CƏMİYYƏT


212 nəfər əlilliyi olan şəxs peşə hazırlığı və əlavə təhsil kurslarına cəlb edilib

Bakı, 1 avqust, AZƏRTAC

Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti əlilliyi olan şəxslərin məşğulluğunun təminatı işlərini davam etdirir.

Nazirliyin ictimaiyyətlə əlaqələr şöbəsindən AZƏRTAC-a bildiriblər ki, cari ilin yanvar-iyun aylarında Xidmətin həyata keçirdiyi aktiv məşğulluq tədbirləri nəticəsində 260 nəfər əlilliyi olan şəxs münasib işlərlə təmin olunub.

Nazirlər Kabinetinin “Sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşlar üçün kvota tətbiq edilməsi Qaydası” əsasında sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşlar üçün idarə, müəssisə və təşkilatlarda kvota üzrə iş yerləri ayrılır. Əlilliyi olan şəxslər də həmin vətəndaşların kateqoriyasına aiddirlər və bu ilin 6 ayında Xidmət tərəfindən işlə təminatı həyata keçirilən əlilliyi olan şəxslərdən 89 nəfərinin kvota üzrə iş yerlərində məşğulluğu təmin olunub.

Bu il nazirliyin xətti ilə peşə hazırlığı və əlavə təhsil kurslarına cəlb edilənlər sırasında əlilliyi olan şəxslərin sayı 212 nəfər olub. Onlardan 62 nəfəri üçün nazirlik yanında Dövlət Məşğulluq Xidməti tərəfindən əmək bazarında tələb olunan peşələr üzrə peşə hazırlığı və əlavə təhsil kursları təşkil edilib. Qalan 150 nəfər isə nazirlik yanında Dövlət Sosial Müdafiə Fondunun 1 saylı Sağlamlıq imkanları məhdud gənclərin Peşə Reabilitasiya Mərkəzində peşə hazırlığına cəlb olunub. Kursları bitirənlər peşə sertifikatları ilə təmin edilməklə yanaşı, onların yeni yiyələndikləri peşələr üzrə məşğulluqlarının təmin olunması üçün də nazirliyin məşğulluq orqanları tərəfindən müvafiq işlər aparılıb.

Ümumilikdə, cari ilin yanvar-iyun aylarında Əmək və Əhalinin Sosial Müdafiəsi Nazirliyi tərəfindən 33 min 654 nəfər işsiz və işaxtaran vətəndaş münasib işlərlə təmin edilib, 2 min 406 nəfər isə peşə hazırlığı və əlavə təhsil kurslarına cəlb olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.