REGİONLAR
700 bal toplayan gənc: “Qarşıya məqsəd qoyubsansa, nəticəni əldə etmək elə də çətin deyil” VİDEO
İsmayıllı, 19 iyul, Adil Ağayev, AZƏRTAC
İsmayıllı şəhər 5 saylı tam orta məktəbin məzunu Ağalətif Lətifov IV ixtisas qrupu üzrə ali məktəblərə keçirilən qəbul imtahanlarında 700 bal toplayaraq ən yüksək nəticə qazanıb. Onun bu uğuru nəinki ailədə, eləcə də oxuduğu məktəbdə, rayonda böyük sevinclə qarşılanıb.
Ağalətif ailənin iki övladından biridir. Bacısı Gülbəniz Azərbaycan Dövlət Pedaqoji Universitetində təhsil alır. İxtisasca riyaziyyat müəllimi olan atası İsaq Lətifov onun oxuduğu orta məktəbdə direktor müavini, anası isə evdar qadındır.
AZƏRTAC-ın müxbiri 5 saylı orta məktəbdə İsmayıllının fəxri olan bu gənc oğlanla görüşüb. Söhbət zamanı Ağalətif bildirir ki, hələ imtahanın cavabları açıqlanmamışdan əvvəl 700 bal toplayacağına əmin idi: “Orta məktəbdə nəticələrim yüksək idi. Bütün qiymətlərim “5” olub. Uşaqlıqdan həkim olmağı arzulamışam. Buna görə də sənədlərimi IV qrupa verdim. Uşaq həkimi, pediatr olmaq istəyirəm. Ailə üzvlərim, yaxınlarım 700 bal topladığıma görə çox sevinirlər. Sözün açığı, imtahanda yüksək bal toplayacağıma əmin idim. Təhsil aldığım məktəb gənc təlim-tərbiyə ocağıdır. 2004-cü ildən fəaliyyətə başlayıb. Bu qısa müddətdə məktəbimizin iki dəfə “Ən yaxşı ümumtəhsil müəssisəsi” adını alması, 2014-cü ildə 8 nəfərin, 2015-ci ildə isə 6 məzunun 600-dən yuxarı bal toplaması göstərir ki, burada çalışan müəllimlər olduqca tələbkar və məsuliyyətlidirlər. Əslində, qazandığım uğur onların gərgin əməyinin bəhrəsidir. Atamın oxuduğum məktəbdə işləməsinin də bu nəticəyə böyük təsiri olub. Belə ki, təhsilə can atan şagirdə gündəlik nəzarət varsa, onun yaxşı oxumaqdan savayı yolu qalmır”.
O deyir ki, əgər qarşıya məqsəd qoyubsansa, buna nail olmaq üçün gərək əziyyət çəkəsən. Әziyyətin qarşılığı isə 700 bal ola da bilər, olmaya da. Bu da, haradasa, qismətlə bağlıdır. Amma qarşıya 700 bal toplamağı məqsəd qoyubsansa, gərək özünü sistemli şəkildə hazırlayasan. O zaman bu nəticəni əldə etmək çox da çətin deyil. “Son 2-3 ildə ancaq 700 bal toplamaq barəsində düşünürdüm və inanırdım ki, qəbul imtahanında bu nəticəni əldə edə biləcəyəm. Düzdür, sınaq imtahanlarında bu nəticəni əldə edə bilməmişdim. Hansısa mexaniki səhvim olanda düşünürdüm ki, qəbul imtahanında bunu etməyəcəyəm. Beləliklə, qəbula ciddi hazırlaşırdım. Son 2 ildə xüsusilə planlı, sistemli hazırlaşdım. Aşağı siniflərdə yaxşı oxumuşdum deyə, hazırlaşmaq mənə çətin olmadı. İmtahanda xüsusilə diqqətli oldum, həyəcanı minimuma endirdim. Ümumiyyətlə, belə hesab edirəm ki, yüksək nəticə göstərmək abituriyentin özünün pedaqoji və psixoloji hazırlığından asılıdır”, - deyə Ağalətif Lətifov qeyd edir.
İmtahan suallarının səviyyəsi, çətinlik dərəcəsi barədə də danışan gənc qəhrəman bildirir ki, suallar hər bir hazırlıqlı abituriyentin cavablandıra biləcəyi səviyyədə idi. Sınaq imtahanlarındakı sualların modeli ilə uyğunluq təşkil edirdi.
Onun gələcək abituriyentlərə tövsiyələri də var. Deyir ki, hər bir abituriyent qarşısına konkret məqsəd qoymalı, qəbul imtahanına planlı və sistemli şəkildə hazırlaşmalıdır. Yalnız bu halda o, istədiyi nəticəni əldə edə bilər. Bununla yanaşı, hər bir abituriyent vaxtını sistemli şəkildə bölsə və asudə vaxtından səmərəli istifadə etsə, qarşıya qoyduğu məqsədə nail olar.
Sonda Ağalətif bu nəticənin əldə edilməsində zəhməti olanlara təşəkkürünü bildirib: “Bu uğuruma görə valideynlərim və müəllimlərimlə yanaşı, məktəbin direktoru Elçin Məmmədova, sinfimizin rəhbəri İlahə Bağıyevaya təşəkkür və minnətdarlığımı bildirirəm. Onların heç də valideynlərimdən az sevinmədiyini görüb qürur duyuram. Fərəhlənirəm ki, mənə doğma məktəbdə atalıq, analıq qayğısı göstərən bu insanları sevindirə bilmişəm”.