzər Bəşirov, AZƏRTAC
1990-cı il yanvarın 20-də Bakıda baş verən qanlı hadisələr Azərbaycan xalqının qəhrəmanlıq tarixinin şərəfli səhifəsidir. Həmin gün sovet ordusu əliyalın və günahsız insanlara qarşı qətliam törətməklə azadlığına qovuşmaq istəyən xalqımızın səsini terrorla boğmağa çalışıb. Buna baxmayaraq, Azərbaycanın vətənpərvər övladları düşmən hərbiçilərin qarşısına silahsız çıxaraq şəhidlik zirvəsinə yüksəliblər, qəhrəmanlıq salnaməsinə parlaq səhifələr yazıblar.
AZƏRTAC-ın bölgə müxbiri xəbər verir ki, 28 il əvvəl “Qanlı şənbə” gecəsində Bakıda şəhid olan insanlar arasında məşhur güləşçi, milli azadlıq hərəkatının gənc fəallarından olan Müşfiq İsayev də olub. 20 yanvar faciəsinin qurbanı olmuş Müşfiq İsayev doğulduğu Ağdaş şəhərində, Şəhidlər xiyabanında dəfn edilib. Onu yaşadığı rayonda həmişə vətənpərvər, xalqını ürəkdən sevən, qorxmaz bir gənc kimi tanıyırlar.
Müşfiq İsayevin anası İzafət İsayeva AZƏRTAC-ın bölgə müxbirinə müsahibəsində şəhid oğlu barədə xatirələrini bölüşüb. O, Müşfiq İsayevin əvvəlcə Rusiyada qida sənayesi ixtisası üzrə alı təhsil aldığını, 1987-1989-cu illərdə hərbi xidmətdə olduğunu, Bakıya qayıtdıqdan sonra isə orada sərbəst güləş üzrə məşqlərə getdiyini bildirib. Yanvarın 19-dan 20-nə keçən gecə saat 4:00 radələrində Bakı xəstəxanalarının birindən tibb işçisi Ağdaşdakı evimizə telefonla zəng edərək şəhərdə dəhşətli qırğın törədilməsi, çoxlu insanların, o cümlədən güllə yarası alan Müşfiq İsayevin də ölməsi barədə məlumat verib. O, Biləcəri qəsəbəsi ərazisində düşmən gülləsinə tuş gəlib. Müşfiq İsayevin cənazəsi çox çətinliklə hərbçilərin nəzarətində olan Bakıdan çıxarılıb və Ağdaşa gətirilərək dəfn edilib. Vətənpərvər gənc Müşfiq İsayev 22 yaşında dünyasını dəyişərək Ağdaşın ilk şəhidi olub. Sonradan Qarabağ torpaqları uğrunda gedən döyüşlərdə Ağdaşın başqa mərd oğulları da şəhid olub. Onlar Müşfiqin məzarının yanında dəfn edilib və həmin ərazi Şəhidlər xiyabanına çevrilib.
Şəhid anası İzafət İsayeva deyib: “Yeddi övladım (beş oğlan, iki qız) var idi. Ailəmizdə ilk bədbəxt hadisə Natiq adlı övladımın 2 yaşında rəhmətə getməsi olub. Sonra isə Müşfiq İsayevin ölümü ailəyə növbəti kədəri yaşadıb. İllər sonra isə bu ailənin böyük oğlu Zaur İsayev rəhmətə gedib. Hazırda 4 övladım (iki qardaş, iki bacı) var. Milli Olimpiya Komitəsinin vitse-prezidenti, “Gömrükçü” İSM-nin baş direktoru, 1985-91-ci illərdə güləş üzrə dəfələrlə Avropa və dünya çempionu olmuş Xəzər İsayev oğluna qardaşı Müşfiqin adını qoyub. O, istəyir ki, oğlu da qardaşı kimi vətənpərvər olsun, xalqını ürəkdən sevsin. Müşfiq Xəzər İsayevin kiçik qardaşıdır. O, da qardaşı kimi güləşin sərbəst növü üzrə məşğul olub, Xəzər İsayev kimi nəticələr verə bilməsə də, sevilən güləşçilər sırasına düşə bilib. Qardaşlar döşəkdə rəqib, kənarda qardaş olublar”.
Qeyd edək ki, şəhid Müşfiq İsayevin ölümündən sonra onun xatirəsini yaşatmaq üçün bir sıra işlər görülüb. 1997-ci ildən başlayaraq hər il Bakıda 20 yanvar şəhidi Müşfiq İsayevin xatirəsinə həsr olunmuş sərbəst və yunan-Roma güləşi üzrə beynəlxalq turnir təşkil edilir. Bundan əlavə onun xatirəsinə doğulduğu Ağdaş şəhərinin mərkəzində küçə və orta məktəb də var. Rayonda şəhidin büstü qoyulub. Bu gün Ağdaş şəhərindəki Şəhidlər xiyabanında anım mərasimi keçirilib, Müşfiq İsayevin ata ocağında ehsan verilib. Şəhid Müşfiq İsayevin xatirəsi xalqımızın qəlbində həmişə yaşayacaq.
Bölmənin digər xəbərləri
