Ötən il 15 mindən çox vətəndaş nazirlikdə, bölgələrdə, habelə virtual qaydada qəbul edilib, qaldırılan məsələlərlə bağlı zəruri tədbirlər görülüb

Bakı, 31 yanvar, AZƏRTAC

Yanvarın 31-də ədliyyə naziri Fikrət Məmmədovun sədrliyi ilə nazirliyin hibrid formatda kollegiya iclası keçirilib.

Ədliyyə Nazirliyinin mətbuat xidmətindən AZƏRTAC-a verilən məlumata görə, çıxış edən nazir 2022-ci ilin ölkəmiz üçün uğurlu olduğunu, xalqımızın Ümummilli Lideri, bu il 100 illiyini qeyd etdiyimiz dahi Heydər Əliyevin ideya və amallarının Azərbaycan Prezidenti İlham Əliyev tərəfindən uğurla inkişaf etdirilərək respublikamızın sosial-iqtisadi tərəqqisini, beynəlxalq reytinqlərdə dayanıqlı inkişafına görə yüksək pillədə qərarlaşdığını vurğulayıb.

Bildirib ki, Müzəffər Ali Baş Komandanın rəhbərliyi ilə Vətən müharibəsində işğaldan azad edilmiş torpaqlarımız dövlətimizin öz gücü hesabına sürətlə bərpa olunur, bu istiqamətdə Birinci vitse-prezident Mehriban xanım Əliyevanın təşəbbüsü ilə mühüm layihələr gerçəkləşdirilir. Bütün bunlar dövlətimizin dünyada iqtisadi qüdrətini nümayiş etdirir.

İclasda torpaqlarımızın bərpasına ciddi əngəl törədən ərazilərimizin minalanması və bu məsələdə dəstək göstərilməsi ilə bağlı nazirlik tərəfindən bir çox xarici və beynəlxalq tərəfdaşlara müraciətlər edildiyi diqqətə çatdırılıb.

Kollegiyada nazirliyin fəaliyyətinin ayrı-ayrı istiqamətləri üzrə görülən tədbirlər ətraflı təhlil olunaraq məlumat verilib ki, vətəndaşların, xüsusilə Vətən müharibəsi iştirakçılarının və şəhid ailələrinin müraciətlərinə daim qayğı və həssaslıqla yanaşılaraq ötən il 15 mindən çox vətəndaş nazirlikdə, bölgələrdə, habelə virtual qaydada qəbul edilib, qaldırılan məsələlərlə bağlı zəruri tədbirlər görülüb.

Nazirliyin əhaliyə təqdim etdiyi elektron və mobil xidmətlərin tətbiqi dairəsi genişləndirilir. İl ərzində e-xidmətlərindən istifadə sayı 2,4 milyonu ötüb.

Ölkəmizin iqtisadi tərəqqisi və mülki dövriyyənin artması notariat və vətəndaşlıq vəziyyəti aktlarının qeydiyyatı ilə bağlı əməliyyatların çoxalmasına səbəb olub. İl ərzində 4,7 milyondan çox notariat hərəkəti rəsmiləşdirilib, əhalinin sosial rifahının və demoqrafik inkişafın təzahürü olaraq nikah və doğum sayının 10 faizədək artması məmnunluq doğurur. Eyni zamanda, boşanmanın sayı nəzərəçarpacaq dərəcədə azalıb və nazirlik tərəfindən təşkil olunan mediasiya xidmətləri nəticəsində hər 5 nəfərdən birinin bu fikirdən daşınmasına nail olunub.

Vətəndaşların pozulmuş hüquqlarının bərpasında mühüm rol oynayan məhkəmə qərarlarının icrası üzrə təsirli tədbirlər davam etdirilərək yarım milyondan çox sənədin icrası təmin edilib, hüquqi və fiziki şəxslərə əvvəlki illə müqayisədə 2,4 dəfə çox - 1,4 milyard manat, o cümlədən aliment tələbləri üzrə 100 milyon manat vəsait ödətdirilib.

İclasda yerli demokratiyanın inkişafında mühüm rol oynayan bələdiyyələrin fəaliyyətində qanunçuluğun təmin olunması, onlara metodoloji yardımın göstərilməsi üzrə görülən tədbirlər qeyd olunub, nazirlik tərəfindən inzibati nəzarətin həyata keçirilməsi ilə bağlı hazırlanmış 2022-ci il üzrə illik məruzə müzakirə olunaraq Milli Məclisə təqdim olunması qərara alınıb.

Kollegiyada nazir müavinlərinin, Naxçıvan Muxtar Respublikası ədliyyə nazirinin, nazirliyin struktur və regional ədliyyə qurumlarının rəislərinin çıxışları dinlənilib.

Görülmüş işlərlə yanaşı, mövcud nöqsan və çatışmazlıqlar qeyd olunub, dövlət başçısının insanlara qayğılı münasibət göstərilməsi, qanunun tələblərinə ciddi əməl edilməsi, şəffaflığın artırılması ilə bağlı tapşırıqları diqqətə çatdırılıb, korrupsiyaya şərait yaradan halların yolverilməzliyi, vətəndaş məmnunluğunun yüksəldilməsi ilə bağlı tələblərin daim rəhbər tutularaq nizam-intizama, etik davranış qaydalarına dönmədən riayət olunması vurğulanıb.

Eyni zamanda, ədliyyənin inkişafına dair Dövlət Proqramının icrasının daim diqqətdə saxlanılması qeyd olunub, fəaliyyətin Azərbaycan Prezidentinin tələbləri səviyyəsində müasirləşdirilməsi, büdcə vəsaitlərindən qənaətlə istifadə olunması, məhkəmə qərarlarının icrası, istintaq, penitensiar, probasiya sahəsində işin səmərəliliyinin artırılması, yerli qurumlara tələbkarlığın və nəzarətin gücləndirilməsi, regional ədliyyə idarələrinin işinin müasir çağırışlara uyğun təkmilləşdirilməsi ilə bağlı və digər aidiyyəti konkret tapşırıqlar verilib.

Nazir F.Məmmədov dövlətimizin başçısının 2022-ci il 29 sentyabr tarixli Sərəncamı ilə dahi öndərin 100 illiyi münasibətilə 2023-cü ilin “Heydər Əliyev İli” elan olunmasının Ümummilli Liderinin əziz xatirəsinə əbədi ehtiramın təzahürü olduğunu xüsusilə vurğulayıb. Bu münasibətlə nazirlik tərəfindən keçirilən silsilə tədbirləri, o cümlədən gənc ədliyyə işçiləri ilə, bölgələrdə vətəndaşlar və hüquq ictimaiyyəti ilə keçirilən konfrans və “açıq qapı” günlərini, nazirliyin saytında yeni yaradılmış “Heydər Əliyev və Azərbaycan ədliyyəsi” elektron məlumat platformasını qeyd edib. 2023-cü ildə ədliyyə işçilərinin xidməti vəzifələrinin icrasını layiqincə yerinə yetirmək, Ulu Öndərin yüksək amallarına daim sadiq qalaraq dövlətimizin hərtərəfli tərəqqisi naminə Azərbaycan Prezidentinin ətrafında sıx birləşərək var qüvvələri ilə çalışmaq əzmində olduqlarını vurğulayıb.

Sonda bir sıra qeyri-kommersiya hüquqi şəxslər dövlət qeydiyyatına alınıb.