SİYASƏT
Azərbaycan-Rumıniya: Əməkdaşlığın yeni platforması
Bakı, 4 fevral , AZƏRTAC
Rumıniya Azərbaycanın müstəqilliyini Türkiyə və Estoniyadan sonra rəsmən tanıyan üçüncü ölkədir. Rumıniyanın 1991-ci il dekabrın 11-də Azərbaycanın müstəqilliyini tanımasından sonra ötən illər ərzində iki ölkə arasındakı qarşılıqlı münasibətlər addım-addım inkişaf edərək bugünkü səviyyəyə çatıb. 1995-ci ilin iyulunda Prezident, müstəqil Azərbaycanın memarı, Ulu Öndər Heydər Əliyevin Rumıniyaya rəsmi səfəri ilə münasibətlərin inkişafında yeni mərhələ başlayıb. Məhz Heydər Əliyevin rəhbərliyi ilə həyata keçirilən səmərəli əməkdaşlıq fonunda görülən işlərin məntiqi davamı olaraq 1997-ci ildə Rumıniyanın ölkəmizdə səfirliyi, 2001-ci ildə isə Azərbaycanın Rumıniyada səfirliyi açılıb. Ümummilli Lider Heydər Əliyevin banisi olduğu müstəqil Azərbaycan Respublikasının strateji inkişaf yolunu uğurla davam etdirən Prezident İlham Əliyev tərəfindən isə iki ölkə arasında əlaqələr daha da inkişaf etdirilib. 2003-cü ildə prezident seçkilərində qalib gələn İlham Əliyev, 2004-cü ildə, yəni seçkilərdən çox qısa müddət sonra Rumıniyaya rəsmi səfər edib. Səfər çərçivəsində "Azərbaycan Respublikası Prezidentinin və Rumıniya Respublikası Prezidentinin Birgə Bəyannaməsi" də daxil olmaqla müxtəlif sahələri əhatə edən 12 sənəd imzalanıb.
AZƏRTAC xəbər verir ki, bu fikirləri Milli Məclisin Ailə, qadın, uşaq məsələləri komitəsinin sədr müavini Jalə Əliyeva söyləyib.
Tərəfdaşlığın hələ ilk illərindən bu vaxtadək ölkələrin müxtəlif regional layihələrdə, o cümlədən TRASEKA proqramı çərçivəsində əməkdaşlıq etməyə başladığını diqqətə çatdıran Jalə Əliyeva deyib: “Xüsusilə iqtisadi əməkdaşlıq iki ölkə arasındakı münasibətlərin ana xəttini təşkil edib. 1998-ci il sentyabrın 8-10-da Tarixi İpək Yolunun bərpası ilə əlaqədar Bakıda keçirilən konfransda digər dövlətlər ilə yanaşı Rumıniya da iştirak edib. Həmin konfransda beynəlxalq nəqliyyat haqqında çoxtərəfli Sazişə imza atılıb. 2006-cı il iyunun 4-də Prezident İlham Əliyev Qara Dəniz Dialoq və Əməkdaşlıq Forumunda iştirak etmək üçün Buxarestdə səfərdə olub. Bu səfər çərçivəsində ikitərəfli əməkdaşlığın ən müxtəlif aspektlərinə dair müzakirələr aparılıb”.
J.Əliyeva qeyd edib ki, Azərbaycan və Rumıniya prezidentləri arasında fevralın 2-də baş tutan işgüzar görüşdə məhz əməkdaşlıq sferasında yaddaqalan məqamlara toxunulub. Siyasi əlaqələrin yüksək səviyyədə olduğunu bildirən Prezident İlham Əliyev iki ölkə arasındakı ticarət dövriyyəsinin böyük hissəsini Azərbaycandan Rumıniyaya ixrac edilən xam neftin təşkil etdiyini, dövriyyənin şaxələndirilməsi üçün əlavə addımlar atılacağını və hökumətlərarası komissiyanın Buxarestdə görüş keçirəcəyini vurğulayıb.
“Prezident İlham Əliyevin də söylədiyi kimi, Azərbaycanın neft şirkəti SOCAR uzun illərdir Rumıniyada fəaliyyət göstərir və burada şirkətin 70-dən çox yanacaqdoldurma stansiyası, bir neçə yanacaq deposu mövcuddur. Görüş əsnasında Rumıniya Prezidenti Klaus Yohannisin “Romqaz” və SOCAR-ın yeni sazişə imza atacaqlarını bəyan etməsi Azərbaycanın energetika, neft-qaz sahəsindəki yüksələn nüfuzundan xəbər verir. Həmin saziş üzrə 2023-2024-cü illərdə ölkəyə əlavə qaz nəql ediləcək. Cənub Qaz Dəhlizi, o cümlədən Azərbaycanda bərpa olunan enerji resurslarından istehsal edilmiş elektrik enerjisinin nəqli üçün çəkiləcək olan dənizaltı kabel və nəhayət, Avropa Komissiyasının dəstəklədiyi layihələr Avropa İttifaqında enerji təhlükəsizliyinin təmin edilməsinə nəzərə çarpan töhfə verəcək”, - deyə komitə sədri vurğulayıb.
Onun sözlərinə görə, görüşün diqqətçəkən məqamlarından daha biri xüsusən Qarabağın yenidən qurulması məsələsində aktuallıq kəsb edən yaşıl enerji layihələrinin iki ölkə arasındakı əlaqələrdə özünü göstərməsi idi. Belə ki, Prezident İlham Əliyevin yaşıl enerji üzrə birinci Məşvərət Şurasının keçiriləcəyindən bəhs etməsi Azərbaycan-Rumıniya əməkdaşlığının dövrün tələblərinə uyğun müasir reallıqları əks etdirən səmərəli nəticələr verəcəyinə əminlik yaradır.