ELM VƏ TƏHSİL
Elmi nəşrlərin beynəlxalq reytinq göstəricilərini yaxşılaşdırmaq imkanları müzakirə olunub
Bakı, 20 may, AZƏRTAC
Bakı Dövlət Universitetində (BDU) Elmi fəaliyyətin təşkili və innovasiyalar mərkəzinin Elmi tədqiqatların təşkili və təhlili şöbəsinin təşkilatçılığı ilə “Elmi nəşrlərlə bağlı beynəlxalq reytinq göstəricilərinin yaxşılaşdırılması imkanları” mövzusunda elmi seminar keçirilib.
BDU-dan AZƏRTAC-a bildirilib ki, seminarda Elmi tədqiqatların təşkili və təhlili şöbəsinin müdiri dosent Mirnamik Bəşirov elmi nəşrlərin yaxşılaşdırılması istiqamətində ölkədə görülən işlərdən, bununla əlaqədar təşkil olunmuş Biznes mühiti və beynəlxalq reytinqlər üzrə komissiya və “Elmi nəşrlərlə bağlı beynəlxalq reytinq göstəricilərinin yaxşılaşdırılması ilə əlaqədar 2022-ci il üçün Yol xəritəsi” haqqında danışıb.
M.Bəşirov elmi nəşrlərin reytinq göstəricilərinin yaxşılaşdırılması istiqamətində BDU-da aparılmış və nəzərdə tutulmuş işlər haqqında da məlumat verib. Bildirib ki, “Tətbiqi və hesablama riyaziyyatı” beynəlxalq jurnalı 2002-ci ildə təsis edilib. Jurnal tətbiqi və hesablama riyaziyyatının geniş spektri üzrə yüksəkkeyfiyyətli resenziyalı tədqiqat məqalələrini dərc edir və hazırda impakt faktoru 3,898-dir.
1999-cu ildə yaradılmış “Journal of Pure and Applied Mathematics” jurnalı 2010-cu ildə Türk Dünyası Riyaziyyat Cəmiyyəti və Bakı Dövlət Universitetinin Tətbiqi Riyaziyyat İnstitutu tərəfindən birgə təsis olunub. Məruzəçi jurnalın Türkiyə, Qazaxıstan, Azərbaycan, Qırğızıstan, Özbəkistan, Rusiya, İran, Çin, ABŞ və Avropa ölkələrinin riyaziyyatçılarını birləşdirdiyini vurğulayıb. Jurnalın impakt faktoru 1,892-dir.
Məruzədə Hirş əmsalı, onun təyini, istinad əmsalı, impakt faktor və onun təyini, istinad əmsalının artırılması imkanları və elmi nəşrlərdə diqqət çəkən digər məqamlara da toxunulub, açar sözlərin əhəmiyyəti və onların seçilmə texnologiyasından bəhs edilib. Elmi nəşrlərin reytinqinin yaxşılaşdırılması istiqamətində qarşıda görüləcək işlər barədə də məlumat verilib.
Sonda məruzəçi verilən sualları cavablandırıb.