SİYASƏT


28 May - Respublika Günü münasibətilə Türkmənistanda rəsmi qəbul təşkil olunub

Aşqabad, 30 may, АZƏRTAC

Aşqabad şəhərində Azərbaycanın Türkmənistandakı səfirliyi tərəfindən 28 May - Respublika Günü münasibətilə rəsmi qəbul keçirilib.

Qəbulda Türkmənistanın İdman Komitəsinin sədri Toylu Köməkov, ictimai xadimlər, xarici dövlətlərin və beynəlxalq təşkilatların bu ölkədə fəaliyyət göstərən diplomatik nümayəndəliklərinin rəhbərləri və soydaşlarımız iştirak ediblər.

Tədbir Azərbaycanın və Türkmənistanın dövlət himnlərinin səsləndirilməsi ilə başlayıb.

Səfir Həsən Zeynalov Azərbaycan Xalq Cümhuriyyətinin müsəlman Şərqində yaradılan ilk demokratik, dünyəvi respublika olması, onun yarandığı tarixi şərait, mövcud olduğu qısa müddət ərzində dövlət quruculuğunun müxtəlif sahələrində həyata keçirilən mütərəqqi islahatlar, beynəlxalq aləmdə tanınması istiqamətində görülən işlər barədə iştirakçılara geniş məlumat verib.

Cümhuriyyətin əsas fəaliyyət istiqamətlərinin iqtisadiyyat, mədəniyyət, təhsil sahələrində islahatların həyata keçirilməsi, milli ordunun yaradılması olduğunu bildirən səfir bu islahatlardan ən mühümü kimi cinsindən, milliyyətindən, siyasi və dini mənsubiyyətindən asılı olmayaraq bütün vətəndaşlara bərabər, o cümlədən müsəlman aləmində ilk dəfə qadınlara seçki hüququnun verilməsini qeyd edib. Cümhuriyyətin cəmi 23 ay yaşamasına baxmayaraq, onun Azərbaycan xalqının demokratik prinsiplər əsasında özünün milli dövlətini yarada bilməsinin sübutu kimi tarixə düşdüyünü diqqətə çatdırıb.

Müasir Azərbaycan Respublikasının 1991-ci ildə öz müstəqilliyini bərpa edərkən Azərbaycan Xalq Cümhuriyyətinin siyasi və mənəvi varisi olduğunu bəyan etməsini, eləcə də onun bayrağını, gerbini və himnini özünün dövlət rəmzləri kimi qəbul etməsini xalqımızın qədim dövlətçilik ənənələrinə sadiqliyinin nümayişi kimi qiymətləndirən səfir müstəqillik illərində ümummilli lider Heydər Əliyev tərəfindən uğurla həyata keçirilən siyasətin nəticəsində ölkəmizdə ictimai-siyasi sabitliyin yarandığını, hüquqi dövlət və vətəndaş cəmiyyətinin qurulması istiqamətində böyük nailiyyətlər qazanıldığını, bazar iqtisadiyyatının formalaşdığını, Azərbaycanın dünya birliyinə inteqrasiya olunduğunu, bütün bunların Azərbaycanın gələcək inkişafı üçün möhkəm təməl yaratdığını vurğulayıb.

Bu gün Azərbaycanın iri beynəlxalq enerji və nəqliyyat-kommunikasiya layihələrinin həyata keçirilməsində əhəmiyyətli rol oynadığını qeyd edən səfir artıq reallaşdırılmış layihələrlə yanaşı, yaxın zamanlarda daha bir nəhəng enerji layihəsi olan TANAP və TAP qaz kəmərlərinin inşaatının başa çatmaq üzrə olduğunu diqqətə çatdırıb. Adıçəkilən layihələrin qlobal enerji təhlükəsizliyinin təmin olunmasında mühüm əhəmiyyət daşıdığını bildirən səfir, həmçinin Asiyadan Avropaya və əks istiqamətdə yüklərin daşınması müddətini əhəmiyyətli dərəcədə azaldacaq Şərq-Qərb və Şimal-Cənub nəqliyyat layihələrinin ölkəmizdə uğurla davam etdirildiyini vurğulayıb. O, Azərbaycanın Bakı Beynəlxalq Humanitar Forumunun, Mədəniyyətlərarası Dialoq Forumunun, I Avropa Oyunlarının, IV İslam Həmrəyliyi Oyunlarının, eləcə də bir çox beynəlxalq tədbirlərin həyata keçirildiyi məkana çevrildiyini diqqətə çatdırıb.

Çoxsaylı uğurları ilə yanaşı, Azərbaycanın ərazisinin 20 faizinin Ermənistan tərəfindən işğalı kimi həll olunmamış probleminin də olduğunu bildirən səfir bununla bağlı dünya ictimaiyyətinin, aparıcı beynəlxalq təşkilatların, o cümlədən BMT Təhlükəsizlik Şurasının işğal olunmuş ərazilərin dərhal azad edilməsini tələb edən qətnamələrinin olduğunu diqqətə çatdırıb. O, bu tələblərin hələ də yerinə yetirilməməsinə baxmayaraq, Azərbaycan Respublikasının öz ərazi bütövlüyünü bərpa edəcəyi xüsusi vurğulayıb.

Azərbaycanla Türkmənistan arasındakı ikitərəfli münasibətlərə toxunan səfir Azərbaycan Prezidenti İlham Əliyev və Türkmənistan Prezidenti Qurbanqulu Berdiməhəmmədov tərəfindən ölkələrimiz arasında əlaqələrin gələcək inkişafının əsas istiqamətlərinin müəyyən olunduğunu diqqətə çatdırıb. O, əlaqələrimizin siyasi və iqtisadi sahələrdə olduğu kimi, humanitar və mədəniyyət sahələrində də uğurla inkişaf etdiyini söyləyib, ötən il ticarət dövriyyəsinin 3 dəfə artdığını nəzərə çatdırıb. Azərbaycan ilə Türkmənistan arasında müştərək hökumətlərarası komissiyanın fəaliyyət göstərdiyi, eləcə də ölkələrimizin beynəlxalq təşkilatlar çərçivəsində qarşılıqlı şəkildə biri-birini dəstəklədikləri bildirilib.

Bu günlərdə ölkələrimiz arasında diplomatik əlaqələrin qurulmasının 25 illiyinin qeyd olunduğunu diqqətə çatdıran səfir bunun münasibətlərin inkişafında yeni dövrün başlanğıcı olacağına inamını, eləcə də xalqlarımızın etnik yaxınlığının, tarixən qırılmaz bağlılığının, eyni mədəniyyətə sahib olmasının əlaqələrimizin inkişafına münbit zəmin yaratdığını vurğulayıb.

Daha sonra çıxış edən Türkmənistanın İdman Komitəsinin sədri Toylu Köməkov Prezident Qurbanqulu Berdiməhəmmədovun Respublika Günü münasibətilə Azərbaycan xalqına təbriklərini çatdırıb. O, Türkmənistanda Azərbaycan Respublikası ilə dostluq münasibətlərinə yüksək dəyər verildiyini söyləyib, hər iki ölkənin mehriban qonşu olduğunu, xalqlarımızın isə ortaq dil, tarixi və mədəni dəyərləri bölüşdüyünü qeyd edib.

T.Köməkov Türkmənistanın dövlət başçısının 2015-ci ilin iyun ayında ölkəmizdə keçirilmiş ilk Avropa Oyunlarının açılış mərasiminə qatıldığını və bu səfər çərçivəsində Azərbaycan Prezidenti ilə keçirilmiş görüş zamanı əldə olunmuş razılaşmaların münasibətlərin inkişafına yeni təkan verdiyini nəzərə çatdırıb. Vurğulayıb ki, bir neçə gün əvvəl Bakıda keçirilmiş IV İslam Həmrəyliyi Oyunlarında Türkmənistandan çox böyük tərkibdə idmançıların iştirakı da münasibətlərin səviyyəsini göstərir.

Türkmənistan rəsmisi iki ölkə arasında beynəlxalq təşkilatlar çərçivəsində də uğurla əməkdaşlıq edildiyini bildirərək, Azərbaycanın Türkmənistanın bitərəflik statusunu dəstəkləyən ilk ölkələrdən biri olduğunu qeyd edib. Bu ilin əvvəlində BMT Baş Məclisinin iclasında Türkmənistanın irəli sürdüyü 12 dekabr tarixinin “Beynəlxalq bitərəflik günü” kimi qeyd edilməsinə dair qətnamə layihəsinə Azərbaycanın həmmüəllif rolunda qoşulması da əməkdaşlığımızın yüksək göstəricisidir. Əlaqələrimizin genişləndirilməsinin digər göstəriciləri sırasında Türkmənistan ilə Azərbaycan arasında hüquq-müqavilə bazasının gücləndirilməsi, hər iki ölkənin iştirakı ilə birgə beynəlxalq tədbirlərin keçirilməsi qeyd edilib. Toylu Köməkov ticarət-iqtisadi sahədə əməkdaşlığın əhəmiyyətinə toxunub, bu xüsusda hökumətlərarası komissiyanın vacib rol oynadığını qeyd edib. O, həmçinin elm və mədəniyyət sahəsində əməkdaşlıq üçün perspektivlərin mövcud olduğunu diqqətə çatdıraraq bildirib ki, istər Azərbaycan, istərsə də Türkmənistanda elm və mədəniyyət sahəsində keçirilən tədbirlərdə hər iki ölkənin nümayəndə heyətləri fəal iştirak edirlər.

Türkmənistanın İdman Komitəsinin sədri Toylu Köməkov Türkmənistan ilə Azərbaycan arasında münasibətlərin hər iki xalqın rifahı naminə daha da yüksək templərlə inkişaf edəcəyinə əmin olduğunu bildirib.

Rəsmi qəbulda Xalq artistləri Mələkxanım Eyubova və Möhlət Müslümovun rəhbərliyi ilə Azərbaycandan gəlmiş incəsənət xadimləri milli musiqi nümunələri ilə çıxış ediblər.

İlahə Əhmədova

AZƏRTAC-ın xüsusi müxbiri

Aşqabad

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.