QAN YADDAŞI
20 Yanvar şəhidlərinin xatirəsi Qarabağ bölgəsində böyük ehtiramla yad edilib
Ağdam, 20 yanvar, Tahir Ağaməmmədov, AZƏRTAC
Azərbaycan xalqının qan yaddaşına əbədi həkk olunmuş 20 Yanvar faciəsinin 27-ci ildönümü Qarabağ bölgəsində böyük ehtiramla yad edilib.
AZƏRTAC xəbər verir ki, Tərtər rayonunda 20 Yanvar faciəsi qurbanlarının xatirəsinə həsr olunmuş tədbir Şəhidlər abidəsinin önündən başlanıb. Tərtərlilər abidə-kompleksin önünə tər çiçəklər düzərək şəhidlərin xatirəsini ehtiramla yad ediblər. Tədbir iştirakçıları məktəblilərin faciəyə həsr etdikləri əl işlərindən ibarət sərgiyə baxıblar.
Tədbir Gənclər Mərkəzində davam etdirilib. Rayon icra hakimiyyətinin başçısı Müstəqim Məmmədov çıxış edərək 27 il əvvəl sovet ordusu tərəfindən Bakıda həyata keçirilən qırğının səbəbləri və ağır nəticələri barədə ətraflı danışıb. Bildirib ki, milli azadlığı, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, kütləvi terror nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi. Tanklar və BTR-lər Bakı küçələrində qarşılarına çıxan hər şeyi əzir, hərbçilər hər yanı amansız atəşə tuturdular. İnsanlar nəinki küçələrdə, hətta avtobusda gedərkən, öz mənzillərində güllələrə tuş gəlirdilər. Yaralıları aparmağa gələn “təcili yardım” maşınları və tibb işçiləri də atəşə məruz qalırdı. Qanlı hadisələr zamanı 147 nəfər qətlə yetirilib, 744 nəfər yaralanıb, 841 nəfər qanunsuz həbs edilmişdi. Yaralananlar arasında 25 qadın və 20 uşaq vardı. Onlardan bəziləri ömürlük şikəst oldu.
Tədbirdə 20 Yanvar hüzn günü münasibətilə keçirilən inşa yazı müsabiqəsinin qaliblərinə diplomlar təqdim edilib. Sonra iştirakçılar mədəniyyət evinin hazırladığı “Tarixdə tarix tək qaldı o gecə” kompozisiyasına baxıblar.
Saat 12:00-da rayon ərazisində şəhidlərin xatirəsi bir dəqiqəlik sükutla yad edilib.
xxx
Yanvarın 20-də Ağdam rayonunun girişindəki Şəhidlər abidə kompleksini minlərlə insan ziyarət edib. Rayon rəhbərliyi, ağsaqqallar, gənclər, ziyalılar, əmək kollektivlərinin nümayəndələri, müharibə veteranları, şəhid ailələrinin üzvləri, hərbçilər abidə kompleksi önünə tər qərənfillər düzüblər. Azərbaycanın müstəqilliyi və ərazi bütövlüyü uğrunda şəhid olmuş Vətən övladlarının ruhuna dualar oxunub.
Ümumrayon anma mərasimində çıxış edənlər xalqımızın azadlıq mübarizəsindən, 20 Yanvar faciəsinin səbəblərindən və ağır nəticələrindən danışıblar. Bildirilib ki, 20 Yanvar xalqımızın tarixinin həm faciəli, həm də şərəfli səhifəsi, hər bir azərbaycanlı üçün qürur mənbəyidir. Çıxışlarda qanlı Yanvar hadisələrinə siyasi-hüquqi qiymət verilməsində, faciənin günahkarlarının üzə çıxarılmasında, şəhidlərin adının əbədiləşdirilməsində ümummilli liderimiz Heydər Əliyevin əvəzsiz tarixi xidmətlərindən bəhs edilib.
Tədbirdə Ağdam Dram Teatrının və məktəblilərin hazırladığı kompozisiya göstərilib.
Saat 12.00-da 20 Yanvar şəhidlərinin əziz xatirəsi bir dəqiqəlik sükutla yad olunub, avtomobillərdən səs siqnalları verilib.
xxx
20 Yanvar faciəsinin 27-cı ildönümü Ağcabədidə silsilə tədbirlərlə qeyd edilib. Yeni Azərbaycan Partiyası rayon təşkilatı Qadınlar Şurası, Gənclər Birliyi, mərkəzləşdirilmiş kitabxana sistemi və təhsil müəssisələrinin birgə təşkilatçılığı ilə rayonun müəssisə və təşkilatlarında, yaşayış məntəqələrində müxtəlif tədbirlər keçirilib. Tədbirlərdə Azərbaycanın dövlət himni səsləndirilib, respublikamızın müstəqilliyi və ərazi bütövlüyü uğrunda canından keçən Vətən övladlarının xatirəsi yad edilib. Ağcabədi Regional Mədəniyyət və Turizm İdarəsi və təhsil müəssisələri tərəfindən hazırlanmış ədəbi-bədii kompozisiyalar, rəsm sərgisi, həmçinin faciəyə həsr olunmuş filmlər nümayiş etdirilib.
Yanvarın 20-də Ağcabədi şəhərindəki Şəhidlər xiyabanında böyük izdiham yaşanıb. Xiyabana axışan ağcabədililər abidə kompleksi önünə və şəhid məzarları önünə tər qərənfillər düzüb, 20 Yanvar faciəsində həlak olan qəhrəman Vətən övladlarının xatirəsini böyük ehtiramla yad ediblər. Anım mərasimində Azərbaycanın dövlət himni səsləndirilib, şəhidlərin ruhuna dualar oxunub.
Tədbirdə çıxış edən rayon icra hakimiyyətinin başçısı Şahin Məmmədov 1990-cı il yanvarın 20-də törədilmiş faciədən, Vətənin azadlığı və ərazi bütövlüyü uğrunda canlarından keçən həmvətənlərimizin mübarizliyindən danışıb. Bildirib ki, 20 Yanvar Azərbaycan xalqının tarixində ümumxalq hüzn günü olmaqla yanaşı, azadlıq qələbəsinin təntənəsi günü kimi də əbədi həkk olunub.
Tədbir ümumtəhsil məktəblərinin şagirdlərinin ifasında ədəbi-bədii kompozisiya ilə davam edib.
xxx
20 Yanvar faciəsi qurbanlarının xatirəsi Füzuli rayonunda da dərin hüznlə yad edilib. Rayon ictimaiyyəti, ağsaqqallar, gənclər, ziyalılar, əmək kollektivlərinin nümayəndələri, əsgərlər Horadiz şəhərindəki Qəhrəmanlar parkına gələrək, Azərbaycanın suverenliyi və ərazi bütövlüyü uğrunda canından keçmiş Vətən övladlarının xatirəsinə ehtiramlarını bildirib, abidə önünə tər çiçəklər düzüblər.
Mərasimdə çıxış edən rayon icra hakimiyyətinin başçısı Alı Alıyev 20 Yanvar hadisələrini Azərbaycan xalqının azadlığı və ərazi bütövlüyü uğrunda qəhrəmanlıq mübarizəsi kimi səciyyələndirib. Bildirib ki, 20 Yanvar faciəsi Azərbaycan xalqının azadlığı uğrunda apardığı mübarizəsinin şanlı səhifəsidir. Ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları həmin gün canlarından keçərək şəhidlik zirvəsinə ucalıblar. Böyük itkilərlə, günahsız insanların qətlə yetirilməsi ilə nəticələnən bu faciə eyni zamanda xalqımızın mübarizliyini, əyilməzliyini və məğrurluğunu bir daha nümayiş etdirib. Müstəqil Azərbaycan durduqca faciə qurbanlarının xatirəsi də daim qəlblərdə yaşayacaq.
Saat 12:00-da bütün respublikamızın hər yerində olduğu kimi Füzuli rayonunda da 20 Yanvar şəhidlərinin xatirəsi bir dəqiqəlik sükutla yad edilib.
xxx
Yanvarın 20-də Bərdə şəhərindəki Qəhrəmanlar parkında keçirilən ümumrayon anma mərasimində minlərlə insan iştirak edib. Rayon ictimaiyyətinin nümayəndələri əvvəlcə Şəhidlər xiyabanına gedərək respublikamızın müstəqilliyi və ərazi bütövlüyü uğrunda şəhid olanların məzarları üzərinə tər qərənfillər qoyublar.
Mərasimdə çıxış edənlər 1990-cı il yanvar ayının 20-də Bakıda sovet hərbçiləri tərəfindən törədilən faciənin dəhşətlərindən danışıb, qanlı hadisəni Azərbaycan xalqının azadlıq mübarizəsinin və qəhrəmanlıq salnaməsinin parlaq səhifəsi adlandırıblar.
Tədbirdə məktəblilərin hazırladığı ədəbi-bədii kompozisiya nümayiş olunub. Saat 12.00-da 20 Yanvar şəhidlərinin əziz xatirəsi bir dəqiqəlik sükutla yad olunub, avtomobillərdən səs siqnalları verilib.