Bakı, 18 noyabr, Elvin Camalov, AZƏRTAC

Daha bir marşrutun hərəkət istiqaməti dəyişdirilib.

AZƏRTAC xəbər verir ki, bu barədə Bakı Nəqliyyat Agentliyinin ictimai əlaqələr və maarifləndirmə şöbəsinin müdiri N.Allahyarova deyib.

O bildirib ki, müntəzəm olaraq 21 nömrəli avtobus xətti ilə bağlı metronun Əhmədli stansiyası, Məhəmməd Hadi küçəsi, Ukrayna dairəsi, Gəncə prospekti, Zığ yolu, Nobel prospekti, Həzi Aslanov qəsəbəsi, metronun “Xətai” stansiyası, Səməd Vurğun bağı ətrafındakı ərazilərdə yaşayan sərnişinlər tərəfindən Bakı Nəqliyyat Agentliyinə şikayətlər daxil olub. Buna səbəb nəqliyyat vasitələrinin istismarı zamanı onların texniki vəziyyətinə dair müəyyən edilmiş tələblərə riayət edilməməsi, nəqliyyat vasitələrinin texniki cəhətdən saz vəziyyətdə saxlanılması üçün onlara vaxtlı-vaxtında texniki xidmət göstərilməməsi, texniki cəhətdən nasaz olan nəqliyyat vasitələrinin yol hərəkətinə buraxılması, avtobusun öz istismar müddətini tamamilə başa vurması, texniki cəhətdən yararsızlığı, avtobusun salonunun natəmizliyi, oturacaqların yararlı vəziyyətdə olmaması, mühəndis-konstruksiya hissələrinin tam olmamasıdır. Bakı Nəqliyyat Agentliyi tərəfindən dəfələrlə monitorinqlər keçirilərək şikayətlərin əsaslı olduğu faktı öz əksini tapıb.

N.Allahyarovanın sözlərinə görə, bütün bunları nəzərə alan Bakı Nəqliyyat Agentliyi 21 nömrəli avtobus xəttinin istifadə hüququnu 3 saylı “Bakı Avtonəqliyyat Müəssisəsi”ndən alaraq “BakuBus” MMC-nin istifadəsinə verməklə həmin xətt üzrə ən yeni və müasir tələblərə cavab verən “İVECO” markalı, yüksək standartlara uyğun avtobusları sərnişinlərin istifadəsinə verib. Bu gündən etibarən 21 nömrəli marşrutun hərəkəti dəyişdirilərək “28 May” metro stansiyası – Puşkin küçəsi – Neftçilər prospekti – Nobel prospekti – “Əhmədli” metro stansiyası olmaqla müəyyən edilib. Avtobusların hərəkət cədvəli səhər saat 6:00-dan gecə saat 12:00-a qədərdir. 21 nömrəli “BakuBus” avtobuslarında gediş haqqının ödənilməsi nağd pulla deyil, yalniz “BakıKart” vahid ödəniş kartları ilə həyata keçirilir.

Bakı Nəqliyyat Agentliyi mütəmadi olaraq şəhər nəqliyyat sisteminin mövcud durumu barədə monitorinqlər həyata keçirir, təkrarlanan xətlərlə əlaqədar tədbirlər görür, istismara yararlı olmayan nəqliyyat vasitələrinin aşkar olunub müvafiq tədbirlərin keçirilməsini təmin edir, daimi olaraq bütün xətt üzrə daşıyıcılar qarşısında tələblər qoyur və onların icrasına nəzarət edir. Bununla əlaqədar olaraq 14 nömrəli marşrut xətti ilə 21 nömrəli marşrut xəttinin trayektoriyası bəzi dayanacaqlarda təkrarlandığı üçün 14 nömrəli marşrut xəttinin son dayanacağı dəyişdirilərək metronun “28 May” stansiyası müəyyənləşdirilib. 14 nömrəli marşrut xətti artıq bu gündən etibarən metronun “Xətai” stansiyasındakı dayanacağa daxil olmayacaq. Agentliyin kompleks gördüyü bütün işlər bütövlükdə şəhər nəqliyyatının optimallaşdırılması məqsədi daşıyır.