SİYASƏT
28 May - Respublika Günü Malayziyada qeyd edilib
Tokio, 27 aprel, AZƏRTAC
28 May-Respublika Günü münasibətilə Azərbaycanın Malayziyadakı səfirliyi tərəfindən Kuala-Lumpurun “Renaissance” mehmanxanasında rəsmi qəbul təşkil olunub.
Tədbirdə Malayziya Xarici İşlər Nazirliyinin, Malayziya parlamentində Malayziya-Azərbaycan dostluq qrupunun üzvləri, hakim UMNO partiyasının və yerli ictimaiyyətin nümayəndələri, iş adamları, nüfuzlu KİV-lərin təmsilçiləri, ölkədəki diplomatik korpusun rəhbərləri və bu ölkədə yaşayan azərbaycanlılar iştirak ediblər.
Əvvəlcə hər iki ölkənin dövlət himnləri səsləndirilib.
Mərasim iştirakçılarını bayram münasibətilə təbrik edən Azərbaycanın Malayziyadakı səfiri Qaley Allahverdiyev Şərqdə ilk dəfə demokratik dövlət dəyərlərini yaratmış Azərbaycan Xalq Cümhuriyyətinin xalqımızın müstəqillik əzmini nümayiş etdirməsindən danışıb. Dövlət müstəqilliyi bərpa edildikdən sonra ümummilli lider Heydər Əliyevin müdrik rəhbərliyi ilə vətənimizin suverenliyinin qətiyyətlə qorunub möhkəmləndirildiyini diqqətə çatdıran səfir Ulu Öndərin əzmkar səyləri ilə ölkəmizin davamlı inkişaf strategiyasının əsasının qoyulduğunu bildirib. Prezident İlham Əliyevin rəhbərliyi ilə Azərbaycanın əldə etdiyi möhtəşəm uğurları xüsusi vurğulayan diplomat ölkəmizin bütün istiqamətlər üzrə sürətlə tərəqqi etdiyini qonaqların diqqətinə çatdırıb.
Tədbirdə bu ilin iyununda Bakıda keçiriləcək “Formula-1” Avropa Qran-pri yarışları, həmçinin 2017-ci ildə Azərbaycanın ev sahibliyi edəcəyi IV İslam Həmrəylik Oyunları barədə də məlumat verilib.
Qəbulda Malayziya hökuməti adından çıxış edən kənd təsərrüfatı və aqrar sənaye nazirinin müavini Dato Sri Tajuddin Abdul Rahman bayram münasibətilə Azərbaycan Prezidentini və xalqını təbrik edib.
Mərasim zalında ölkəmizin müstəqillik yolundan, hərtərəfli inkişafından və uğurlarından, tarixi abidələrindən və turizm məkanlarından bəhs edən sənədli film, həmçinin “Formula-1” Avropa Qran-pri yarışları və IV İslam Həmrəylik Oyunları barədə bannerlər nümayiş etdirilib. Tədbir iştirakçıları üçün verilən ziyafətdə milli mətbəximizin nümunələri, “Gilan Holdinq” şirkətinin istehsalı olan “Jalə” meyvə şirələri təqdim olunub.
Vüqar Ağayev
AZƏRTAC-ın xüsusi müxbiri
Tokio