CƏMİYYƏT
“21 Sentyabr - Beynəlxalq Sülh Günüdür” mövzusunda “dəyirmi masa” keçirilib
AZƏRTAC xəbər verir ki, tədbirdə Bakı Regional Mərkəzinin şəxsi heyəti, Ombudsman Aparatının, Ailə, Qadın və Uşaq Problemləri üzrə Dövlət Komitəsinin nümayəndələri iştirak edib.
Tədbirdə müharibə, terror və digər silahlı münaqişələrin qurbanı olmuş insanların xatirəsi bir dəqiqəlik sükutla yad olunub.
“Dəyirmi masa”nın əhəmiyyətindən danışan Bakı Regional Mərkəzinin rəis müavini Tale Şamçıyev bildirib ki, Azərbaycanda Ombudsmanın təşəbbüsü ilə hər il avqustun 21-dən sentyabrın 21-dək”Beynəlxalq Sülh Günü” aylığı keçirilir. Beynəlxalq Sülh Günü BMT-nin elan etdiyi yeganə rəsmi bayramdır. BMT həmin günü dünyanın bütün qaynar nöqtələrində atəşkəsin gözlənilməsini tələb edir.
Sonra Mərkəzin sektor müdiri Anar İbrahimov “Sülh günü – tarixi arayış” mövzusunda məruzə ilə çıxış edib.
Vurğulanıb ki, Beynəlxalq Sülh Günü BMT Baş Assambleyasının təşəbbüsü ilə Yer üzündə atəş və zorakılıqdan qlobal imtina günü kimi qeyd edilir. Bu bayram BMT Baş Assambleyasının 1981-ci il 30 noyabr tarixli qərarı ilə bütün dünya tərəfindən 1982-ci ildən qeyd olunmağa başlayıb.
Həmin vaxtdan etibarən hər il BMT-nin baş katibi dünya xalqlarına müraciət edir. 1954-cü ildə BMT-nin Nyu-Yorkdakı qərargahının həyətində Yaponiya tərəfindən bağışlanmış “Sülh zəngi” quraşdırılıb. Bu zəngin gövdəsi dünyanın bütün qitələrini təmsil edən 60 ölkənin uşaqları tərəfindən toplanaraq Xirosima və Naqasaki faciələrinin baş verdiyi Yaponiyaya göndərilən metal pulların, yüzlərlə döyüşçüyə məxsus orden və medalların ərintisindən hazırlanıb. Hər il bu bayram məhz “Sülh Zəngi”nin çalınması ilə başlayır.
Ombudsman Aparatının sektor müdiri Rəşid Rumzadə “Sülh hüququ insan hüquqlarının tərkib hissəsi kimi” mövzusunda çıxışında təmsil etdiyi qurumun FHN ilə sıx əməkdaşlığı çərçivəsində belə tədbirlərin təşkilinin böyük əhəmiyyət daşıdığını bildirib.
Ailə, Qadın və Uşaq Problemləri üzrə Dövlət Komitəsinin şöbə müdiri Taliyə İbrahimova insan hüquq və azadlıqlarının müdafiəsi sahəsində həyata keçirilən dövlət siyasətindən danışıb.
Aparılan müzakirələrdə cəmiyyətdə sülhün, təhlükəsizliyin və sabitliyin vacibliyi vurğulanıb, o cümlədən Ermənistan-Azərbaycan, Dağlıq Qarabağ münaqişəsinə toxunulub. Münaqişənin həllinin tapılmamasının regionda təhlükəsizliyə əngəl olduğu bildirilib. Vurğulanıb ki, Azərbaycan münaqişənin beynəlxalq hüququn norma və prinsipləri əsasında, sülh yolu ilə həllinə tərəfdar olduğunu dəfələrlə nümayiş etdirsə də, təcavüzkar Ermənistan tamamilə bunun əksini göstərməkdədir. Ermənistan nəinki atəşkəsə əməl etmir, BMT Təhlükəsizlik Şurasının qəbul etdiyi 4 qətnamənin tələblərini kobud şəkildə pozmaqda davam edir.
Sonda sülh mövzusuna həsr edilən videomaterialların təqdimatı olub.